Нийслэл Улаанбаатар хотын ойр орчимд болон орон нутгийн суурьшлын бүсэд баавгай үзэгдэх болсон талаар иргэд цахим сүлжээнд мэдээлж байна. Тэгвэл үүнтэй адил ОХУ болон Япон Улсад баавгай ойгоос дайжиж, суурьшлын бүс рүү нэвтэрсэн, хүний аминд хүрсэн тохиолдол гарчээ.

          Тухайлбал, ОХУ-д 2026 он гарснаас хойш 10 хүн баавгайд дайруулж амиа алдсан байна. Хамгийн сүүлд гэхэд, энэ сарын 16-ны өдөр ОХУ-ын Эрхүү муужид жимс түүхээр явсан хоёр эрэгтэй баавгайд дайруулж нас барсан тухай орон нутгийн хэвлэлүүд мэдээлжээ. Түүнчлэн ОХУ-ын Бүгд Найрамдах Буриад Улсад нэг өдрийн дотор баавгай суурьшлын бүсэд нэвтэрсэнтэй холбоотой 27 дуудлага бүртгэгдсэн байна. Дуудлагын дагуу холбогдох мэргэжилтнүүд газар дээр нь ажиллан аюул учруулж болзошгүй долоон баавгайг буудан устгажээ. Одоогийн байдлаар Буриадын зарим бүс нутагт баавгайтай холбоотой аюулгүй байдлын арга хэмжээ авахаар зөвлөлдөж байгаа бөгөөд иргэдийг онц шаардлагагүй бол ой руу орохгүй байхыг зөвлөж байна.

Баавгай яагаад хүмүүсийн суурьшлын бүс рүү орж байна вэ:

ОХУ-ын Байгалийн нөөц, экологийн яамнаас гарсан мэдээллээр баавгай ойгоос дайжиж, хүмүүсийн суурьшлын бүс рүү нэвтрэх болсон нь байгалийн гаралтай хүнсний хомстолоос үүдэлтэй гэж үзэж байна. Тодруулбал, тус яамны төлөөлөгч Татъяна Арамилева “Сибирийн холбооны тойрог даяар ан амьтдын хүнсний эх үүсвэр болох ургамлуудын ургац бүрэн алдагдсан. Ойд хушны болон ойн самар, жимс, мөөг байхгүй болсон” гэж мэдэгджээ. Баавгай нь жилийн энэ үед ичээндээ орохын өмнө хоол хүнсээ хайж, цуглуулахад их хугацаа зарцуулдаг аж. Тиймээс ойд нь идэш, тэжээл хангалтгүй учир хоос хүнс олж, нөөцлөхөөр ойн ойролцоох зам, тосгон, жуулчны бууз зэрэг суурьшлын бүс рүү нэвтэрч байгаа гэж үзсэн байна.

          Гэвч хүнсний хомстол баавгай суурьшлын бүс рүү нэвтрэх цорын ганц шалтгаан биш гэнэ. Тухайлбал, ОХУ-ын Байгалийн нөөц, экологийн яамны шинэ судалгаагаар хот, суурингийн орчим дахь хогийн цэг, хогийн сав, ил задгай хол, хүнсний хаягдал нь баавгай хүмүүсийн суурьшлын бүс рүү нэвтрэх томоохон шалтгаануудын нэг болж байгаа аж.