Монгол Улсаас Япон Улсын Осака хотод суугаа Ерөнхий консул А.Дэлгэрмаа 2026 оны арваннэгдүгээр сарын 11-ний өдөр Осака хотын захирагч Ёкояма Хидэюкитэй албан ёсны уулзалт хийжээ. Уулзалтаар Монгол Улс, Япон Улсын орон нутгийн харилцаа, хамтын ажиллагааг өргөжүүлэх талаар ярилцсан байна. Мөн Осака хот болон Монгол Улсын хот, орон нутгийн хоорондын харилцааг хөгжүүлэх, худалдаа, эдийн засаг, соёл, боловсрол, аялал жуулчлалын салбарын хамтын ажиллагааг идэвхжүүлэх асуудлаар санал солилцжээ.

     Түүнчлэн 2027 онд тохиох Монгол Улс, Япон Улсын хооронд дипломат харилцаа тогтоосны 55 жилийн ой, Осака хот дахь Монгол Улсын Ерөнхий консулын газар байгуулагдсаны 15 жилийн ойн хүрээнд хамтран зохион байгуулах арга хэмжээ, хоёр талын харилцаа, хамтын ажиллагааг шинэ шатанд гаргах боломжийн талаар ярилцсан байна.

     Энэ үеэр Ерөнхий консул А.Дэлгэрмаа “Намрын баяр–Осака 2026” арга хэмжээг амжилттай зохион байгуулахад Осака хотын захиргаанаас дэмжлэг үзүүлж, хамтран ажилласанд талархал илэрхийлэв. Уг арга хэмжээ нь Монгол Улсын үндэсний соёл, уламжлал, өв соёлыг Япон Улсын иргэдэд сурталчлан таниулах, хоёр улсын иргэд хоорондын найрсаг харилцаа, харилцан ойлголцлыг бэхжүүлэхэд чухал ач холбогдолтой болсныг онцлов.

     Мөн Кансай бүс нутагт оршин суугаа монгол иргэдийн эрх, хууль ёсны ашиг сонирхлыг хамгаалах, иргэдэд чиглэсэн үйл ажиллагаанд Осака хотын захиргаатай хамтран ажиллах боломжийн талаар санал солилцжээ. Цаашид хоёр талын харилцаа, хамтын ажиллагааг өргөжүүлэн хөгжүүлэх, 2027 онд тохиох түүхэн ойг үр дүнтэй тэмдэглэн өнгөрүүлэхэд нягт хамтран ажиллахаар санал нэгдсэн байна.