БНХАУ-ын Өвөр Монголын Өөртөө Засах Орны Ардын Засгийн газрын Хэвлэл мэдээллийн алба, БНХАУ-аас Монгол Улсад суугаа Элчин сайдын яам, Монгол Улсын Соёл, спорт, аялал жуулчлал, залуучуудын яам хамтран зохион байгуулж буй “Хятадыг танин мэдэхүй” Өвөр Монголын XIV соёлын өдрүүд есдүгээр сарын 23-ны өдөр Улаанбаатар хотод нээлтээ хийлээ. Нээлтийн арга хэмжээнд зохион байгуулагч талууд болон Монгол Улсын соёл, урлаг, хэвлэл мэдээллийн салбарын 300 гаруй төлөөлөл оролцлоо.

    Өвөр Монголын Өөртөө Засах Орны Намын хорооны Суртал ухуулгын газрын орлогч дарга Сун Үгуань нээлтийн үеэр хэлэхдээ, “Хятадыг танин мэдэхүй” Өвөр Монголын соёлын өдрүүдийг зохион байгуулж байгаа нь хоёр улсын төрийн тэргүүн нарын хүрсэн, иргэд хоорондын харилцаа, солилцоог гүнзгийрүүлэх тухай чухал тохиролцоог хэрэгжүүлэх бодит арга хэмжээ юм гэв. Тэрбээр уг арга хэмжээг өмнө нь 13 удаа амжилттай зохион байгуулж, хоёр орны ард түмний харилцан ойлголцол, нөхөрлөлийг бэхжүүлэх чухал арга хэмжээ болгон хөгжүүлж ирснийг онцоллоо.

   Энэ удаагийн соёлын өдрүүд “Нээлттэй хөгжлийн шинэ боломжийг хуваалцаж, тал нутгийн шинэ Торгоны замыг хамтдаа байгуулъя” сэдвийн дор зохион байгуулагдаж, 12 төрөл, чиглэлийн нийт 23 арга хэмжээг багтааж байна. Эдгээр арга хэмжээ нь худалдаа, эдийн засгийн хамтын ажиллагааг өргөжүүлэхийн зэрэгцээ Хятад, Монголын соёлын солилцоо, харилцан суралцах, туршлага хуваалцах талбар болох юм. Мөн Монголын иргэдэд Хятадад аялах, танин мэдэхүйн болон судалгааны аялал хийх, суралцахтай холбоотой мэдээлэл авах боломж бүрдүүлнэ гэж Сун Үгуань хэллээ.

    Монгол Улсын Соёл, спорт, аялал жуулчлал, залуучуудын яамны Төрийн захиргааны удирдлагын газрын дарга Б.Алтантуяа хэлэхдээ, Монгол Улс, БНХАУ нь олон зуун жилийн түүхэн хэлхээ холбоотой, найрсаг харилцаатай хөрш орнууд юм. Хоёр орны иргэд харилцан визгүй зорчих боломжтой болж, жуулчдын урсгал жилээс жилд нэмэгдэж байгаа нь хоёр талын хамтын ажиллагаа улам бэхжиж буйн нэг илрэл юм гэв. Тэрбээр мөн соёлын салбарын харилцаа, хамтын ажиллагаа улам өргөжин хөгжиж байгаад баяртай байгаагаа илэрхийллээ.