Монгол Улсын шатрын Үндэсний шигшээ баг 2026 онд бүрэн бүрэлдэхүүнээрээ анхны олон улсын тэмцээнүүддээ оролцохоор эх орноосоо мордлоо. Энэ удаад манай тамирчдыг Франц Улсад зохион байгуулагдах “Dole Open”, Холбооны Бүгд Найрамдах Герман Улсад зохион байгуулагдах “Dortmund Open” зэрэг олон улсын өндөр зэрэглэлийн “FIDE Circuit” тэмцээнүүд хүлээж байна. Эдгээр тэмцээнүүд нь зөвхөн чансаа, цол ахиулах боломж төдийгүй, олон улсын шилдэг шатарчидтай хүч сорин, томоохон тэмцээний өмнөх үнэт туршлага хуримтлуулах чухал бэлтгэл юм.

    2026 оны улирлын оргил тэмцээн болох 46 дахь удаагийн дэлхийн шатрын олимпиад энэ есдүгээр сард Узбекистан Улсын Самарканд хотноо зохион байгуулагдах юм. Үндэсний шигшээ багийн хувьд энэ жилийн бэлтгэл бүхэлдээ олимпын мөчлөгт чиглэж байна. Тэмцээнд мордохын өмнө Монголын шатрын холбооны ерөнхий нарийн бичгийн дарга Ж.Амгалан, Удирдах зөвлөлийн гишүүн М.Гүнбаяр нар шигшээ багийг үдэн гаргав.

    Тэдэнд Монголын шатрын холбооны ерөнхийлөгч Г.Занданшатарын мэндчилгээ, захиасыг уламжиллаа. Мөн Монголын шатрын холбооны далбааг баг, тамирчдад ёслол төгөлдөр гардуулан өгч, эх орныхоо нэрийг өндөрт өргөж, амжилт бүтээлээр дүүрэн өрсөлдөхийг хүсэн ерөөв. Монголын нэрийг дэлхийн тавцанд өндөрт өргөж, эх орныхоо төлөө оюун ухаанаа сорих шигшээ багийн нийт тамирчид, дасгалжуулагч нартаа амжилтын дээдийг хүсэн ерөөв.