НҮБ-ын гишүүн орнуудын удирдагчид Нью-Йорк хотноо чуулж Ойрх Дорнодын дайн болон дэлхийн хиймэл оюун ухааны асуудлаар хэлэлцэж байгаа. Ассемблейн үеэр АНУ-ын ерөнхийлөгч Доналд Трамп дайныг зогсоох хэлэлцээр хийхгүй бол Ираныг устгаж чадна хэмээн анхааруулсан. Гэхдээ НҮБ-ын дипломатууд АНУ-д шахалт үзүүлж байгаатай холбоотой удахгүй тохиролцоонд хүрч магадгүй гэсэн хүлээлт байгаа аж.

     Доналд Трамп илтгэлдээ “Иран өмнөхөөсөө ч илүү агуу, цэцэглэн хөгжсөн улс гүрнийг хамтдаа босгон байгуулах хэлэлцээр байгуулах уу... Эсвэл бид Исламын Бүгд Найрамдах Улсыг бүрэн устгаж, дахин  хэнд ч сөнөөх үйл ажиллагаа явуулах эрхгүй болгох уу" гэж хэлсэн юм. АНУ-ын тусгай элч Стив Виткофф АНУ болон Иран улсууд мягмар гарагт НҮБ-ын Ерөнхий Ассамблейн чуулганы үеэр талын төлөөлөгчөөр дамжуулан урт хугацаанд хэлэлцсэн гэж мэдэгдэв. Виткофф цааш нь хэлэлцээр дахин үргэлжлэх бөгөөд үр дүнтэй, найдвар төрүүлэхүйц байгааг дурджээ.

     Доналд Трамп мөн Ойрхи Дорнодын орнуудын удирдагчидтай уулзсан байна. Удирдагчид дэлхийн газрын тос, байгалийн хийн тээвэрлэлтийн тавны нэг нь дамжин өнгөрдөг Ормузын хоолой дахь усан тээврийг дахин сэргээхийг эрмэлзэж байгаа. Гэхдээ Иранд хэт их эрх мэдэл олгохоос болгоомжилж буй. Үүнээс гадна эдгээр орнуудын олонход нь дайны туршид Ираны халдлагад удаа дараа өртсөн АНУ-ын цэргийн томоохон баазууд байрладаг.

Доналд Трамп Ойрх Дорнодын улс орнуудын удирдагчидтай уулзах үеэрээ Ирантай холбоотой нөхцөл байдал ирэх арваннэгдүгээр сард болох дунд шатны сонгууль гэхэд дуусна найдаж байгаагаа илэрхийлжээ.

      Яг энэ үед Доналд Трамп олон талаас дипломат шахалттай тулгараад буй. Тухайлбал АНУ-д эрчим хүчний зардал нэмэгдэхтэй зэрэгцэн бүс нутгийн мөргөлдөөн өргөжсөн. Мөн түүний улс төрийн байр суурийг дахин тодорхойлох дунд шатны сонгууль болоход зургаан долоо хоног үлдээд байгаа. Хэлэлцээр амжилттай болж гэрээ байгуулагдах уу, эсвэл дайн улам бүр хурцдах уу гэдэг нь дэлхийн газрын тосны зах зээл, Персийн булангийн бүс нутгийн аюулгүй байдал болон сая сая Иранчуудын хувь заяаг шийдэх асуудал.

Харин Ираны зүгээс АНУ цэргийн шахалтаа сулруулж, Ираны боомтуудад тавьсан бүслэлтээ буцаавал Тегеран хэдхэн хоногийн дотор Ормузын хоолойг дахин нээх боломжтой гэж мэдэгдсэн байна. Иран зүгээс одоогоор хатуу байр суурьтай байгаагаа сануулсаар байгаа. Ираны Парламентын дарга Мохаммад Багер Калибаф "Трамп Ираны ард түмэн болон түүний зэвсэгт хүчинд өөрийн эрх чадлаа тулгаж чадахгүй" гэжээ.