Хууль хяналтын байгууллагаас Хөгжлийн банкны хэрэгтэй холбоотой асуудлыг мөрдөн шалгаж, эрүүгийн гурван хэрэгт 85 иргэн, зургаан хуулийн этгээдийг яллагдагчаар татжээ. Зээлийн эргэн төлөлттэй холбогдуулан Хан-Уул дүүргийн XI хороонд баригдаж буй “Гантиг вилла” хотхоны есөн блок барилгыг Эрүүгийн цагдаагийн мөрдөгчдийн ажиллагааны үр дүнд Хөгжлийн банк өөрийн эзэмшилдээ авчээ. Ингэснээр Хөгжлийн банкны 86.6 тэрбум төгрөгийн чанаргүй зээлийг эргэн төлүүлэх боломж бүрджээ.

Мөн үүнээс гадна Эрүүгийн мөрдөгчдийн ажиллагааны үр дүнд “Капитал” банкны хөрөнгөөр 257.4 тэрбум төгрөгийн өр төлбөрийг барагдуулжээ. Тодруулбал, “Капитал” банкны харилцагч 354.260 иргэн, байгууллагын даатгагдсан хадгаламжийн нийт 44.7 тэрбум төгрөгийн нөхөн төлбөрийг даатгалын корпорацийн эх үүсвэрээр олгожээ. Түүнчлэн тус банкны хөрөнгийг дуудлага худалдаагаар худалдах зэргээр бусад өр төлбөрийг тус тус барагдуулсан амжилттай ажиллажээ.

Мөн “Капитал” банкны харилцагч С.Анастасиягийн хохирлыг шуурхай шийдэж өгсөн байна. Тодруулбал, иргэн С.Анастасия нь “Капитал” банканд 39.4 тэрбум төгрөгийн хадгаламжтай байсан аж. Түүний хохирол болох 39.4 тэрбум төгрөгт “Бишрэлт холдинг” ХХК-ийн эзэмшлийн зургаан обьект, газрыг шилжүүлэн өгч, хохирлыг нь барагдуулжээ.

            Ташрамд дурдахад, есдүгээр сарын 15-ны байдлаар Хөгжлийн банкны 634.6 тэрбум төгрөгийн хохирол барагдсан байна.