Сангийн яамнаас гаргасан и-баримтын сугалааны тухай богино хэмжээний видео сурталчилгаа шүүмжлэл дагуулаад байна. Тодруулбал, и-баримтаа уншуулж байгаа иргэдээ өлөн хэмээн доромжилсон нь иргэдийн дургүйцлийг төрүүлээд байгаа юм.

       Энэ талаар тус видео сурталчилгаанд тоглосон жүжигчин Б.Мишээлээс тодрууллаа. Тэрбээр “Тэр видеонд сүртэй зохиол гээд байх юм байхгүй. “Видеоны хийц, хэлбэр нь ийм, тийм байна. Хэлэх үг нь ийм байна” гэдгийг оролцсон жүжигчдэдээ хэлсэн. Тус видеоны текстийг хоёр янзаар авсан. Жүжигчин Намуунаа бид хоёр “Өлөн гэдэг нь онцгүй үг байна” гээд өөр янзаар хэлж, хоёр удаа зурагт орсон. Гэтэл эвлүүлж, монтажлахдаа өлөн гэсэн үгээр хэлснийг нь сонгож оруулсан байна лээ. Яагаад ийм үгтэй хэсгийг сонгосон, нөгөө хувилбараар хэлснийг нь сонгоогүй юм бол гэж гайхаж байна. Видеоны төсөв мөнгө нь хэдэн төгрөг байсныг мэдэхгүй. Оролцсон жүжигчдийн авсан цалин нууц шүү дээ” гэв.