Олон улсын таеквондо-гийн Монголын холбооны ерөнхийлөгч Э. Галбадрахын 2026 оны долдугаар сарын 1-ний өдрийн тушаалаар холбооны үйл ажиллагааг бэхжүүлэх, Монгол Улсад олон улсын таеквондо-гийн спортыг хөгжүүлэх, төр, хувийн хэвшлийн хамтын ажиллагааг өргөжүүлэх, олон улсын хамтын ажиллагааг шинэ шатанд гаргах зорилгоор дараах томилгоог хийлээ.

   УИХ-ын Хурлын Байгаль орчин, хүнс, хөдөө аж ахуйн байнгын хорооны дарга, Монгол Улсын хүний гавьяат эмч Б. Бейсен, ДАШТ-ий хүрэл медальт, Монгол Улсын гавьяат тамирчин, Азийн наадмын аварга, Азийн хошой аварга, “Рио-2016” олимпын наадмын V байрын шагналт, мэргэжлийн боксын тамирчин Э. Цэндбаатар нарыг Олон улсын таеквондо-гийн Монголын холбооны дэд ерөнхийлөгчөөр тус тус томилсон байна.

    УИХ-ын гишүүн Б. Бейсен нь төрийн бодлого, хууль эрх зүйн орчныг боловсронгуй болгох, нийтийн биеийн тамир, спортын хөгжлийг дэмжих, хүүхэд, залуучуудын эрүүл, идэвхтэй амьдралын хэв маягийг төлөвшүүлэх чиглэлээр холбооны үйл ажиллагаанд бодлогын түвшинд дэмжлэг үзүүлэн ажиллах юм.

    Харин МУГТ Э. Цэндбаатар нь Монголын мэргэжлийн боксын нэрийг дэлхийн тавцанд өндөрт өргөж яваа шилдэг тамирчдын нэг бөгөөд мэргэжлийн бокст 15 тулаанд дараалан ялалт байгуулж, нэг ч ялагдалгүй (15:0) амжилтыг үзүүлээд байгаа билээ. Тэрбээр 2026 оны тавдугаар сард АНУ-д болсон тулаанд “WBC USA Silver Super Featherweight” бүсийн аварга болж, үүнээс өмнө “WBA Asia East, NABF Junior”, “WBA Asia, WBA Continental North American Gold”, “WBA Asia Centra”l зэрэг олон улсын нэр хүндтэй бүсүүдийг хүртсэн билээ.

    Тулааны спортын шилдэг тамирчны хувьд Э. Цэндбаатар нь өөрийн олон улсын туршлага, манлайллыг ашиглан хүүхэд, залуучуудыг спортоор хичээллэхийг дэмжих, тамирчдын ур чадвар, өрсөлдөх чадварыг дээшлүүлэх, Монголын тулааны спортын хамтын хөгжлийг бэхжүүлэх үйл хэрэгт онцгой хувь нэмэр оруулан ажиллах аж.

    Түүнчлэн 2026 оны наймдугаар сарын 3–9-ний өдрүүдэд Монгол Улсын Ерөнхий сайдын ивээл дор Улаанбаатар хотноо зохион байгуулагдах “ITF” таеквондо-гийн Ази тивийн XI удаагийн аварга шалгаруулах тэмцээнийг өндөр түвшинд зохион байгуулах бэлтгэл ажлын хүрээнд шинэ удирдлагын бүрэлдэхүүн идэвхтэй ажиллаж, Монгол Улсын нэр хүндийг олон улсын тавцанд өргөхөд бодит хувь нэмэр оруулах гэнэ.

    Энэхүү томилгоо нь Монгол Улсад Олон улсын таеквондо-гийн спортыг хөгжүүлэх, Үндэсний шигшээ багийн үйл ажиллагааг бэхжүүлэх, хүүхэд, залуучуудыг зөв төлөвшүүлэх, олон улсын хамтын ажиллагааг өргөжүүлэх, Монгол Улсад зохион байгуулагдах Азийн аварга шалгаруулах тэмцээнийг амжилттай зохион байгуулахад чухал ач холбогдолтой юм байна.