УОК-ын шийдвэрийн дагуу таван хоног өндөржүүлсэн бэлэн байдлын зэрэгт шилжсэн билээ. Үүнтэй холбогдуулан карантины үед унших таван номыг санал болгож байна. Бүх төрлийн сургалтын байгууллага үйл ажиллагаагаа зогсоосон энэ цагт Монголын уран зохиолын шилдэг бүтээлийн далайгаас дуслыг ч атугай шүүрдэж, эргэн санаж, түүнд уусан нэгдэж, мэдрэхийг хүсье.

1.Зохиолч, орчуулагч Ж.Лхагва “Толгодын цаана ингэ буйлна”

Богино өгүүлэгийн мастер гэгдэх Ж.Лхагвын ОХУ-ын Киев хотод сурч байхдаа болон эх орондоо ирснийхээ дараа Киев хотыг дурссан цөөнгүй зохиол уг номонд багтжээ. Хүн дотоод мөн чанараа таних, өөрийгөө чагнах, харийн нутгаас эх орноо санагалзах гэх мэт олон мэдрэмжийг энэ ном мэдрүүлэх нь гарцаагүй ээ.

2.Зохиолч Ч.Галсан “Туужууд”

Герман хэл дээрх зохиол, бүтээлээрээ дэлхийд танигдсан энэ эрхэмд уншигчид шүүмжлэлтэй ханддаг. "Зохиолоо герман хэл дээр бичиж, дараа нь монгол руу орчуулдаг" хэмээсэн нь шүүмжлэл хүртэх гол үндэслэл болсон ч зохиолын хэл, найруулга нь монгол хэлний яруу сайхныг харуулах төдийгүй нутаг амь хүн бүрт байх ёстойг ухааруулдаг билээ.

3.Зохиолч, сэтгүүлч Гүр.Нямдорж “Бэнсэн үлгэрч”

Хүний амьдралын ээдрээг маш ойлгомжтойгоор зангилж бичсэн нь өнөө цагт ч уншихад хуучраагүй санагдана. Нэрт зохиолчийн мэндэлсний 60 жилийн ойд зориулан эмхэтгэсэн уг номноос ганцаардал, уйтгар гуниг, шаналал хийгээд хүн хэрхэн мөн чанараа алдаж буйг нэн сонирхолтойгоор урлан бичжээ.

4.Утга зохиол судлаач, зохиолч, яруу найрагч П.Батхуяг “Хүйтэн хотын романс”

Энэ бол Монгол Улсын хүн амын ихэнх хувь нь суурьшин амьдарч байгаа шинэ үеийн хотын соёл, амьдралыг тодотгон харуулсан ном билээ. 1990-ээд оны шилжилтийн үед өөрийн гэсэн бүхнээ гээж орхисон гол дүрийн баатрын ээдрээт дурсамж, мартагдашгүй сэтгэлийн зовуурь нь цаг хугацааг хэчнээн аймшигтай, хэрцгийг ойлгуулах аж.

5.Яруу найрагч Г.Баяр “Бугын толгойтын гарам”

Авьяаслаг яруу найрагчийн хорвоог харах өнцөг нь бусдын адил биш. Өөрийг нь тойрон хүрээлэх бүгдээс сайхныг нь олж, энэрэн хайрлаж буй сайхан сэтгэлт түүний шүлгүүдийн гал одоо ч унтраагүй, дүрэлзсэн хэвээр. Хөл хорионы энэ үед амжиж уншихыг та бүхэнд санал болгож байна.