Цагдаагийн байгууллагад өчигдөр буюу есдүгээр сарын 21-ний өдрийн 23:00 цаг орчимд Сүхбаатар дүүргийн VI хороонд “Хүүхдүүд нэгнийгээ шатаахыг завдсан” гэх дуудлага иржээ. Дуудлагын дагуу цагдаагийн алба хаагчид ажиллаж дөрвөн хүүхэд бүлэглэж, нэгнийхээ нүүр рүү шатамхай шингэн цацаж асаагаад шатаахыг завдсан нь тогтоогдсон байна.

                           Хэргийн талаар ЦЕГ-ын Хэвлэл мэдээллийн төвийн ахлах мэргэжилтэн, хошууч Б.Дэлгэрхангайгаас тодруулахад “Дөрвөн хүүхэд бүлэглэн нэгнийхээ шатаахыг завдсан болохыг тогтоосон. Тухайлбал, 12-14 насны дөрвөн хүүхэд хохирогч 16 настай хүүгийн нүүр рүү шатамхай шингэж цацаж, асаасан байсан. Хохирогч гуравдугаар зэргийн түлэгдэлттэй эмнэлгийн байгууллагад эмчлүүлж байгаа. Шатсан цамцыг баримт болгон хураан авч, хэргийг Сүхбаатар дүүргийн цагдаагийн хэлтсээс шалгаж байгаа. Харин хүүг шатаахыг завдсан 12-14 настай дөрвөн хүү танилууд бөгөөд Дархан-Уул аймагт орших суух хаягтай, өмнө нь хулгай, дээрмийн хэргээр шалгагдаж, яллагдагчаар татагдаж байсан нь тогтоогдсон” гэлээ.