Монголын Хараагүйчүүдийн үндэсний холбооны (МХҮХ) төлөөлөгчид 2026 оны арваннэгдүгээр сарын 11-ний өдөр Бүгд Найрамдах Хятад Ард Улсаас (БНХАУ) Монгол Улсад суугаа Элчин сайдын яамны байранд хүрэлцэн очиж, тус ЭСЯ-ны Улс төрийн газрын дарга Линь Хуй, Гуравдугаар нарийн бичгийн дарга Сон Зихао, атташе Чан Вэньжэ нартай цаашдын хамтын ажиллагааны чиглэлээр ажил хэрэгч, нөхөрсөг уулзалт хийлээ.

    Уулзалтын үеэр хоёр тал хөгжлийн бэрхшээлтэй иргэдийн эрхийг хангах, тэдний нийгмийн оролцоо, хөгжлийг дэмжих чиглэлээр санал солилцов. Энэ хүрээнд БНХАУ-ын Элчин сайдын яамны зүгээс харааны бэрхшээлтэй иргэдийн сурч боловсрох, хөгжих, мэдээлэл авах зэрэг суурь эрхийг бодитоор хангахад бүх талын дэмжлэг үзүүлж, хамтран ажиллахаа илэрхийллээ. Тухайлбал:  МХҮХ болон Хятадын Хараагүйчүүдийн Нийгэмлэг хоорондын шууд харилцаа, хамтын ажиллагааг холбож өргөжүүлэхээр боллоо.

   Сэргээн засалт болон харааны бэрхшээлтэй иргэдийн спортын орчин үеийн дэвшилтэт арга, технологийг нэвтрүүлэх, туршлага судлана. Хятадын уламжлалт бариа засал, алжаал тайлах массажийн чиглэлээр мэргэжлийн байгууллагуудтай холбох, мэдээлэл, туршлага солилцох зэрэг олон талт үйл ажиллагааг бүх талаар нь дэмжин ажиллах боломжтойгоо илэрхийллээ. Мөн 2026 оны арванхоёрдугаар сарын 12-17-ны өдрүүдэд Макао хотноо Макаогийн Сайн дурын нийгмийн үйлчилгээний холбооноос (AVSM) зохион байгуулахаар болов.

    "Сайн дурын ажилтны менежмент ба хүртээмжтэй үйлчилгээ" сэдэвт олон улсын сургалт, туршлага солилцох уулзалтад МХҮХ-ны төлөөлөгчид оролцох замын зардалд бодит хувь нэмэр оруулж, дэмжлэг үзүүлэхээ албан ёсоор илэрхийллээ. Энэхүү уулзалт нь харааны бэрхшээлтэй иргэдийн эрх, эрх чөлөөг дээдлэн хамгаалах, тэдний хөгжлийн тэгш боломжийг бүрдүүлэх чиглэлд хоёр орны байгууллагуудын хамтын ажиллагааг шинэ шатанд гаргасан чухал алхам боллоо.