Гурван орны хил дамнасан олон улсын аялал жуулчлалыг хөгжүүлэх зорилгоор БНХАУ, ОХУ-ын жуулчдыг Монголоор автомашинтайгаа аялахыг зөвшөөрчээ. Тодруулбал, “Цайны зам”-ын хүрээнд гурван орон хамтарч, аялал жуулчлалаа хөгжүүлэх зорилт тавьсан. Уг зорилтын хүрээнд автомашинтайгаа аялахыг зөвшөөрсөн захирамж гарснаас хойш хоёр удаагийн авто аялал болж өнгөрсөн гэнэ. “Цайны зам”-ын хурал болон гурван орны хил дамнасан авто аялалтай холбоотой асуудлаар Нийслэлийн Аялал жуулчлалын газрын мэргэжилтэн Н.Алтанзаяагаас тодрууллаа.

НАЖГ: Авто аяллын хүрээнд Монголд ирж байгаа гаднын автомашинуудад ямар нэгэн шаардлага тавиагүй. Түр дугаар олгож, замын хөдөлгөөнд оруулж байгаа

Тэрбээр “Гурван орны хил дамнасан олон улсын аялал жуулчлалыг хөгжүүлэх чиглэлээр нийслэлийн Засаг дарга бөгөөд Улаанбаатар хотын захирагч Д.Сумъяабазарын А/417 тоот захирамжаар НЗДТГ, ЗТХЯ, ГИХГ, ГЕГ, ХХЕГ, ТЦА зэрэг байгууллагын хамтарсан Ажлын хэсэг байгуулж, авто аяллын журмыг тогтоон ажиллаж байгаа. Одоогоор авто аяллын хүрээнд БНХАУ, ОХУ-аас хоёр ээлжийн автомашинтай жуулчдыг аялуулсан бөгөөд гурав дахь ээлжийн жуулчид ирэх амралтын өдрүүдэд болох Даншиг наадмын үеэр ирэх хуваарьтай байна.

                       Авто аялалд хамрагдах жуулчид, гадаадын аяллын компанитай “Цайны зам”-ын хурлын гишүүн зургаан компани гэрээ байгуулж, Монголоор аялуулж байгаа. Харин Ажлын хэсэг хоёр орны компаниудын харилцаа, авто аяллын дүрэм, журмыг зохицуулах үүрэгтэй оролцож байгаа юм. Мөн авто аяллын хүрээнд Монголд ирж байгаа гаднын машинуудад ямар нэгэн шаардлага тавиагүй. Харин авто аяллынхаа хүрээнд нийслэл хотдоо эдийн засгийн хувьд үр өгөөж авч үлдэхийн тулд Улаанбаатар хотоор дайран өнгөрөх, зохион байгуулах арга хэмжээ, фестивальд оролцох шаардлага тавьж байгаа. БНХАУ-ын хувьд Венийн конвенцод нэгдээгүй учир урд хөршийн дугаартай автомашинууд Монгол Улсад чөлөөтэй зорчих боломжгүй нөхцөл байдал үүссэн. Тиймээс БНХАУ-аас ирсэн тээврийн хэрэгслүүдэд түр дугаар олгож, замын хөдөлгөөнд оруулж байгаа” гэв.

Авто аялалд оролцох гаднын аяллын компаниудтай “Цайны зам”-ын хурлын гишүүн “Монголиа Экспедишн” ХХК,  “Тэнүүн Тур” ХХК, “Покет Трэвел” ХХК, “Чандмань Трэвел” ХХК, “Актив Адвентурс” ХХК, “Амар зочлол” ХХК гэх зургаан компани гэрээ байгуулж, жуулчдыг аялуулж байгаа юм байна. Эхний ээлжид “Монголиа Экспедишн” ХХК найман автомашинтай 27 жуулчныг, хоёр дахь ээлжид “Амар зочлол” ХХК зургаан автомашин, 14 мотоциклтой 49 жуулчныг аялуулжээ. Тэгвэл гурав дахь ээлжид буюу Даншиг наадмын үеэр “Амар зочлол” ХХК зургаан автомашинтай 17 жуулчныг аялуулах гэнэ.