Хүсэл мөрөөдлөөрөө жигүүрлэж,  амьдралд хөл тавих насан дээрээ хэнэггүй жолоочийн буруугаас болж хайртай дотын хүмүүс дээрээ хэзээ ч эргэж ирэхгүйгээр ниссэн 16 настай хүүгийн гэгээн дурсгалд зориулсан “Зүрхэнд гэрэлтэнэ” уран сайхны кино нээлтээ хийгээд удаагүй байгаа билээ. Тус кинонд мэргэжлийн жүжигчид гол дүрийг нь бүтээгээгүй. Мөрөөдөлөөрөө жигүүр хийсэн хүүг хамгийн сайн мэддэг найзууд нь тус киног “амилуулсан” юм. “Зүрхэнд гэрэлтэнэ” кинонд сайн найзынхаа буюу Билгүүний дүрийг бүтээсэн Э.Ангарагтай ярилцлаа.

-Сайн байна уу, манай уншигчдад өөрийгөө танилцуулаад яриагаа эхлэх үү?

            -Сайн байна уу, намайг Э.Ангараг гэдэг. Нийслэлийн тэргүүний Нэгдүгээр сургуулийн сурагч. “Зүрхэнд гэрэлтэнэ” кинонд Билгүүний дүрд ажилласан.

-Зүрхэнд гэрэлтэнэ киноны талаар ярихгүй юу. Гол дүрд тоглох санал ирэхэд ямар байсан бэ?

            -“Зүрхэнд гэрэлтэнэ” киног найзынхаа гэгээн дурсгалд зориулан бүтээсэн. Мөн үе тэнгийн хүүхдүүддээ замын хөдөлгөөнд оролцохдоо анхаарал болгоомжтой байж, унадаг дугуй болон моторт дугуйтай оролцох үедээ хамгаалалтын хэрэгслээ зүүж байхыг сануулж, анхааруулахыг зорьсон. Гол дүр буюу найзынхаа дүрд тоглох санал ирэхэд “Чадах болов у” гэж их бодсон. Их гайхсан л даа.

-Сайн найзынхаа дүрд тоглосон шүү дээ. Найзынхаа зан аашийг мэддэг учраас дүрд нь тоглоход дөхөм байсан уу? 

            -Найзынхаа зан аашийг мэддэг учраас дүрд нь тоглоход харьцангуй амар байсан байх. Өөр танихгүй хүний дүрээс илүү сайн мэддэг найзынхаа дүрд тоглох болсон учраас сэтгэл арай тайван болсон. Хийдэг хөдөлгөөн, хоолойны өнгө гээд бүгдийг нь адилхан хийхийг хичээсэн.

-Өөрийнхөө тоглосон киногоо үзэх ямар байсан бэ?

            -Нээлтийн үзвэрийн үеэр “ямар гарсан бол сайн жүжиглэж чадсан болов уу” гэж бодоод жаахан сандарсан. Гэхдээ өөрийнхөө төсөөлж байснаас харьцангуй сайн тоглосон байсан болохоор сэтгэл тайвширсан. Хэрэв найз минь байсан бол өөр кино хамтдаа хийгээд үзэж болох байсан байхдаа гэж бодсон. 

-Найзтайгаа өнгөрүүлсэн хамгийн гэгээн дурсамжаасаа хуваалцахгүй юу?

            -Олон жил найзалсан учраас хамтдаа өнгөрүүлсэн дурсамж олон бий. Одоо бол бүгд л нандин санагдаж байгаа. Хамтдаа хийсэн бүтэлгүйтэл хүртэл дурсамжтай.

-Сонирхлынхоо талаар ярихгүй юу хэзээнээс унадаг дугуй болон тавцангаар хичээллэж эхэлсэн юу нь хамгийн сонирхолтой санагддаг вэ?

            -Унадаг дугуйг хоёр настайдаа унаж сурсан. Долоон настайгаасаа илүү дуртай болж, гүнзгийрүүлэн сурсан. Эрсдэлтэй спортоор хичээллэснээр надад нэг л сайхан мэдрэмж өгдөг.

-Кино хийгдэх талаар сонсох ямар байсан бэ. Өөрсдөө кинондоо тоглоно гэж бодсон уу?

            -Кино хийгдэх талаар сонсоод их баярласан. Гэхдээ өөрсдийгөө тоглоно гэж арай бодоогүй. Бусдад сайн үлгэр дуурайлал өгсөн бүтээл болоосой л гэж хамгийн их хүссэн дээ. Найзынхаа гэгээн мөрөөдөл, сайхан занг энэ киногоор мөнхжүүлэхийг хүссэн

-Төгсөх анги юм билээ. Ямар мэргэжил сонгож суралцах вэ?

            -Одоогоор сурах мэргэжлээ сонгоогүй байгаа. Гэхдээ манай найзуудын зорилго нэг байгаа. Хүсэл мөрөөдлөө биелүүлж чадалгүй явсан найзынхаа мөрөөдлийг бодит амьдрал дээр биелүүлэхийг хүсэж, зорьж байгаа.

-Үзэгчид юуг бүхнээс түрүүнд олж хараасай гэж бодсон бэ?

                -Амьдадаа нэгнийгээ хайрлаасай. Богинохон амьдралыг ухаантай туулах ёстой гэдгийг хараасай л гэж бодож байна.

-Кинон дээр найзынхаа мөрөөдлийг биелүүлсэн гэсэн. Энэ талаар ярихгүй юу?

                -“Autograge”-тай болох мөрөөдөлтэй байсан юм. Дан ганц машин гэлтгүй моторт дугуй, унадаг дугуй, том , жижиг гээд бүх машинд үйлчилгээ үзүүлдэг нэгдсэн гарааштай болохыг зорьж байгаа. Энэ мөрөөдлөө кинон дээрээ биелүүлсэн дээ.

-Ярилцлага өгсөн танд баярлалаа.

                -Баярлалаа.