Онцгой байдлын байгууллагын сургалт, бэлтгэлийн нэгдсэн төлөвлөгөөний дагуу техник, тоног төхөөрөмж, багаж хэрэгсэл хариуцсан мэргэжилтэн, автын инженер, механик жолооч нарт зориулсан “Автомашины цахилгаан болон электрон систем, оношилгоо, засварын мэргэшүүлэх сургалт, дадлага”-ыг энэ сарын 21-25-ны өдрүүдэд зохион байгуулж байна.

    Сургалтыг Шинжлэх ухаан, технологийн их сургуулийн Механик инженер, тээврийн сургуульд зохион байгуулж байгаа бөгөөд Онцгой байдлын ерөнхий газар болон тус сургуулийн хооронд байгуулсан хамтын ажиллагааны санамж бичгийн хүрээнд хоёр дахь жилдээ хэрэгжиж буйгаараа онцлог аж.

    Сургалтад төв, орон нутгийн Онцгой байдлын байгууллагын 20 гаруй алба хаагч хамрагдаж, автомашины орчин үеийн цахилгаан, электрон систем, бүтэц хийц, оношилгоо, засвар үйлчилгээний талаар онолын мэдлэг эзэмшихийн зэрэгцээ орчин үеийн оношилгооны тоног төхөөрөмж ашигласан лабораторийн дадлага хийж байна.

    Мэргэжлийн сургалтын байгууллагын материаллаг бааз, лаборатори, орчин үеийн оношилгооны тоног төхөөрөмжид түшиглэн сургалт, дадлагыг зохион байгуулснаар алба хаагчдын техникийн мэргэшлийн ур чадварыг дээшлүүлэх, автомашин, техникийн бэлэн байдлыг хангах, шаардлагатай засвар үйлчилгээг шуурхай гүйцэтгэх чадавхыг нэмэгдүүлэхэд чухал ач холбогдолтой юм.