Ард түмний хайртай дуучин Адарсүрэнгээр “өвчлөгч” хэчнээн олон байна аа. Борооны дараах мөөг шиг л бөөнөөрөө л тэр эгэл даруухан мөртлөө энгүй авьяастай дуучныг дуурайгаад эхлэх юм. “Адараатай адилхан хоолойтой юм аа”, “Яг Адараа” гэж ирээд л бичлэгийг нь сошиал орчинд өөд, уруугүй хувааж түгээгээд дэмжээд байхыг нь яана гээч. Ар Монголын алдарт дуучин Пэлжээгийн Адарсүрэнг төрмөл хоолойтой, унаган авьяастай уран бүтээлч гэдгийг бид олон сайхан дуунаас нь мэдэх билээ. Түүний аргадаж тайтгаруулсан хоолойнд хэн бүхэн л татагдаж, өнөөдрийг хүртэл хайрлан сонссоор ирсэн. Гэтэл тэр чинээнд, тийм сайхан авьяаст хэн эн зэрэгцэх гэж. Үнэхээр зэрэгцлээ л тийм олуулаа лав биш.

            Одоо бүр түүгээр өвчилж, солгой хоолойгүй л бол Адараа шиг дуулах гэж зүтгэх нь л дээ, янз нь. Тийм дураар, замбараагүй, хэмжээ хязгааргүй юм гэж байхгүй шүү дээ. Мэдээж ард түмэн Адараатай хайртай, түүний дуу хоолойг бишрэн сонсдог ч ингэж хэтрүүлж, хэт их адилхан болох гэж улайрах нь хэнд ч таатай сайхан харагдахгүй. Харин ч арга ядсан, бусдад хэн нэгнийг дуурайж сайхан харагдах гэсэн арга л гэлтэй. Түүний хоолой давтагдашгүй, мөнхүү хаанаас ч ялгаран танигддаг талаар олон хүн дурсаж ярьсан байдаг. Үүний нэг нь Төрийн хошой шагналт хөгжмийн зохиолч Н.Жанцанноров.

           Тэрбээр “Сайхан хоолой. Одоо бол хилэн хоолой гэж ярина даа, бараг. Хилэн хоолой бол захиалга их өндөртэй. Тэр үед хөгжмийн зохиолчид, яруу найрагчид П.Адарсүрэнгээр дуу дуулуулах гэж өдөр шөнөгүй үзэлцэж байсан хэрэг. Сонсогчид бол П.Адарсүрэнгийн шинэ дууг өдөр шөнөгүй хүлээдэг байв". П.Адарсүрэн шиг ард түмэнд тэгж их хүндлэгдсэн дуучин яг тэр үедээ байгаагүй учраас тэр хүний сэтгэл их гонсгор үлдсэн. П.Адарсүрэн өөрийн гэсэн дэг сургуулийг бий болгосон. Тэр нарийн хоолойтой эрэгтэй дуучдыг даван гарч ирж өөрийнхөө тэр бүдүүн хоолойтой дэг сургуулийг Д.Түмэндэмбэрэл гуайтай хамт тогтоож чадсан. Нийтийн дууны үндсэн толгой дээр сахиус болон заларч байсан гэдэгтэй хэн гуай ч өнөөдөр маргаж чадахгүй. Мэргэжлийн би ч гэсэн хүлээн зөвшөөрөхөөс аргагүй байдаг. Сүүлдээ П.Адарсүрэнгээр дуу бичүүлэхэд их хүндрэлтэй болсон гэж ярьсан л даа. Архи балгадаг гэж. Тэгээд хүмүүс дуугаа дуулуулахын тулд архи аваачиж өгдөг гэж дуулдаж байсан” гэж ярьсан байдаг. Ийм нэг өөрийн гэсэн хоолойны өнгө аястай уран бүтээлч бол тэр. Түүнээс өдгөө хэн дуртай нь дуурайгаад сууж байх нь биш. Хари н уран бүтээлийг нь шимтэн сонсож, сайхан дуучныг тэр чинээгээр нь хадгалан үлдэх нь зүйтэй. Түүнээс дууг нь сонгон дуулж, “Адараатай адилхан хоолойтой” гэж хэлүүлээд л, цааш ахих нь Ард түмний хайртай уран бүтээлчийн авьяас билгийг үл хүндэтгэж, үнэ цэнгүй болгож байгаа хэрэг. Адарааг л дуурайвал сайхан болно гэж эндүүрч, түүгээр “өвчлөх”-өө болимоор байна.

              Яг ижилхэн дээл хийлгэж өмсөөд л, үсээ засуулаад найр, хурим, тоглолтод хүртэл дуурайн дуулна гээч. Хайрлаж хүндэлж, дууг нь шимтэн сонсдог байж болох ч ингэж ард түмнийг хуурмааргүй байна аа. Түүнийг үргэлжлүүлэх, дуу хоолойг нь өнөөд сэргээн санах нь зүйн хэрэг ч дуурайсан олон Адараа байж болохгүй. Жаахан дэгсдүү яриатай хүнд бол бараг өдөр бүрл сошиал орчинд Адараатай адилхан дуулдаг хүн гарч ирж байна. Тийм амархан, тийм хялбараар хэн хүссэн нь Адараа шиг дуулах юм бол Ар Монголын алдарт дуучин, энгийн даруу тэр авьяастны дуу хоолой яах билээ.