Оюутолгойн далд уурхайн төсөл зогсож магадгүй гэх мэдээлэл олон улсын хэвлэлүүдээр гарсан. Уг асуудлаар ЗГХЭГ-ын дэд дарга Б.Солонгоo тайлбар өглөө.

Тэрбээр “Монгол Улсын Засгийн газраас 2019 оны арванхоёрдугаар сард Ажлын хэсэг байгуулсан. Оюутолгойн хөрөнгө оруулагчтай хийсэн гэрээ хэлэлцээрийг Монгол Улсын хууль тогтоомжтой уялдуулан сайжруулах, далд уурхайн бүтээн байгуулалтын санхүүжилтийн төлөвлөгөөний баримт бичгийг Монгол Улсын хууль тогтоомжид нийцүүлэн сайжруулах гэсэн үндсэн чиглэлээр яриа хэлэлцээр хийсэн.  

Үүнтэй холбогдуулан Засгийн газраас авч хэрэгжүүлсэн нилээд их ажил бий. Оюутолгой төслийн далд уурхайн бүтээн байгуулалт эдийн засгийн үр өгөөжийн хувьд Монгол Улсад хэрэгтэй. Гэхдээ 2020 оны Оюутолгой төслийн техник, эдийн засгийн шинэчилсэн тодотгол байгаа. Санхүүгийн тооцооллын хувьд Оюутолгой төслийн далд уурхайн эдийн засгийн үр өгөөж нилээд буурахаар харагдаж байна. Бид одоо санхүүгийн тооцоололд дүн шинжилгээ хийж байна.

Урьдчилсан байдлаар далд уурхай ашиглалтад ороод 2051 он хүртэл Монгол Улс ногдол ашиг авахгүй. Цаашлаад 22 тэрбум ам.долларын өртэй үлдэх тооцоог "Рио Тинто" компани Монгол Улсын Засгийн газарт өгсөн.

Үүн дээрээс нэмээд 2051 он хүртэл хугацаанд Оюутолгой компани Монгол Улсад ашгийн татвар буюу аж ахуйн нэгжийн орлогын албан татварыг ердөө дөрөвхөн жилд төлөхөөр байна. 40 жил үйл ажиллагаа явууллаа гэхэд дөрөвхөн жилд нь аж ахуйн нэгжийн орлогын албан татвар төлнө гэдэг бол чамлахаар үзүүлэлт. Тэгэхээр энэ төсөл Монгол Улсад үр өгөөжтэй юу гэдэг асуудлыг нухацтай ярих ёстой гэсэн албан бичгийг Монгол Улсын Засгийн газраас хөрөнгө оруулагч талд өгөөд байгаа. Үүнтэй холбогдуулан УИХ-ын 92 дугаар тогтоолын хэрэгжилтэд Засгийн газар анхаарал хандуулж байна. 2015 онд байгуулсан Далд уурхайн санхүүжилтын төлөвлөгөө гэсэн баримт бичгийг УИХ-аас Монгол Улсын хууль тогтоомж болон эрх ашигт нийцээгүй байна гэсэн дүгнэлт дээр үндэслэн засаж сайжруул гэсэн чиглэлийг өгчихсөн байгаа. Хоёр талын яриа хэлэлцээр үргэлжилж байна. Нөгөө талаас Оюутолгой төслийг зогсоох хэмжээнд асуудал хурцдахгүй байх гэж бодож байна. Оюутолгой төслийг зогсооно гэсэн байр суурийг Засгийн газар илэрхийлээгүй” гэлээ.

Мөн Монгол Улсад энэ төсөл ашигтай байх ёстой. Монгол Улсын нутаг дэвсгэр дээр үйл ажиллагаа явуулж байгаа учраас татварын орлого төвлөрүүлэх ёстой. Татварын маргаан нэг талдаа шийдэгдэх байх. Рио Тинто компаниас төслийн үйл ажиллагаа зогсох хэмжээнд хүрсэн гэж мэдэгдээгүй” гэлээ.