Нийслэлийн иргэдийн төлөөлөгчдийн хурлын ажлын хэсэг Хийн дулааны станц, хий дамжуулах шугам барих төслийг санхүүжүүлэхээр дотоодын зах зээлд 75 тэрбум төгрөгийн үнэт цаас гаргах асуудлыг нягталжээ. Ажлын хэсэг санал, дүгнэлтээ өнөөдөр буюу арваннэгдүгээр сарын 13-нд НИТХ-ын ээлжит IX хуралдаанд танилцуулна.

    Тодруулбал, НИТХ-ын төлөөлөгч Б.Золтуяагаар ахлуулсан ажлын хэсэг өчигдөр хуралдаж төслийг хэрэгжүүлэгч “Тархмал эрчим хүчний дэд бүтэц” ХХК болон “Улаанбаатар дулааны сүлжээ” ТӨХК-ийн удирдлагуудаас мэдээлэл авсан байна. Хуралдаанаар төслийн техник, эдийн засгийн үндэслэл, санхүүжилтийн бүтэц, хэрэгжүүлэх үе шат, нийгмийн үр ашгийн судалгаа, аюулгүй байдлын дүгнэлтийг авч үзжээ.

     Төслийг 2026-2029 онд төр, хувийн хэвшлийн түншлэлээр хэрэгжүүлэхээр төлөвлөсөн байна. Эхний шатанд 58 МВт-ын хүчин чадалтай Хийн дулааны станц, шингэрүүлсэн байгалийн хий хүлээн авах, хадгалах, хийн төлөвт буцаан хувиргах 2000 шоо метрийн багтаамжтай байгууламж болон 12 километр хий дамжуулах шугам барихаар тусгасан байна. Хоёрдугаар шатанд дулааны станцын хүчин чадлыг 93 МВт-аас доошгүй хэмжээнд хүргэхээр төлөвлөжээ.

     Нийслэлийн Засаг даргын эрчим хүчний төсөл, хөтөлбөр хариуцсан зохицуулагч Ч.Батзориг “Уг төслийг Хан-Уул, Баянзүрх, Сонгинохайрхан дүүрэгт хэрэгжүүүлэхээр төлөвлөж байна. Тэрбээр төслийн техник, эдийн засгийн үндэслэл болон нийгмийн үр ашгийн судалгааг хийж, аюулгүй байдлын дүгнэлт гаргуулсан” хэмээн мэдэгдэв.

     Ажлын хэсгийн ахлагч Б.Золтуяа хөрөнгө оруулалтын зардлыг задалж танилцуулахыг хүсэж, байршилтай холбоотой эрсдэлийг дүгнэлтэд тусгах шаардлагатайг хэлэв. Тэрбээр дүгнэлтэд тусгах шаардлагатайг хэлэв. Тэрбээр төслийг төлөвлөсөн хугацаанд бүрэн дуусгах боломжид эргэлзэж буйгаа мөн илэрхийлжээ.

М.Сүндэр