Монгол Улсаас Канад Улсад суугаа Элчин сайдын яам Торонто хотноо 2026 оны есдүгээр сарын 21-нээс аравдугаар сарын 24-ний өдрийг хүртэл зохион байгуулагдах “International Peace Festival 2026” олон улсын энх тайвны наадмын нээлтийн арга хэмжээнд оролцов. Нээлтийн арга хэмжээний үеэр Монгол Улсаас Канад Улсад суугаа Элчин сайд Элчин сайд Э.Сарантогосын мэндчилгээг нэгдүгээр нарийн бичгийн дарга П.Энхбаяр дэвшүүлж, Монгол Улс энх тайван, олон талт хамтын ажиллагаа, тогтвортой хөгжлийг тууштай дэмжиж, НҮБ-ын бүрэн эрхт гишүүний хувиар хувь нэмэр оруулж ирснийг тэмдэглэв.

    Энэхүү наадам нь НҮБ-ын Олон улсын энх тайвны өдөртэй уялдан жил бүр 09 дүгээр сарын 21-ний өдөр нээлтээ хийдэг бөгөөд соёл урлаг, иргэний нийгэм, дипломат үйл ажиллагаагаар дамжуулан энх тайвны төлөөх олон улсын хамтын ажиллагаа, харилцан ойлголцлыг дэмжих зорилготой аж. Наадмын хүрээнд жил бүр энх тайвны төлөөх үйлсэд кино, хөгжим, дүрслэх урлаг зэрэг соёл урлагаар дамжуулан хувь нэмэр оруулсан хувь хүн болон уран бүтээлүүдийг шалгаруулж ирсэн бөгөөд энэ жил АНУ-ын найруулагч Вилл Паринелло (Will Parrinello)-ийн Монгол Улсад зураг авалтыг нь хийж, бэлтгэсэн “Pride of the Gobi” кино “Honorary Film Tribute Award” буюу Киноны төрлийн Хүндэт шагналыг хүртэж байгаагаараа онцлогтой болж байна.

   Түүнчлэн наадмын хүрээнд Торонто хотын төв талбайд зохион байгуулагдсан Олон улсын соёлын үзэсгэлэнд Торонтогийн Их сургуулийн Монгол оюутны холбоотой хамтран Монгол Улсын соёлын буланг ажиллуулж, эх орныхоо түүх, соёл, өв уламжлалыг наадмын оролцогчид, зочдод танилцуулав. Энэхүү арга хэмжээнд оролцсон нь Монгол Улсын энх тайванч гадаад бодлого, өв соёл, байгаль, нүүдлийн соёл иргэншлийн онцлогийг Канадын төдийгүй олон улсын зочдод таниулсан ач холбогдолтой боллоо.