“Найман шарга” захын тамхины цэгийн хажуугаар зөрж, өнгөрөхтэй зэрэгцэн ченжүүдийн яриаг сонсож таарав. “Уг хоёр сая рублийн нэг ажил байна. Даанч рубль чангараад хэцүүхэн байна шүү” гээд тамхи татан зогсоо хэдэн ченж дундаа настайвтар нь бололтой нэг эр хогийн сав руу шүлсээ хаяж байх. Дэргэд зогссон залуу ч “Энэ нэг Путин тэнэг юм хийгээд рубль унагаад хаячихвал ёстой баларсан юм болох гээд байна” гээд яриаг нь өлгөж аваад л ярьж гарлаа.

-АМ.ДОЛЛАРЫН ХАНШ ЧАНГАРЧ, РУБЛИЙН ХАНШ СУЛАРЧ БАЙНА-

“Найман шарга” захад “Валют байгаа юм уу”, “Гайгүйхэн үнэтэй авна шүү” гэх зэрэг тогтмол сонсогддог асуултаас өөр чимээ үгүй, хөл, хөдөлгөөн ч сэлүүхэн. Хаа нэг павильоноор ороод үг ч дугаралгүй гарах зочдынхоо араас “нэхэл дагуул болох” ченж нараас өөр хүнгүй харагдах. Зарим ченж ч өрөөгөөр нь хүн ороод гарсан ч “нохой хуцсан чинээ” тоохгүй гар утсаа л “маажих” аж.

          Монголбанкнаас өчигдөр буюу хоёрдугаар сарын 22-нд зарласан валютын ханшаар ам.доллар 2,859.20 төгрөг, евро 3,230.04 төгрөг, рубль 35.58 төгрөг, юань 451.15 төгрөгийн үнэтэй байсан. Өнгөрсөн долоо хоногт үнэ буурсан үзүүлэлттэй гарсан ам.доллар энэ долоо хоногт Монголбанкаас зарласан ханшаар 2867 төгрөгт тэнцэж, өмнөх долоо хоногоос 0.25 хувиар өссөн үзүүлэлттэй гарсан.

          Харин “Найман шарга” захад ам.доллар 2870 төгрөг, евро 3255 төгрөг, рубль 37.2 төгрөг, юань 453.5 төгрөгийн үнэтэй буюу Монголбанкаас зарласан ханшнаас 1-24 төгрөгөөр илүү үнэтэй байв.

"ХИЧЭЭЛ, СУРГУУЛЬ ЭХЭЛСЭНТЭЙ ХОЛБООТОЙГООР АМ.ДОЛЛАР, ЮАНИЙН ХАНШ ӨССӨН"

“Найман шарга” захын ченжүүдийн тайлбарлаж байгаагаар сургууль, цэцэрлэг шинэ хичээлийн улирлаа эхлүүлж, сурагчид хичээлдээ явж эхэлсэн нь валютын ханш өсөхөд нөлөөлж байгаа гэх. Хичээл, сургууль эхэлсэнтэй холбоотойгоор зах, худалдааны төвүүд гаднаас бараа, материалаа идэвхтэй татаж байгаа нь эрэлтийг нэмэгдүүлж, төгрөгтэй харьцах валютын ханшид нөлөөлсөн аж. Мөн цар тахлын нөхцөл байдалтай холбоотойгоор хил хаалттай үед төгрөгтэй харьцах ханш нь буурсан юань Монгол Улс цар тахлын дэглэмээ сулруулж, хилээ нээсэнтэй холбоотойгоор өсөж эхэлсэн байна.

          Ченжүүдээс төгрөгтэй харьцах валютын өсөлт, бууралтын талаар байр суурь авч байтал гаднаас “Урагдсан 10 евро авах уу” гэж мөнгөө урдаа сарвайсаар нэгэн эмэгтэй орж ирлээ. Ченж ч голоороо багахан урагдсан 10 еврог эргүүлж, тойруулж харсаар “Ах нь энийг чинь 3000-д авъя. Өгөхгүй гэвэл аваад л гар. 3000-гаас илүү үнэтэй авах хүн олдохгүй л байх даа” хэмээн шалсаар ам авч, 30 мянган төгрөг атгуулаад гаргачихав.

“73-ААР АВНА"

          “Найман шарга” захын гадна 10, 20 мянган төгрөгийн боодол дэвсгэрт барьсан хэд хэдэн хүн зөрж, өнгөрөх автомашины зүг гараа даллаж, “Ам.доллар, юань авна шүү. “Найман шарга”-ынхнаас үнэтэй авна” гэж байлаа. Үнийг нь асуувал “73-аар авна” гэх бөгөөд 2873 төгрөг буюу “Найман шарга”-ын ченжүүдийн зарласан ханшнаас гурван төгрөгөөр илүү үнэтэй худалдан авч байгаа аж.

Боодол бэлэн 20 мянган төгрөгийн дэвсгэрт барин зам дагуу зогсох наймаачид хоорондоо ч гэсэн худалдаа хийх. Хажуугаар нь зөрөх хүмүүсээс “Халаас, түрийвчинд чинь ам.доллар байхгүй юу” гэж асууж зогссон эмэгтэй рүү замын нөгөө талаас нэгэн махлаг эр гүйхээрээ ирж, “Чи 25 мянган ам.доллар авах уу” гэж байна. Эмэгтэй ч хариуд нь “68-аар авъя. Болох юм уу” гээд тохиролцоод хүрч, өнөө махлаг эрийг дагаж явлаа.