Өнгөрөн одож буй долоо хоногт Монголын улс төр, нийгэм, эдийн засаг, спортын салбарт өрнөсөн онцлох үйл явдлуудыг тоймлон хүргэж байна.

Байгалийн гамшигт бэлтгэлгүйгээ батлав

            Өнгөрсөн долоо хоногт хүмүүсийн ярианы гол сэдэв болж, басхүү айдаст автуулж, байгалийн гамшиг хэзээ ч “отож” магадгүй, түүнд хэзээд бэлэн байхыг сануулсан үйл явдал боллоо. Тодруулбал, өнгөрсөн мягмар гарагт буюу энэ сарын 12-ны 05:32 цаг 55 секундэд Хөвсгөл аймгийн Ханх сумаас баруун урагш 30 км-ийн зайд 6.5 магнитуд хүчтэй газар хөдлөв. Газар хөдлөлтийн голомт нь  тус сумын Долоон уул орчмын газар байсан гэж мэргэжлийн байгууллагууд мэдэгдсэн. Зөвхөн энэ өдрийн өглөө цаг гарангийн хугацаанд нийт зургаан удаа газар хөдөлсөн бол Ханх сумын Долоон уул, Ренчинлхүмбэ сумын Жиглэгийн ам орчимд 30 гаруй удаагийн давтамжтай газар хөдөлж, хамгийн ихдээ 6.7 магнитуд хүрчээ. Мөн газар хөдлөлтийн улмаас автомашин байрнаасаа 40 см орчим хөдөлж, Ренчинлхүмбэ сумын Жиглэгийн ам орчмын айлуудын байшингийн цонх, шилэн эдлэл хагарч, гэрийн тавилгууд унаж, газар дөрвөлжлөн хагарч, их хэмжээний ус гарч, Ханх сумын ерөнхий боловсролын сургуулийн хичээлийн байр, ЗДТГ-ын байрны хана цуурсан. Хэдийгээр газар хөдлөлт Улаанбаатар хотын төвөөс 600 км гаруй зайд болсон ч чичирхийлэл Булган, Орхон, Сэлэнгэ, Хөвсгөл аймаг, нийслэлийн оршин суугчдад хүчтэй мэдрэгдсэн юм. Энэ талаарх мэдээллийг албаныхан үйл явдал болсноос долоон цаг гаруйн дараа өгч "Улаанбаатар хотод гамшгийн дохиолол дуугараагүй нь газар хөдлөлтийн хүч бага байсантай холбоотой ч бид цаашид иргэдэд сэрэмжлүүлэг мэдээлэл хүргэхдээ анхаарна" хэмээн байгалийн гамшигт үзэгдэлд бэлэн бус байгаагаа баталж, сэтгүүлчдийн эх сурвалжуудтай холбогдож аль хэдийн авсан мэдээллээс хавь дор мэдээлэл өгсөн юм.

                 Манай сэтгүүлч Д.Чанцалдулам газар хөдөлсний дараахан Ханх сумын малчин С.Ренчинтэй холбогдон авсан ярилцлагыг эндээс уншина уу.

Оффшор бүсээс хөрөнгөө хураалгаж мэдэх 23 албан тушаалтан хэн бэ

Улсын ерөнхий прокурорын газраас энэ сарын 13-нд мэдээлэл хийх үеэрээ “Панамын баримт бичиг” буюу оффшор бүс, гадаадын оронд хууль бус хөрөнгө, орлогоо байршуулсан иргэдтэй холбоотой хэрэгт мөрдөн шалгах, хэрэг бүртгэлтийн ажиллагаа явуулж байгаа гэдгийг мэдэгдлээ. Мөн “Энэ бол 23 хүн, албан хаагчтай холбоотой асуудал. Оффшор бүсэд тэднийг хөрөнгө байршуулсан эсэхийг шалгаж байгаа” гэх тайлбарыг албаныхан өгсөн юм. Харин энэ 23 хүн хэн бэ гэдэгт хэн ч хариулт өгөөгүй байгаа юм. Тэгвэл манай ЭРГЭЛТ.МН сайт оффшор бүсээс эхний ээлжинд хэн хэний хөрөнгө орж ирэх магадлалтайг танилцуулсан юм.

Энэ талаарх нийтлэлийг эндээс уншаарай.

Оюутолгойн хөрөнгө оруулалт зогсвол хэнд ашигтай вэ

Газар хөдлөхтэй зэрэгцэн олон улсад гарсан "Монгол Улс “Rio Tinto” корпорацид Оюутолгойн гэрээг цуцлах санал илгээсэн" гэх мэдээлэл дэлхийн эдийн засагт чичирхийлэл үүсгэв. Үүнтэй холбоотойгоор “Оюу толгой” ХХК-ийн 66 хувийг эзэмшдэг Канадын “Torquoise Hill Resources” компанийн хувьцаа 20 хувиар буурсан байна. Тус компанийн хувьцаа Нью-Йоркийн хөрөнгийн бирж дээр 21.4 хувиар буурч, 11.38 ам.долларт хүрсэн бол Торонтогийн биржид 24 хувиар буурч, 13.88 канад доллар болсон юм.  

Харин ЗГХЭГ-ын дэд дарга Б.Солонгоо үүнд тайлбар өгч “Монгол Улсын Засгийн газраас 2019 оны арванхоёрдугаар сард Ажлын хэсэг байгуулсан. Оюутолгойн хөрөнгө оруулагчтай хийсэн гэрээ хэлэлцээрийг Монгол Улсын хууль тогтоомжтой уялдуулан сайжруулах, далд уурхайн бүтээн байгуулалтын санхүүжилтийн төлөвлөгөөний баримт бичгийг Монгол Улсын хууль тогтоомжид нийцүүлэн сайжруулах гэсэн үндсэн чиглэлээр яриа хэлэлцээр хийсэн Бид одоо санхүүгийн тооцоололд дүн шинжилгээ хийж байна. Хоёр талын яриа хэлэлцээр үргэлжилж байна. Нөгөө талаас Оюутолгой төслийг зогсоох хэмжээнд асуудал хурцдахгүй байх гэж бодож байна. Оюутолгой төслийг зогсооно гэсэн байр суурийг Засгийн газар илэрхийлээгүй” гэлээ.

Оюутолгойн далд уурхайн төсөл зогсвол бид юутай нүүр тулахыг эндээс, ЗГХЭГ-ын дэд дарга Б.Солонгоогийн тайлбарыг бүрэн эхээрх нь https://ergelt.mn/news/1/single/4453-ээс уншаарай.

Шүүхийн багц хуулийг шинэчлэн батлав

Үндсэн хуулийн нэмэлт, өөрчлөлтийн хүрээнд Шүүхийн багц хуулийг шинэчлэн баталж буй. Тэгвэл УИХ-ын чуулганы нэгдсэн хуралдаанаар өнгөрсөн баасан гарагт Шүүхийн тухай хуулийг эцэслэн баталлаа. Засгийн газраас өргөн барьсан хуулийн төсөл дээр Ажлын хэсэг  дөрвөн сар гаруй хугацаанд  ажиллажээ. Мөн Хууль зүйн байнгын хороо түүхэндээ хамгийн олон цагаар хуралдаж, хуулийн төслийг хэлэлцүүлсэн байна. Түүнчлэн парламентын дэгийн тухай хуульд хэрэглэж байгаагүй заалт хэрэглэж, нэг цаг гаруй мэтгэлцээн зохион байгуулсан. Шүүхийн тухай хуулийг хэлэлцэн батлахдаа үг үсэг, заалт бүрээр нь хэлэлцэж, санал хураалт явуулснаараа онцлог юм. Энэ талаар
УИХ-ын гишүүн С.Бямбацогт  "Энэ хууль бол Үндсэн хуулийн салаа мөчир, хуулийн засаглал шударга ёсны үндэс. Шүүгч, болон шүүх хэнээс ч, юунаас ч хараат бус ажиллах боломжийг бид энэ хуулиар хийж чадлаа. Хүн бүр шүүхийн өмнө тэгш эрхтэй байна гэдэг зарчмыг хангаж байна. Иргэдийн шударга шүүхээр шүүлгэх эрх нь нээгдэж байгаа гэсэн үг. Шүүгчид хуулиар өөр дарга  байхгүй. Шүүгч шүүгчдээ нөлөөлдөг, дарамталдаг явдал энэ хуулиар эцэслэгдэнэ. Мөн шүүгчийн томилгоог нэг хүн хийж, хонгил үүсгэдэг асуудал үүгээр дуусна. Шүүгчийн хариуцлагыг нэмэгдүүлж, шүүгчид хориглох 40 гаруй зөрчлийг тусгаж өгсөн. Хариуцлага алдсан шүүгчийг Сахилгын хороогоор оруулдаг болж байгаа. ШЕЗ-ийн 10 гишүүний таван гишүүнийг шүүхээс, үлдсэн тавыг нь УИХ-аар нээлттэй сонгон шалгаруулж, сонсгол явуулж томилохоор болсон. Сайн хуулийг муу хэрэгжүүлж амийг тасалдаг алдаа болохгүй гэдгийг энэ хуулиар дамжуулан шүүгч нартаа сануулж байгаа. Шүүхийн тухай багц хуулийн хувь заяа шүүгч нарын гарт байна" гэсэн юм.

 Манай жүдочдын коронавирусийн дараах анхны медалийг МУГТ М.Уранцэцэг авчирлаа

            Коронавирусийн халдвартай холбоотойгоор дэлхий дахинаа урлаг, спортын олон арга хэмжээ цуцлагдаж, хүн төрөлхтөн хүйгээрээ бараг анх удаа олон нийтийн арга хэмжээгүй ийм удаан "хоригдож" байгаа гэж хэлж болно. Харин сүүлийн үед ариутгал, халдваргүйтгэлийг өндөр хэмжээнд ханган, цөөн хэдэн спортын арга хэмжээ зохион байгуулж байгаагийн нэг нь Катарын Доха хотноо болсон жүдо бөхийн "Мастерс 2021" тэмцээн байлаа. Тэмцээн нэгдүгээр сарын 11-13-ны хооронд гурван өдөр үргэлжилж, манай орны 16 тамирчин 11 жинд хүч үзсэнээс МУГТ М.Уранцэцэг хүрэл медалийн болзол хангаж, 2021 оны жүдо бөхийн анхны медалийг эх орондоо авчирлаа. Тэрбээр өөрийн жингийн тэргүүлэгч бөх Украины жүдоч, дэлхийн хошой аварга Дарья Белодедид цэвэр ялагдаад, дагах барилдаанд Аргентины олимпын аварга Паретог ялсан юм. Улмаар хүрэл медалийн төлөө Францын Меланье Клементетэй барилдан, гарт өчих мэхээр цэвэр яллаа. Тэд хоорондоо дөрвөн удаа барилдаж, тус бүр хоёр ялаад байсан бол М.Уранцэцэг ийнхүү нэг ялалтаар илүү боллоо. Ингэснээр тэрбээр "Мастерс" тэмцээнээс нэг алт, хоёр хүрэл медальтай болж байгаа юм.

Тэмцээний гурван өдрийн тойм мэдээллийг https://ergelt.mn/news/105/single/4470-ээс уншаарай.