Олон улсын жүдо бөхийн холбооноос Катар Улсын Доха хотод зохион байгуулж буй “Мастер-2021” тэмцээн гурван өдөр үргэлжилж, сая дууслаа. Тус тэмцээнд манай орны 16 тамирчин эрэгтэй, эмэгтэй төрлийн нийт 11 жинд хүч үзсэнээс эхний өдрийн барилдаанд МУГТ М.Уранцэцэг хүрэл медаль хүртэж, энэ оны “Мастерс” тэмцээнийг өндөрлүүлэв. Өнгөрсөн гурван өдөр барилдсан манай орны баг тамирчдын оноолт, дүнг нэгдсэн байдлаар танилцуулж байна.

Нэгдүгээр сарын 11. “Мастерс-2021” тэмцээний эхний өдөр.

       -Эмэгтэйчүүдийн -48 кг жинд “Мастерс-2019” тэмцээний мөнгөн медальт Г.Наранцэцэг эхний тойрогтоо ялалт байгуулж, хоёр дахь тойрогт Португалийн тамирчин К.Костад ялагдав.

     -Эрэгтэйчүүдийн -66 кг жинд “Мастерс”-ийн хүрэл медальт Ё.Басхүү Африк тивийн дөрвөн удаагийн аварга Египет Улсын тамирчин М.Абделмавгог давж, цэвэр ялалт байгуулсан ч, хоёрдугаар тойрогтоо ялагдал хүлээж, үзэгчдийн суудалд шилжсэн.

        -Эмэгтэйчүүдийн -52 кг жинд залуучуудын Олимпын мөнгөн медальт, Дэлхийн аварга Л.Сосорбарам “Лондон-2012” Олимпын наадмын хүрэл медальт Белги Улсын тамирчин Ч.Вантай учраа таарч, тэмцээнээ өндөрлүүлсэн.

        -Эрэгтэйчүүдийн -66 кг жинд “Мастерс” тэмцээний алт, мөнгөн медальт Г.Хэрлэн “С” хэсгийг тэргүүлсэн ч, шувтаргын барилдаанаас үзэгчдийн суудалд шилжив.

       -Эмэгтэйчүүдийн -57 кг жинд өнгөрсөн оны Дюсселдорфийн Их дуулгын хүрэл медальт Б.Хорлоодой залуучуудын ДАШТ-ий мөнгөн медальт Израилийн Г.Примог нэмэлт цагт буулган авч, хоёрдугаар тойрогт ялагдсан.

      -Мөн тус жинд Олимпын наадмын мөнгөн медальт, Дэлхийн аварга, “Мастерс” тэмцээний дөрвөн удаагийн аварга МУГТ Д.Сумъяа Руми Улсын тамирчинтай учраа таарч, цэвэр ялалт байгуулж, хоёрдугаар тойрогт ялагдав хүлээв.

       -Эрэгтэйчүүдийн -60 кг жинд залуучуудын Дэлхийн аваргын хүрэл медальт Л.Өнөболд хоёр тойргийн турш ялалт байгуулж, гурав дахь тойргоос тэмцээнээ өндөрлүүлсэн.

      -Харин Дэлхийн аваргын мөнгө, “Мастерс”-ийн гурван удаагийн хүрэл медальт МУГТ Д.Амартүвшин “С” хэсгийг тэргүүлэн барилдсан Испанийн тамирчин Ф.Гарригост эхний тойрогт ялагдаж, тэмцээнээ дуусгав.

    -Эрэгтэйчүүдийн -66 кг жинд "Мастерс"-ийн алт, мөнгөн медальт Г.Хэрлэн хүрэл медалийн төлөө ОХУ-ын А.Григоряантай учраа таарч, ялагдал хүлээн "Мастерс-2021" тэмцээний тавдугаар байрт шалгарсан.

     -Эмэгтэйчүүдийн -48 кг жинд Дэлхийн аваргын иж бүрэн медальт, “Мастерс” тэмцээний алт, хүрэл медальт МУГТ М.Уранцэцэг Франц Улсын тамирчин М.Клементтэй хүрэл медалийн төлөө учраа таарч, ялалт байгуулсан билээ.

Нэгдүгээр сарын 12. “Мастерс-2021” тэмцээний хоёр дахь өдөр.

     -Тус тэмцээний хоёр дахь өдрийн барилдааны салхийг хагалж, эрэгтэйчүүдийн -81 кг жинд манай жүдоч О.Ууганбаатар хоёр тойргийн туршид сайн барилдаж, цэвэр ялалт байгуулсан ч гуравдугаар тойрогтоо Узбекистаны тамирчин Ш.Болтабоетод унаснаар тэмцээнээ дуусгасан.

    -Эрэгтэйчүүдийн төрлийн -73 кг жинд ДАШТ-ий хүрэл, “Мастерс” тэмцээний мөнгөн медальт Г.Одбаяр Япон Улсын тамирчин Сойчиро Хашимототой учраа таарч, ялагдал хүлээв.

   -Хоёр дахь өдрийн барилдааны эмэгтэйчүүдийн төрөлд ганцаараа орсон ОУХМ Б.Ганхайч -63 кг жингийн эхний тойрогт “Их Дуулга” тэмцээний алтан медальт Дарья Давыдовад унаж, тэмцээнээ өндөрлүүлэв.

     -ДАШТ-ий хошой мөнгөн медальт, ОУХМ Ц.Цогтбаатар эрэгтэйчүүдийн төрлийн -73 кг жингийн хоёрдугаар тойрогт Узбекистаны тамирчин Х.Тураевтай учраа таарч, ялагдсан.

    -Харин тус өдрийн барилдаанд өндөр хүлээлттэй орсон С.Моллай эрэгтэйчүүдийн төрлийн -81 кг жингийн гуравдугаар тойрогт Гүрж Улсын тамирчин Шамил Боршашвилид унаж, үзэгчдийн суудалд шилжсэн юм.

Нэгдүгээр сарын 13. “Мастерс-2021” тэмцээний сүүлийн өдөр.

    -Тэмцээний сүүлийн өдөр эрэгтэйчүүдийн төрлийн +100 кг жинд ДАШТ-ий хүрэл медальт, ОУХМ Ө.Дүүрэнбаяр эхний тойрогтоо Израилийн тамирчин, Олимпын наадмын хүрэл медальт О.Сассонтой учраа таарч, ялагдал хүлээв.

   -Эрэгтэйчүүдийн төрлийн -90 кг жинд Азийн наадмын мөнгөн медальт, ОУХМ Г.Алтанбагана хоёр тойргийн турш сайн барилдаж, ялалт байгуулсан ч гуравдугаар тойрогтоо ялагдсан. Улмаар дагах барилдаандаа Гүрж Улсын тамирчин, “Мастерс” тэмцээний алтан медальт, Дэлхийн аварга Л.Бекауритай таарч, ялагдал хүлээснээр “Мастерс-2021” тэмцээнийг манай жүдочид нэг хүрэл медалийн амжилттайгаар өндөрлүүлж байна.