“Солиот эх” киноны Бороо хүүгийн дүрээрээ үзэгчидтэй танилцаж байсан залуу жүжигчин Г.Дөлгөөн-Эрдэнэтэй ярилцлаа. Тэрбээр “Зэрлэгүүдийг хүлээхүй” кинонд алдарт жүжигчин Жонни Депптэй хамтарч тоглоосон билээ. Түүний тоглосон “Алдагдсан өдрүүд” уран сайхны кино нээлтээ хийгээд удаагүй байгаа юм.

 -Сайн байна уу, танд энэ өдрийн мэнд хүргэе. “Алдагдсан өдрүүд” киноных нь талаар яриагаа эхлүүлэх үү?

                -Хүүхэд бүрд бүх  юмыг чаддаг, мэддэг мэт санагддаг, дагаж дуурайх гэж хичээдэг ах байдаг шүү дээ. Гэхдээ тэр ах нь хэдий том хүн шиг санагддаг ч үнэндээ дотроо бол хүүхдээрээ нэгэн байдаг гэдгийг “Алдагдсан өдрүүд” киногоороо гаргахыг зорьсон.

-Энэ удаагийн кинонд гэр бүлээрээ ажиллаа шүү дээ. Гэр бүлийнхэнтэй хамтарч уран бүтээл хийх ямар байсан бэ?

                -Гэр бүлийнхээ бүх гишүүдтэй ажлын шугамаар харилцах сонирхолтой байлаа. Манай нохой хүртэл “Алдагдсан өдрүүд” кинонд тоглосон шүү дээ. Дүү бид хоёртой аав яг л найруулагч, жүжигчин, туслахын хувиар харьцсан. Би тус кинонд дүр дээр ажиллахын хажуугаар зураглаачийн багт туслахаар ажиллаа. Ээж минь ер кино урлагаас жаахан  хол хүн л дээ. Анх удаа кино багийн нэг хэсэг болж ажилласан ч үнэхээр сайн байсан. Дүүтэйгээ нэг Кинонд хамтарч ажиллах, жүжиглэх ур чадварыг нь харах дуртай. Кинонд хамт ажиллахад яг л мэргэжлийн жүжигчинтэй хамтарч ажиллаж байгаа юм шиг мэдрэмж төрүүлдэг .

-Таныг “Солиот эх” киноны Бороо хүүгийн дүрээр үзэгчид  танина шүү дээ. Тус киноны талаар ярихгүй юү, дүүтэйгээ хамтарч кинонд тоглох ямар байсан бэ?

                -“Солиот эх” миний хамгийн анхны тоглосон кино байсан.  Дүүгийн минь хувьд өмнө нь хэд хэдэн кинонд ажиллаж үзсэн учраас миний хажууд илүү туршлагатай нэгэн байсан. Дүүгээсээ их туслалцаа, зөвлөгөө авсан. “Солиот эх” кино багийн гишүүд, тэдэнтэй өнгөрүүлсэн өдрүүд хамгийн сайхан, дурсамжтай.

-“Зэрлэгүүдийг хүлээхүй” киноны талаар ярихгүй юү. Гадаадын уран бүтээлд тоглох,  алдарт жүжигчин Жонни Депптэй уулзах ямар байсан бэ?

                -Хүмүүс дүрийн минь талаар асуух бүрд “Киног минь үзээд өөрийнхөө өнцгөөр хараарай” гэж хэлдэг. Миний дүрээ харсан, үзэгчийн харж байгаа хоёр өөр байж болно шүү дээ. Тус кинонд тоглох болсноо мэдэх зүүд шиг л байсан. Киноны нээлтийн үеэр хүртэл “Үнэхээр би энэ кинонд тоглосон билүү” гэж бодогдсон. Алдарт жүжигчин Жонни Депптэй уулзаж, хамтарч кинонд тоглох, хэсэг хором ярилцсан минь миний амьдралд тохиолдсон хамгийн сайхан зүйлсийн нэг  гэж боддог. Хамгийн дуртай жүжигчинтэйгээ уулзах, хамтрах хамгийн сайхан нь байсан.

-“Алдагдсан өдрүүд” кино тэжээвэр амьтадыг тоглуулсан гэдгээрээ онцлог шүү дээ. Энэ талаар яривал?

                -Би хувьдаа нохой тоглуулсан кино хийнэ гэхэд нь жаахан итгэлгүй байсан. Амьтан бүр дээр нь компьютер график л ашиглахгүй бол яаж нохойноос сэтгэл хөдлөл, жүжиглэлт гарах юм  гэж бодсон. Нохойг камерын өмнө суулгаад хүссэнээрээ зураг дарах хүртэл хэцүү байдаг шүү дээ. Гэхдээ миний бодсоноос огт өөр, үнэхээр ухаантай байсан. Нохдод даалгавар өгөхөд яг биелүүлээд зогсохгүй зарим тохиолдолд бүр давуулж биелүүлсэн. Бидний бодсоноос илүү жүжиглэлт, сэтгэл хөдлөл гаргахыг харсан даа. “Алдагдсан өдрүүд” УСК-нд амьтны найруулагчаар ажилласан Б.Ерөөлт ах үнэхээр сайн ажиллаж, нохдыг жүжигчдээс дутахааргүй тоглуулсан нь бахархмаар санагдсан.

-Дүүгийнхээ талаар ярихгүй юу, “Эргэж ирэхгүй намар” киног үзээд ямар сэтгэгдэл төрсөн бэ?

                -Дүү минь миний хамгийн дуртай жүжигчин, хамгийн сайн найз. Бид хоёр нэгнийгээ сайн ойлгодог, найзууд шиг ярилцаж, хөгжилддөг. Муудалцах, нэгнийгээ ойлгох үе гардаг ч тэр бүрд нэгнээ илүү ойлгодог болсон мэт санагддаг. Би “Эргэж ирэхгүй намар” киног үзэж амжаагүй яваа. Заавал үзнэ гэж бодсоор л явна.

-Зураглаач, найруулагчаар ажиллахыг хүсдэг гэсэн. Энэ чиглэлээр ажиллаж байгаа юу? 

                -Тийм ээ, зураглаач, найруулагчаар ажиллахыг хүсдэг. Зураглаач, найруулагч Б.Баатар ахын багт ажилладаг. “Hero” багт зураглаачийн чиглэлээр “Зориг”, “Ноён эмэгтэй” “Этгээд” зэрэг кинонд болон реклам, контентын багт орж ажилласан.

-Багаасаа кино урлагтай ойр байсан уу. Жүжигчин болно гэж боддог байв уу?

                -Аав минь найруулагч учраас багаасаа кино урлагтай ойр байсан. Гэхдээ “Солиот эх” кинонд тоглох хүртлээ аавынхаа ажлын тухай тийм ч сайн ойлголттой байгаагүй. Би жаахан байхаасаа л хүүхэлдэйн кино үзэх дуртай, дүрүүдийнх нь үгийг цээжилчихдэг хүүхэд байсан. Анх “Солиот эх” кинонд тоглож байх үедээ жүжигчин болно гэж боддог байлаа. Дараа нь “Зориг” уран сайхны кинонд аавынхаа туслахаар ажиллаж байхдаа зураглаач Б.Баатар ахыг хараад кино зураглаач болохоор эргэж, буцалтгүй шийдсэн. Шууд ааваасаа урваад зураглаачдын багт ажиллаж эхэлсэн. Тухайн үед 14 настай жаахан хүүхдийг гололгүй багтаа авч, мэддэг зүйлсээ зааж өгсөн хүмүүст талархаж явдаг. Цаашид ч олон уран бүтээлд хамтарч ажиллахыг хүсэж байна.

-Өнөөдрийг хүртэл хийсэн зураг авалтууд дундаас хамгийн сэтгэлд үлдсэн зураг авалт ямар киноных байсан бэ?

                -Оролцож байсан бүх л киноны зураг авалтууд дурсамжтай сайхан санагддаг. Тэр дундаас Жонни Депптэй нэг үзэгд хамт тоглосон үе миний хамгийн дурсамжтай, хэзээ мартахгүй үе.

-Хэнээс хамгийн их үлгэр дуурайлал авдаг вэ?

                -Ааваасаа, ах нараасаа хамгийн их үлгэр дуурайлал авдаг. Мөн A$AP Rocky репперээс амьдралын хэв маяг дээрээ үлгэр дуурайлал авдаг. Багаасаа реппер болохыг хүсдэг байсан болохоо  дууг нь сонсож, хүндэлж явдаг.

-Таны дараагийн зорилго төлөвлөгөө юу вэ?

                -Би сонирхлынхоо дагуу реп дууны үг бичих дуртай. Энэ чиглэлээрээ амжилт гаргахыг хүсдэг. Хүүхдүүд киноны баатрын дүрд дуртай байдаг бол би Жокерын дүрд дуртай байсан. Яг л Жокер шиг зан ааш, түүхтэй дүрд тоглохыг хүсдэг. Ер нь нэг удаа эсрэг талын дүрд өөрийгөө сорьж үзэхийг хүсдэг. Ингээд бодоход багаасаа баатрыг бус эсрэг талын дүрийг илүү их дэмждэг байж.

-Ярилцлага өгсөн танд баярлалаа.

                -Баярлалаа.