Боловсролын үнэлгээний төвийн Элсэлтийн шалгалт хариуцсан ахлах мэргэжилтэн Д.Энхжаргалаас зарим зүйлийг тодрууллаа. 

-Энэ жил элсэлтийн ерөнхий шалгалтыг хэчнээн хүүхэд өгсөн бэ?

-Энэ жилийн элсэлтийн шалгалтад 36,000 гаруй шалгуулагч хамрагдсан. Үүнээс математикийн хичээлээр 26,003 хүүхэд шалгалт өгсөн.

-Хүүхдүүдийн математикийн даалгаврыг гүйцэтгэх чадвар муу байна гэх мэдээлэл гарсан, энэ үнэн үү?

-Улсын хэмжээнд математикийн хичээлийн дундаж анхны оноо 24.37 байсан, энэ оноог хэмжээсжүүлж үзвэл 500 оноо гэсэн үг. Энэ жил шалгалт өгсөн нийт шалгуулагчдын математикийн даалгаврыг гүйцэтгэх чадвар сул байсан.

-Элсэлтийн шалгалтын анхны болон хэмжээст оноог хэрхэн боловсруулдаг вэ?

-Боловсролын үнэлгээний төв блюпринтээр даалгавраа боловсруулдаг. Шалгалтад ямар агуулгын, ямар даалгавар орох вэ гэдгийг блюпринтийн дагуу мэргэжлийн багш нар зохиож гаргасан. Шалгалт өгсөн хүүхдүүдийн гүйцэтгэл, дундаж нь ямар байхаас шалтгаалаад анхны оноо гардаг. Хэмжээст оноо гэдэг нь тухайн хичээлийн нийт гүйцэтгэлийг шалгалтад орсон бүх шалгуулагчийн гүйцэтгэлтэй харьцуулан хэмжээсжүүлж үзүүлсэн оноо. Тиймээс хичээл бүрийн анхны оноог шилжүүлсэн хэмжээст оноо өөр өөр гардаг. Хэмжээст оноо 200-800 онооны хооронд байдаг.

-Хэмжээст оноо хэр удаж гарсан бэ, зарим хүүхдийнх удаж байна гэх мэдээлэл гарсан?

-Скантрон машинаар хариултын хуудсыг уншуулахад шууд тухайн хариултын хуудас дээр машин өөрөө анхны оноог нь тэмдэглэж, бичилт хийдэг. Шалгалт өгсөн анги танхимаасаа 100-гаас хэдэн оноо авснаа мэдээд гарах боломжтой. 24 цагийн дотор Боловсролын үнэлгээний төвийн сайтад хүүхдүүдийн оноог хэмжээст оноонд шилжүүлж, улсын хэмжээнд хэдэд байна вэ гэдгийг нь гаргасан. Зарим шалгалтын төв дээр хүүхдийн тооноос хамаараад удсан байж болзошгүй.

-Шалгалтын үеэр ямар зөрчил гарсан бэ, хэрхэн шийдвэрлэсэн бэ?

-Өөрийнхөө оронд өөр хүүхэд оруулах, гар утастайгаа ороод хуулж байсан тохиолдол гарсан. Энэ тохиолдолд тухайн хүүхдийн өмнөх хичээлүүд дээр авсан дүн, оноог хүчингүй болгосон.   

-Монгол хэл, бичгийн шалгалтад тэнцээгүй хэдэн хүүхэд байгаа вэ. Дахин шалгалтын хуваарь гарсан уу?

-Энэ оны дөрөвдүгээр сард авсан шалгалтын үеэр 5300 гаруй шалгуулагч босго онооны болзлыг хангаж чадаагүй. Монгол хэл, бичгийн энэ оны хоёр дахь удаагийн шалгалтыг наймдугаар сарын 17-нд зохион байгуулах тов зарлагдсан. Үүнд тухайн шалгалтад босго онооны болзлыг хангаж чадаагүй, өмнөх шалгалтад хамрагдаж амжаагүй хүүхдүүд орж болно. Эдгээр шалгуулагчийг долдугаар сарын 29-нөөс буюу өнөөдрөөс бүртгэж эхлэх бөгөөд шалгалтын бүртгэл наймдугаар сарын 10-ны 18:00 цаг хүртэл үргэлжилнэ.

Бэлтгэсэн Б.Сувданцэцэг