Jinju багаасаа кино урлагт хайртай, нийгмийн идэвхтэй, сэргэлэн охин байжээ. Арван жилийн сургуулиа төгсөөд СУИС-д элсэх туйлын хүсэлтэй байсан ч гэр бүл нь зөвшөөрөөгүйн улмаас солонгос хэлний орчуулагч мэргэжлээр суралцсан гэнэ. Гэсэн ч тэр оюутан байхаасаа киноны туслахаар ажиллаж, урлагтаа үнэнчээр үлдэж одоо “ZUER” продакшнд жүжигчнээр ажиллаж байгаа юм.

   -Сайн байна уу. "Бэхэн зүрх" гээд шинэхэн уран бүтээлд тоглосон юм байна. Энэхүү уран бүтээлийн талаар яриагаа эхлэх нь зүйтэй болов уу?

          -Сайн, сайн байна уу. “Бэхэн зүрх” кино маань саяхан зураг авалт нь дуусаад, өнөөдөр постер зургуудаа дарууллаа. Энэ ондоо багтан нээх төлөвлөгөөтэй ажиллаж байна. Туслах найруулагчаар ажилласан анхны бүтээл минь болж байна. Мөн туслах дүрд ч тоглосон. Залуу уран бүтээлчийн хувьд их зүйл сурч, мэдсэн уран бүтээл байлаа.

- Уран бүтээлийнхээ хажуугаар сошиал орчинд сонирхолтой бичлэгүүд хийж, хүргэдэг шүү дээ. Бичлэг хийх болсон үүдэл санаа хаанаас төрж байв?

          -Би "ZUER" продакшнд 2019 оноос хойш ажиллаж байна. Миний анхны бичлэг дэлгүүр дотор хүмүүсийн утсыг гуйж ярьдаг пранк бичлэг байсан. Санаандгүй мөртлөө их өндөр хандалт авсан. Анх удаа хийж үзэж байгаа болохоор тийм өндөр хандалт авна гэж төсөөлөөгүй байсан. Анхны бичлэгээ үзээд их догдолж, бүх сэтгэгдлийг нь шөнөжин уншиж байсан даа. Зарим нь намайг “Энэ харах царайтай, шижгийн хүүхэд байна. Залуусаа ийм юмнуудад утсаа битгий өгч бай” гээд л муулсан байсан. Нөгөө талаар “ Хөөрхөн охин байна. Амжилт хүсье” гэх сайхан сэтгэгдэл ч олон байсан.

    -Өөр мэргэжлээр суралцсан ч дуртай зүйлээ орхиогүй тууштай байжээ. Анх киноны арын албаны ажлаас эхэлсэн гэж сонссон юм байна?

        -Тийм ээ. Киноны арын алба гэдэг бол уран бүтээлч болоход их сайн суурь болж өгдөг болов уу гэж боддог. Киноны арын албанд би хувцас зураач, нүүр будагч, стилист, туслах зэрэг ажлыг оюутан байхаасаа хийсэн.Мөн хэд хэдэн уран бүтээлд туслах дүрийг бүтээсэн. Хэдий би урлагт хайртай бүх зүрх сэтгэлээ зориулдаг ч  мэргэжлийн сургуульд нь сураагүй учраас кинонд  тоглоход хүндрэлтэй тал бий. Учир нь, дөрвөн жил мэргэжлийн багш нараас номын дууг нь сонссон хүнээс магадгүй чадвар маань дутуу байх. Хааяа мэргэжлийн бус гээд салбарынхандаа ад үзэгдэх, шантармаар үе байдаг. Гэсэн ч би кино урлагаас хэзээ ч салж чаддаггүй. Энэ салбарт үлдэхийн тулд бүхий л чадлаараа хичээх болно.

    -Гэхдээ сургуульд сурахаас илүү практикт олон зүйлийг сурч байгаа учир харин ч сайн уран бүтээлч болох суурь тавигдаж байгаа болов уу гэж бодож байна. Залуу уран бүтээлчийн хувьд хичээж явахад үзэгчдийн хайртай дүр гарч ирэх байх. Харин ямар дүр тоглохыг хүсдэг вэ?

          -Би адал явдалт хүнд тулааны сцентэй, хурц  өрнөлтэй кинонд хүчирхэг эмэгтэйн дүр бүтээхийг хүсдэг. Мөн эсрэг дүр бүтээхийг хүсдэг. Кинонд эерэг зөөлөн дүр бүх үзэгчдийн хайрыг татдаг. Харин эсрэг дүр эерэг дүрийг тодотгож өгөөд, үзэн ядагддаг шүү дээ.

-Манай үзэгчид киног үзээд яг л бодит мэт хүлээн авч, тоглосон жүжигчнийг нь үзэн ядах, сошиал орчинд шүүмжлэх тохиолдол бий. Хэрэв та эсрэг дүр бүтээгээд тийм зүйлтэй тулгарвал ямар байдлаар хүлээн авах бол?

          -Найруулагч надад итгээд, эсрэг дүрд тоглох санал тавибал мэдээж  дуртайгаар хүлээн авч, хамгийн сайнаараа хичээж тоглох болно. Бас үзэгчдээс тийм сэтгэгдэл ирвэл баярлана. Намайг үнэхээр тийм муу эмэгтэй гэж бодож, үзэн ядаж байвал "Би дүрээ үзэгчдэд итгэл төрүүлэхүйц сайн бүтээжээ" гэж өөртөө баяр хүргэнэ.

-Бид нэгнээсээ үлгэрлэж урагшилдаг шүү дээ. Ямар уран бүтээлчээс үлгэр дуурайлал авдаг вэ?

          -Дэлхийн оддоос Angelina Jolie-ийн тоглосон киног багаасаа үзэж, биширч ирсэн. Монголоос Гавьяат жүжигчин У.Уранчимэг, СТА С.Ариунбямба нар надад  жүжигчний уран чадварын хувьд бусад уран бүтээлчээс илүү онцгойрч харагддаг. Урнаа эгчийн хувьд маш дайчин, өвөрмөц өнгийн төрхийг бүрдүүлдэг бол С.Ариунбямба жүжигчин олон кинонд эсрэг дүрийг чадварлагаар бүтээсэн мундаг жүжигчин шүү дээ. Манай жүжигчид дунд маш нэр хүндтэй, цаг сайн барьдаг, зураг авалт эхлэхийн өмнө бүх зүйлээ өөрөө шалгаж, бүртгэдэг гээд л олон сайхан чанартай хүн.Тэр бүхнээс нь суралцахыг хичээдэг.

-Хүмүүс таныг яагаад Jinju гэх болсон юм бэ?

          -Jinju гэдэг нь солонгос хэлээр сувд гэсэн үг л дээ. Би багаасаа солонгос киноны царай муутай эмэгтэй хөөрхөн болж өөрчлөгддөг хэсгүүдийг үзэх дуртай байсан. Түүнээс сэдэл авч “Jinju” цуврал контентоо хийж байгаа.

-Танай контентыг өсвөр насны хүүхдүүд ихэвчлэн үздэг юм шиг санагдсан. Хүүхдүүд хийж байгаа контентоос нь юуг олж хараасай, мэдээсэй гэж хүсдэг бол?

          -Манай пэйж рүү олон өсвөр насны хүүхэд ханддаг. “Jinju эгчээ би таныг бичлэгийг үзээд өөртөө итгэлтэй болсон. Муудалцсан байсан найзтайгаа эвлэрсэн. Танд баярлалаа” гээд л тэр бүрд их урам авч илүү гоё бичлэг хийхийг зорьдог. Би өсвөр насны дүү нартаа өөрийгөө битгий голоорой, өөртөө хайртай байгаарай л гэж хэлмээр санагддаг. Энэ санааг манай контентоос мөн харж болно.