Багш ээж нь Ө.Цэрэнчунтад анх дуулахыг зааж өгчээ. Авга ах нь уртын дуучин энэ эмэгтэй хүүгээ дуу хуурт хөтөлж байхдаа ирээдүйн том дуучин болно гэж мэдээгүй ч урлагийн хүн болох зам руу чиглүүлсэн нь энэ байж. Хүү ямар ч байсан “Дуу гэж ийм зүйл юм байна” гэдгийг мэдэж, түүний сайханд алгуурхан татагдсаар сургуульд орлоо. Дуугаараа ч олон сайхан амжилт гаргаж эхэллээ. Тэрбээр “Аав маань жолооч, ээж монгол хэл, уран зохиолын багш. Намайг цэцэрлэгт байхад цэцэрлэгийн багшаар ажиллаж байсан юм. Тэр үед надад дуулахыг зааж байлаа. Хоёр настайдаа уралдаанд оролцож, мөнгөн медаль хүртэж байсан байдаг. Тэр шагнал одоо ч надад байдаг болохоор он сар өдөртэй нь ийм сайн мэдээд байгаа юм” гэж ярьсан байдаг. Ийнхүү тэр цэцэрлэг, сургуулийн бүх л урлагийн тэмцээнд мөнөөхөн дуугаараа оролцож, нэг л мэдэхэд дуучин болохоор, дуунд амьдралаа зориулах сонголт хийн СУИС-д шалгалт өгөн зогсжээ. 

        Тэр л үед Дундговийн цангинасан хоолойтой сэргэлэн шар хүүг шалгаж авч, насан туршийн багш нь болохоор угтах эрхэм бол Хөдөлмөрийн баатар, Ардын жүжигчин Г.Хайдав. Монголын дуурийн урлагийн анхдагчдын нэг, ард түмний хайртай энэ сайхан эрхмээс тэр дөрвөн жил дуулах ур чадвар, дуучин хүн ямар байх ёстойг, хэрхэн дуулж, ямар хэмжээний хөдөлмөрч байж энэ мэргэжлийг эзэмшиж явахыг суралцаж, мөнхүү сайшаал магтаалыг сонсож, урам авсан нь өдгөө хүртэлх замд нь том хөтөч, суурь болсон байна.