Таазнаас гинжээр бэхэлсэн өлгүүрт төрөл бүрийн загварын хувцсыг зайгүй болтол нь эгнүүлэн  өлгөжээ. Хэрэв хүн өмсөөд алхаж байсан бол яах аргагүй эргэж хармаар нүд булаасан хувцас өлгүүрт харагдана. Ширээ, ханаар нь дүүрэн хувцас загварын хар зураг, нүд булаам моделиудын гэрэл зураг байршжээ. Харин өрөөний буланд өнгө өнгийн утас, оёдлын машин, хувцасны эсгүүр байлаа. Энэ бол “Minerva goddis” брэндийн урлан. Санаа сэтгэл, зорилго нийлсэн үе тэнгийн таван залуус энд бүхний нүдийг хужирлах загварлаг хувцсыг бүтээдэг. Тэд энэ сарын 17-нд анхны загварын шоугаа хийх гэж байгаа билээ. Ингээд тус брэндийн үүсгэн байгуулагч, загвар зохион бүтээгч Г.Анударьтай ярилцсанаа танд хүргэж байна.

-Танд энэ өдрийн мэнд хүргэе. “Minerva goddis” брэндийг хэрхэн үүсгэн байгуулсан түүхээс ярилцлагаа эхлэх үү?

                -Би 2016 онд Дүрслэх урлагийн их сургуулийг төгссөн. Их сургуулиа төгссөний дараа ажилд орох гэж хичээсэн ч дөнгөж төгссөн загвар зохион бүтээгчдийг оёдолчин гэж хардаг байсан. Загвар зуруулж авна, гэхдээ ажилд авах эсэх нь тодорхойгүй. Хэдэн төгрөгийн цалин авч, ямар чиглэлээр ажиллах нь тодорхойгүй. Ер нь мэргэжлээрээ ажиллахаас шантарчихсан байсан үе. Дараа нь Өвөрмонголын  “Одон” телевизээс ажлын санал ирсний дагуу очиж, стилистээр ажилласан. Ажиллаж байх хугацаандаа БНХАУ-ын олон ангит киног хариуцдаг мундаг дизайнертай танилцсан. Тэр хүн надад Монголоос олдохгүй боломжийг олгож, өөрөө хувцасны загвар гаргаж, оёж эхэлсэн. Тэр үеэс л “Миний загварууд хүнд таалагдах юм байна” гэсэн бодол төрж, урам авсан даа. “Minerva goddis” брэндийг 2021 онд хөл хорионы үеэр үүсгэн байгуулсан. Анх ганцхан оёдлын машинтай брэндээ эхлүүлж байлаа. Тэр үед “Өөрийнхөөрөө хүссэн загвараа урлах уу эсвэл орлого олох зорилгоор энгийн хүн бүрд таалагдах хувцас хийх үү” гэдэг сонголт гарч ирсэн. Бусдад таалагдах загварын хувцас хийх гэж үзсэн ч надад ажил минь таалагдаагүй. Тэгээд ч импортоор хангалттай их хэмжээгээр орж байгаа хувцсыг би энд давхар хийх шаардлага байгаагүй. Онцгой зүйл гаргахын тулд өөрөөрөө байх хэрэгтэйг ойлгосон. Өөрийгөө олохын тулд, бүжигчин, make-up артист ч хийсэн. Хайлтын үр дүнд өөрийгөө олсон гэж боддог. Гэр бүл, дотнын хүмүүсээсээ “Сонин загвартай энэ хувцсыг чинь хүмүүс тоож авахгүй” гэдэг үгийг олон сонссон. Би ойлгохгүй байгаа хүмүүст ойлгуулахыг хичээх бус ирээдүйд чиглэж, залууст зориулж бүтээж эхэлсэн. Дэлхийд өдөр бүр шинэ зүйлс нээлтээ хийж байгаа шүү дээ. Түүнтэй ижилхэн Монгол Улсаас ч гэсэн шинэ санаа гарах боломжтой. “Ийм л юм хийх ёстой” гэсэн хэвшмэл ойлголтод баригдахгүйгээр, бидний хөгжлөөс хойш зулгааж байгаа хайрцгаас гарах хэрэгтэй гэдгийг харуулахыг хичээдэг.

-Юунаас эрч хүч авч загвараа бүтээдэг вэ?

                -Зүүднээсээ загварынхаа эрчим, санааг авах үе бий. Учир нь олдохгүй зүүд зүүдэлчхээд мэдэрсэн мэдрэмжээ тэмдэглэж авдаг. Бодит бус зүүдийг хувцас загвараар дамжуулан бодит амьдрал дээр авчирч байгаа нь надад сонирхолтой, шинэлэг байдаг.

-Бүтээгдэхүүнүүд нь хязгаарлагдмал тоогоор үйлдвэрлэгддэг шүү дээ. Нэг загвараас хамгийн ихдээ хэдэн ширхэг үйлдвэрлэгддэг вэ?

                -Нэг загвараас хамгийн ихдээ 10 ширхэг л үйлдвэрлэгдэнэ. Учир нь, хувцасныхаа үнэ цэнийг эрхэмлэдэг. Импортоор дэлхийд хэдэн мянгаараа худалдаагдаж байгаа хувцас Монголд орж ирж байгаа. Би оюутан байхдаа гудамжинд өөртэйгөө ижилхэн хувцастай хүнтэй таарах их дургүй, ичдэг байсан. Тиймээс илүү үнэ цэнтэй хувцас бүтээхийг хүссэн.

-Брэндээ үүсгэн байгуулчихаад хамгийн анх ямар загварын бүтээгдэхүүн гаргасан бэ?

                -Хоолойтой цамц, цувнаас бүрдсэн зуны  коллекцоо гаргаж байсан юм. Гарсан даруйдаа ямар ч үлдэгдэлгүйгээр дууссан. Би уг нь өөртөө эх загварыг нь авч үлддэг юм. Гэтэл эх загвар хүртэл үлдэхгүйгээр борлуулагдсан. Үйлчлүүлэгчдийн хамгийн их анхаарал татсан загвар нь өвлийн хүрэм байсан. “Куртик, өвлийн хүрэм ийм л байх ёстой” гэсэн хэвшмэл ойлголтыг манай брэнд өөрчилсөн. Энгийн куртикийг нэг угаахад дулаалга нь доороо бөөгнөрчихдөг шүү дээ. Манай брэнд тус асуудлыг догь загвартай ч дулаахан, чанартай байхаар шийдсэн юм. Өвлийн загвар гарсны дараа хүмүүс манай брэндийг олон хүний бүрэлдэхүүнтэй гэж бодсон байсан. Гэхдээ би ганцаараа ажиллаж байсан үе. Тэр үед олон ажилтантай мэт ажиллаж чаджээ гэж бодож, урамшсан. Тэгээд монгол хүний биеийн бүтэц, ямар хувцас зохидог гэдгийг судалж эхэлсэн. Монголчууд ер нь загварлаг, ганган байхыг хүсдэг. Яг тэр хүслийг брэндээрээ хангаж өгөхийг хичээж ажиллаж байгаа.

- “Minerva Goddis” загварын шоуны талаар ярихгүй юу. Яагаад зөвхөн эрэгтэй моделиудаар загвараа өмсүүлэхээр шийдсэн юм бэ?

                -Манай брэндийн хувцас хүйсгүй гэдгээрээ онцлог. Эрэгтэй, эмэгтэй  аль  ч хүйсийн хүн өмсөж болох загвар, өмсгөлтэй. Тэр утгаараа эрэгтэй модель сонгосон. Үүнээс гадна Монголд дан эрэгтэй модельтой загварын шоу огт болж байгаагүй юм билээ. Мөн гол модель нь жүжигчин, дуучин Д.Лхагва ах байгаа. Гол модель болгохоор санал тавьсан учир нь харагдах байдал нь үнэхээр догь,  мөн манай брэндийн хувцсыг бүх насныхан өмсөх боломжтой гэдгийг харуулахыг хүссэн.

-“Minerva Goddis” брэндийг онцгой болгодог зүйл нь юу вэ. Юугаар нь дамжуулж “Minerva Goddis” брэндийн хувцас гэдгийг нь таних бол?

                -Ялгарах гол онцлог бол өнгө. Манай брэнд хувцсандаа хурц тод өнгө ашигладаггүй. Хүн бүрийн арьсны өнгөнд тохирох, тохирохгүй өнгө олон бий. Тиймээс завсрын өнгө ашигладаг. Өнгөнөөс гадна өдөр тутамдаа, хаана ч өмссөн тохирох загвар гаргадаг.  Хэт ганган хувцас өмсвөл хүнд тухгүй бас хэт энгийн байх тийм ч сайхан биш. Манай брэнд энэ хоёрын дунджийг барьж хаана ч өмссөн тухайтай байх загвар бүтээдэг. Мөн манай брэндийн нэрийн онцлог хувцсан дээрээ илэрдэг. "Минерв"а гэдэг нь Грекийн гоо сайхан, сүлжмэлийн бурхны Ром нэр юм. Минерва бурхны бэлгэ тэмдэг нь хүний бие дээр тулгуурласан сонин хэлбэр дүрсүүд байдаг. Тэдгээр дүрсүүд манай брэндийн хувцас дээр түлхүү ажиглагдана.

-Яагаад загвар зохион бүтээгч болохоор шийдсэн бэ?

                -Би багаасаа хувцасны материал дээр өссөн хүүхэд. Аав, ээж минь томхон хувцасны үйлдвэр ажиллуулж байсан юм. Цаг үеийн асуудлаас болоод намайг жаахан байхад л хаалгаа барьцгаасан.  Гурван настайгаасаа зураг зурж эхэлсэн. Дөрвөн настайдаа нэг өдрийн дотор уншиж сурсан. Багаасаа хүүхэлдэйндээ төрөл бүрийн хувцас оёж өгдөг хүүхэд байлаа. Намайг долдугаар ангид байхад аав,ээж хоёр минь ажил хийхээр гадаад руу явсан юм. Тэр үеэс биеэ дааж эхэлсэн. Их сургуульд орох болоход ганцхан СУИС-д очиж шалгалт өгсөн. Шалгалт өгөх гэж ирсэн хүүхдүүд аав, ээжээ хөтлүүлчихсэн, иж бүрэн зургийн хэрэгсэлтэй байсан. Гэтэл би үрчийсэн ватум цаас, нэлээн удаан хэрэглэчихсэн харандаатай сууж байлаа. Тэр үед орно гэсэн итгэлтэйгээр сургууль дээрээ очиж, тэр итгэлээрээ сургуульдаа тэнцсэн байх. Одоо бодоход заримдаа уйлмаар ч юм шиг, эсвэл үнэхээр хүчирхэг байжээ гэж боддог.

                Их сургуульд орсны дараа ээжээс даавуу, хувцас хийх материал их ирдэг байсан юм. Тэр утгаараа бодитоор ажиллаж, хүссэн хувцсаа хийж, туршиж үзэх боломжтой болсон. Сургууль бол ерөнхий эрдэм заана, үүнийг амьдрал дээр хэрэгжүүлэх нь хувь хүний үүрэг. “Гадаа хүйтэн байна” нэг хүрэм хийгээд өмсчихье, нэг цамц хийж өмсье гэж бодож, туршиж байсан учраас одоо нэг ч сантиметр алдахгүй туршлагатай болсон.

-“Minerva Goddis” брэндийн хувцсыг бүтээдэг багийнхныхаа талаар ярихгүй юу?

                -Хүчирхэг залуус гар нийлэн ажилладаг мэт санагддаг. Цөөхүүлээ хэр нь бүгдийг амжуулж чаддаг. Бүгд үндсэн ажлаасаа гадна хийж чаддаг олон зүйлтэй. Бүгд нэг хүсэл тэмүүлэл, зорилготой.  Удирдлагын хувьд багийнхандаа дөнгөж төгссөнийхөө дараа мэдэрч байсан тэр зүйлийг мэдрүүлэхгүйг хичээдэг. “Би дарга шүү” гэдэг мэдрэмжийг өгөхийг хүсдэггүй  учраас манай багийнхан гэр бүл шиг л ажилладаг.  Өөрсдөө хөгжих боломжийг олгодог.

-Дараагийн төлөвлөгөө , зорилго юу вэ. Брэндээ хэрхэн өргөжүүлэх вэ?

                -Бие даасан загварын шоу хийж байна гэдэг бидний хувьд нэг шат ахисан зүйл болж байна. Одоогоор бид оёмол бүтээгдэхүүн хийж байгаа. Цаашид материал ургуулах, ноолууран эдлэлээр залуусын өмсөхөд тохиромжтой хувцсыг урлахаар төлөвлөж, судалж байна.

-Ярилцлага өгсөнд баярлалаа. Загварын шоунд нь амжилт хүсье.

                -Баярлалаа.