Маргаашнаас буюу энэ сарын 15-ны өдрөөс эхлэн нийслэлийн гэр хорооллын өрхүүдийг шахмал түлшээр хангах 446 борлуулалтын цэг албан ёсоор ажиллаж эхэлнэ.

     Энэ өвөл Улаанбаатар хотын хэмжээнд түлшний хомстол үүсэхээс сэргийлэх 54 нөөц цэгийг оролцуулаад нийт 500 цэг ажиллахаар төлөвлөгдсөн бөгөөд цэг ажиллуулах хүсэлт гаргасан 734 иргэн, аж ахуйн нэгжээс шаардлага хангасан 446 борлуулагчтай гурвалсан гэрээ байгуулан бэлтгэл ажлыг хангажээ.

     Иргэдийн хувьд 25 килограммын савлагаатай нэг шуудай шахмал түлшийг 3,750 төгрөгийн тогтвортой үнээр худалдан авах боломжтой бөгөөд энэ өвөл айл өрхүүдэд 300 мянга гаруй тонн хагас коксон түлш, 80 мянган тонн шахмал түлш, харин аж ахуйн нэгжүүдэд 40 мянган тонн савласан мидлинг түлш нийлүүлэхээр зохицуулсан байна.

    Түүнчлэн энэ жилийн хангамж, хуваарилалтыг илүү ил тод, шуурхай болгох үүднээс "Хотула" аппликейшнийг шинээр нэвтрүүлсэн бөгөөд үүний тусламжтайгаар иргэд болон борлуулагчид аль цэгт түлшний илүүдэл эсвэл хомстол үүсэж байгааг, мөн захиалсан түлшний тээвэрлэлтийн явцыг газрын зураг дээр шууд хянах бүрэн боломжтой болжээ.