“Монгол модель” агентлагийн модель, “Face of Mongolia 2021” тэмцээний үндэсний ялагч, “Face of Asia” тэмцээний гранпрын шагналт Н.Тунгалагийг "Түүчээ" буландаа урьж ярилцлаа.

-Сайн байна уу. Та загварын гараагаа хаанаас эхэлсэн бэ?

          -Би хүүхэд байхаасаа л загварт сонирхолтой, олон төрлийн сургалтад сууж өөрийгөө хөгжүүлдэг байсан. Анх “Азийн модель” агентлагийн Ч.Содтуяа багш дээрээ мэргэжлийн загварын алхаа заалгасан.

-Хэд дэх жилдээ загвар өмсөж байгаа вэ.Загварын юу таныг татсан бэ?

        -Хүүхэд байхад загварын тайзан дээр алхаж буй хүмүүс маш сайхан харагдаж татагдсан. Мэргэжлийн загвар өмсөгч болоод нийгмийн соёл, биеэ зөв авч явах, өөртөө итгэх итгэл, эмэгтэйлэг зан чанарт илүү суралцсан. Тав дахь жилдээ загвар өмсөгчөөр ажиллаж байна.

-Загварын салбарын эмэгтэйчүүдийг хүмүүс гоё сайхан хэрнээ мэдлэг дутмаг гэж харах тал ажиглагддаг. Энэ талаар та юу гэж боддог вэ?

          -Миний хувьд багш мэргэжилтэй. Ер нь манай загвар өмсөгчдийн олонх нь давхар өөр мэргэжил эзэмшсэн түүгээрээ ажиллаж байдаг. Дээрээс нь бид үргэлж нийгэм рүү чиглэсэн сайн дурын үйл ажиллагаанд оролцдог.

-Анх загвар өмсөгч болно гэхэд гэр бүлийнхэн нь яаж хүлээж авч байсан бэ?

          -Загвар өмсөгч болох миний хамгийн том мөрөөдөл байсан. Гэр бүлийнхэн тэр тусмаа ээж маань намайг хамгийн их ойлгож, дэмжиж ирсэн. Бүх оролцсон тэмцээн, загварын шоуны ард дэмжээд л сууж байдаг даа.

-Хүүхэд байхдаа ямар загвар өмсөгчөөс үлгэр дуурайлал авдаг байсан бэ?

          -“Монгол модель” агентлагийн багш, топ модель Д.Болормаа, топ модель Э.Одгэрэл болон “Victore`s secret”-ийн моделиудын зурагтаар хараад гэртээ дагаж алхдаг байсан.

-Багшийнхаа тухай яриач?

          -Багш маань “Монгол модель” агентлагт харьяалагдаж буй бүх загвар өмсөгчдийг өөрийн гараар бэлтгэн гаргадаг.  Монголын загварын салбарт үнэ хувь нэмрийг оруулж, өнөөдрийн түвшинд хүрэхэд нөлөөлсөн хүмүүсийн нэг гэж би боддог. Хувь хүнийх нь хувьд маш дайчин, хэзээ ч дуусашгүй мэт эрч хүчтэй, ухаалаг, гал шиг дүрэлзсэн сайхан эмэгтэй.

-Танд алхахыг хүсдэг мөрөөдлийн тайз бий юу?

          -Хүүхэд байхаасаа л “Victore`s secret”-ийн тайзан дээр алхахыг мөрөөдсөөр ирсэн.  Монголын загварын салбар одоо л дэлхийн стандартад нийцхүйц болж хөгжиж, илүү мэргэжлийн болж эхэлж байна.

-Хүүхэд байхдаа загварын тайзан дээр алхаж байсан үеийн мэдрэмж одоогийн мэдрэмж хоорондоо ялгаатай байна уу?

          -Анхны тайз хүүхэд насны үе маань хэзээ ч мартагдахааргүй догдлол дүүрэн, мөрөөдөлдөө умбасан, нисэж байгаа мэт мэдрэмжийг өгдөг байсан. Одоо бол арай туршлагатай, сандрал бага болсон байна.  Гэхдээ одоо ч тайзнаас үгээр илэрхийлж барамгүй сайхан мэдрэмжийг авдаг.

-“Face of asia” тэмцээнд оролцож байх үеийнхээ тухай яриач?

          -“Face of Mongolia” тэмцээн дууссаны дараа нэг сарын хугацаанд бэлтгэлээ хийсэн. Хөл хорионы үе байсан болохоор гурван сарын хугацаанд онлайн хэлбэрээр зохион байгуулагдаж ялагчаа тодруулсан. Моделийн хувьд оролцсон анхны тэмцээн учир өөрт байгаа бүхий л нөөц бололцоогоо гаргаж, оролцсон.

-Монгол моделиуд дэлхийн загварын зах зээлд өрсөлдөх боломж хэр байдаг вэ?

          -Манай моделиудын хувьд гадаад төрөхийн хувьд дэлхийн бусад орны загвар өмсөгчдөөс дутахгүй. Хамгийн гол нь тууштай хичээж, хэлний мэдлэгээ сайжруулахад дэлхийн аль ч тайз нээлттэй гэж боддог.

-Загвараар хичээллэхийг сонирхож буй хүүхдэд загварын давуу болон сул талыг хэлж өгөөч?

          -Өөрийгөө нээж, бусадтай зөв харьцаж сурдаг, дээрээс нь хамт олонтой болно. Мэдээж олны нүдэн дээр үргэлж байна гэдэг амаргүй. Гэхдээ биеэ зөв авч явж, олны хайр хүндэтгэл, шүүмжлэлийг хүлээж авч байвал тийм ч хэцүү биш. Хөдөлмөр хүнийг бүтээдэг шүү дээ.

-Биеийн галбираа хадгалахын тулд ямар нэгэн хоолны дэглэм барьдаг уу?

          -Миний хувьд хоолны дэглэм барьдаггүй. Харин өдөр тутамдаа дасгал хөдөлгөөн хийдэг. Усан сэлэлт, туялзуур сэлмээр гурав дахь жилдээ  хичээллэж байна. Сүүлийн үед агаарын иогоор хичээллэж байгаа.

-Урилгыг маань хүлээн авч ярилцсанд баярлалаа.

-Баярлалаа.