Дээд лигийн тамирчин, “М Гарьд” багийн тоглогч А.Энхбаясгаланг “Түүчээ” буландаа урьж, ярилцлаа. Тэрбээр монголын сагсан бөмбөгийн эрэлт өндөр, чадварлаг залуу тамирчдын нэг билээ.

-Сайн байна уу. Уншигчдад өөрийгөө танилцуулаач, хэзээнээс сагсан бөмбөгийн спортоор хичээллэж эхэлсэн бэ?

            -Намайг Амарбаясгалангийн Энхбаясгалан гэдэг. Би 1997 онд Булган аймгийн Булган суманд төрсөн. 2011 онд анх төрөлх нутгийнхаа дасгалжуулагч н.Доржгочоо багшдаа шавь орж, сагсан бөмбөгийн спортоор хичээллэж эхэлсэн.

-Таны бага нас хаана өнгөрсөн бэ, ямар хүүхэд байв?

            -Намайг сахилгагүй, хөдөлгөөнтэй гэхээсээ илүү даруухан хүүхэд байсан гэж гэр бүлийнхэн маань ярьдаг.  Зуны амралтаараа хөдөө өвөө, эмээ дээр очиж, хонь хариулж, хурдан морь унадаг байлаа. Одоо ч хурдан моринд хайртай.

-Мэргэжлийн дээд лигийн тамирчин байхаас гадна өөр ямар ажил эрхэлдэг вэ. Монголын нөхцөлд сагсчид зөвхөн сагсаа тоглоод амьдралаа авч явах боломж хэр байдаг вэ?

    -Нийслэл хөрөнгө оруулалтын газрын төлөвлөлтийн хэлтэст мэргэжилтнээр ажиллаж байна. Одоо бол зөвхөн сагсаа тоглоод амьдрахад хангалттай түвшинд спортын маань үнэ цэн нэмэгдсэн. Өмнө нь сагсан бөмбөгийн спортыг дэмждэг хувь хүн, албан байгууллага бараг л ховор байлаа шүү дээ. Цаашдаа илүү хөгжсөөр, дэмждэг хүмүүс нь нэмэгдсээр байна гэдэгт би итгэлтэй байдаг.

-Сагсан бөмбөгийн спорт маш их энерги, эрч хүч шаардсан бэртэл авах элбэг байдаг спорт шүү дээ. Тиймээс сагсчид маань эрүүл мэндийн даатгалд хамрагдаж, бэртсэн тохиолдолд даатгалаас нөхөн төлбөр авдаг уу?

            -Мэдээж тамирчин хүний хамгийн том саад бэрхшээл бол бэртэл гэмтэл байдаг. Өнгөрсөн улирлаас эхлээд бүх тамирчид эрүүл мэндийн даатгалд хамрагдсан байх ёстой гэсэн заалтыг тэмцээний журамд оруулж өгсөн. МУИС-д суралцаж байх үедээ багаараа даатгалд хамрагддаг байсан. Тухайн үедээ хөнгөн болон дунд зэргийн гэмтэл авч даатгалаас нөхөн төлбөр авч байсан удаатай.

- Таны бодлоор монголын дасгалжуулагчдын ур чадвар хэр түвшинд байна вэ?

            -Би сурагч байхаасаа эхлээд дээд лигт тоглох хүртлээ МУИС-ийн дасгалжуулагч н.Эрдэнэпүрэв, Гавьяат дасгалжуулагч О.Баярцогт дээр бэлтгэгдэж байна. Багш нарыгаа өөр өөрийн гэсэн онцлогтой одоо цагийн хамгийн дээд түвшний дасгалжуулагч нар гэж боддог. 

-Дасгалжуулагчдын хувьд тамирчдынхаа төлөө хэрхэн идэвх зүтгэл гаргадаг вэ?

            -Миний хоёр дасгалжуулагчийн хувьд тамирчдаа өөрийн хүүхэд мэт хайрлаж, хамгаалж бүхнээ зориулдаг.  Бидний амжилт бүхэн тэдэнтэй салшгүй холбоотой.

-Хүндэлдэг тамирчин гэвэл хэнийг нэрлэх вэ?

            -Дөнгөж оюутан болсон цагаасаа эхлээд өнгөрсөн улирал хүртэл ОУХМ Г.Баттөр ахтайгаа нэг багт тоглосон. Хувийн зохион байгуулалт, бэлтгэлд хамрагдаж байгаа байдал, дүү нар багийнхнаа чадавхжуулж байгаа гээд бүх зүйлийг нь яг  дэргэдээс харж ирсэн. Тиймдээ ч би Г.Баттөр ахыгаа хүндэлж, хайрлаж, үргэлж суралцдаг.

-Тамирчдын бэлтгэл сургуулилт хэрхэн явагддаг вэ?

            -Өнгөрсөн дөрөвдүгээр сараас эхлээд “М Гарьд” багийнхаа тамирчин болсон Манай багийн хувьд  зуны гурван сарын хугацаанд хувийн ур чадвар дээр суурилсан бэлтгэлүүд хийгдсэн. Зуны сүүлээр Булган аймагт 14 хоногийн хугацаанд хээрийн бэлтгэлд гарч гүйлт,  тэсвэр дээрээ анхаарал өгч ажилласан. Харин энэ сараас эхлээд системийн бэлтгэлдээ ороод, лигийн тэмцээндээ бэлдээд явж байна даа.

-Сагсан бөмбөгийн спорт танд юуг суулгаж гэж боддог бэ?

            -Сагсан бөмбөгийн спорт надад багаар ажиллах чадвар, бусадтай зөв боловсон харьцах, тэвчээр хатуужилтай байх зэрэг маш зүйлийг надад суулгасан. Спортоор би хүмүүжсэн гэх үү дээ.

-Багийнхныхаа тухай яриач?

            -Манай багийн хувьд энэ жилээс “Алдар Танан Гарьд” гэх нэрээ сольж “М Гарьд” нэртэйгээр явж байна. Маш олон жилийн түүхтэй, монголын хамгийн удаан оршин тогтнож байгаа хүчирхэг багуудын нэг гэж би хэлнэ.

-Шинэ улирал эхлэх бүрд их догдолдог байх даа?

            -Шинэ улирал эхлэх бүрд нойр хүрэхгүй, догдолдог. Өмнөх улирлаасаа илүү амжилт гаргахын тулд шаргуу бэлтгэлээ хийдэг. Энэ улирлын хувьд манай баг маш том зорилгыг тавьсан байгаа.

-Анхны лигийн тэмцээндээ хэзээ орж байсан бэ, тэр үеэ дурсаач?

            -2017 онд “Архангай-Алтан Дорнодын Дайчид” багаас анх лигт тоглож байсан. Тухайн багтайгаа хамт гурван жил дараалан аваргын цомыг авч байсан.  Дээд лигт бол 2019 онд “23 Стормс” багаас тоглосон. Анхны улиралд шилдэг шинэ тоглогч гэх шагналыг авч байлаа. Залуу тамирчны хувьд тэрэн шиг сайхан мэдрэмж үгүй шүү дээ.

-Талбай дээр таны биеэ авч яваа байдал, сэтгэл хөдлөл, үйлдэл бүр үзэгчдийг татаж чаддаг. Энэ талаар та  юу хэлэх вэ?

            -Би талбай дээр гарах бүрдээ намайг дүү нар минь бас сагсан бөмбөгийн спортоор хичээллэхийг хүсэж буй хүүхдүүд гэж маш олон хүн намайг харж байгаа.  Тийм ч утгаараа биеэ зөв авч явж, даруу төлөв байж, бусдад буруу зүйл үзүүлчихгүй юм сан даа гэж хичээж тоглодог.

-Танай гэр бүлд танаас өөр сагс тоглодог  хүн бий юу?

            -Манайх бөхийн удамтай, өвөө маань бөх хүн байсан. Ээж маань бүх л спортод эв дүйтэй, тэрийг нь би дуурайсан юм болов уу гэж боддог. Сагсан бөмбөгийн спортоор бол одоогоор би л хичээллээд явж байна даа.

-Та өөрийгөө ямархуу зан ааштай хүн гэж боддог бэ?

            -Би өөрийгөө их нийтэч зантай, бусадтай амархан ойлголцдог төрлийн хүн гэж боддог. Өөрийнхөө сурсан юмыг бусдад зааж өгч, аль болох бүх чадлаараа туслахыг хичээдэг.

-Анх лигийн тамирчин болоход гэр бүл тань танаар их бахархсан байх даа,  энэ талаар яриач?

            -Намайг сагсан бөмбөгөөр хичээллэж эхэлсэн цагаас хойш гэр бүл намайг бүх чадлаараа дэмжсээр ирсэн. Тэд маань надаар бахархаж байгаа нь харцнаас нь мэдрэгддэг дээ.

-Талбай дээр гарахдаа ямар мэдрэмж авдаг вэ?

            -Нэрээ дуудуулаад талбай руу гарах мэдрэмжийг үгээр илэрхийлэх боломжгүй шүү дээ. Тэр мэдрэмж, заал дүүрэн үзэгчдийн алга ташилт байдаг болохоор л сагс бөмбөгийн спортоос би залхаагүй өдийг хүртэл хичээллэж байгаа байх.

-Ялах үед мэдээж сайхан, ялагдах үедээ ямар сэтгэл зүйтэй байдаг вэ?

            -Тоглолтынхоо өмнө сэтгэл зүйгээ бэлдсэн байдаг. Тамирчин хүнд ялах, ялагдах үе мэдээж бий. Ялагдах үедээ хамгийн түрүүнд өөрөөсөө алдааг хайж юу дээр алдсан, яаж энэ алдаагаа давтахгүй байх уу гэж боддог. Ер нь ялагдал гэдэг дараагийн ялалтын эхлэл шүү дээ.