Манай дугуйн баг Азийн наадмын дугуйн бөөн гараатай 157.6 км замыг 4 цаг,16.54 цагийн амжилтаар дуусгалаа. Монгол Улсаас Азийн наадмын хошой хүрэл, Ази тивийн хошой мөнгө, хүрэл медальт, үндэсний шигшээ багийн тамирчин, ОУХМ С.Жамбалжамц, залуучуудын дэлхийн аварга, Ази тивийн мөнгөн медальт, ОУХМ Б.Тэгшбаяр, ОУХМ Э.Болор-Эрдэнэ нар өрсөлдсөн. Япончууд цаг агаар болон замын сонголтын уялдаан дээр яах аргагүй эзэн орны давуу талаа гаргалаа.

     Уралдааны зам ихэнх газраа нойтон, олон огцом эргэлттэй, хурдаа байнга хүссэн хэмжээндээ авч чадахгүй, тактикаа ярьснаараа хийхэд хэцүү, нийт долоон уулын өгсүүртэй хүнд зам байлаа. Олон ч тамирчин унаж замаас гарлаа. Казахстаны Люценко, Федоров нар эхний хоёр байрт шалгарлаа. "Гранд тур" ангилалд уралддаг дэлхийн том багийн казакуудтай ингэж ойрхон уралдаж байна гэдэг манайд ямар их боломж байгааг харуулаад л байгаа юм. "Астана" бол Казахстаны төрийн өмчит том компанийн хөрөнгө оруулалттай баг.

    БНХАУ, БНСУ, Тайланд, Индонези гээд том том орнуудыг манайхан асуудалгүй ардаа хийлээ. Ер нь дугуй мөнгөөр эсвэл гадны боловсон хүчин, орчин нөхцлөөр хангаад хүссэн нь амжилт гаргаж чаддаггүй хүнд спорт. Жишээ нь БНХАУ-ын тамирчид бүх талын супер дэмжлэгтэй ч дээшээ түвшинд гарч чадахгүй байгаа нь үүний баталгаа. Мэргэжлийн спортын төрлийн гол ялгаа энэ л юм даа.