Аймаг, дүүргийн олимпын зөвлөлийн удирдах ажилтны сургалт, семинар маргааш Дорнод аймагт эхэлнэ. Уг арга хэмжээнд оролцох төлөөлөгчид өнөөдөр Багануур дүүрэгт ажиллаж, "Багануур” ХК-ийн спортын үйл ажиллагаатай танилцлаа.Төлөөлөгчдийг Багануур дүүргийн "Скво Вэлли" Олимпын зөвлөлийн дарга, МҮОХ-ны гишүүн Я.Отгонбаатар хүлээн авч уулзан, компанийн биеийн тамир, спортын үйл ажиллагаа болон тамирчдаа дэмжих бодлогыг танилцуулсан юм.

    1978 онд байгуулагдсан “Багануур” ХК нь Монгол Улсын уул уурхайн салбарын томоохон компани бөгөөд жилд дунджаар 5 сая тонн хүрэн нүүрс олборлон төвийн бүсийн дулааны цахилгаан станцуудыг түлшээр хангаж, улсын эрчим хүчний аюулгүй байдлыг хангахад чухал үүрэг гүйцэтгэдэг. Тус компани 1100 орчим ажилтантайгаар үйл ажиллагаагаа явуулж байна.

    Нийгмийн хариуцлагынхаа хүрээнд “Багануур” ХК нь ажилтан, иргэд, хүүхэд залуучуудын дунд волейбол, сагсан бөмбөг зэрэг спортын нээлттэй тэмцээнүүдийг жил бүр уламжлал болгон зохион байгуулдаг. Мөн хөлбөмбөг, хоккейн багуудыг дэмжин ажиллаж, хүүхэд, залуучуудын спортын ур чадварыг хөгжүүлэх, эрүүл амьдралын хэв маягийг төлөвшүүлэхэд бодит хувь нэмэр оруулж байна.