Киргизстан Улсад чөлөөт бөхийн насанд хүрэгчдийн "Бишкек-2026" Ази тивийн аварга шалгаруулах тэмцээн үргэлжилж байна. Азийн аваргын эмэгтэйчүүдийн   57 кг-ын жинд ДАШТ-ий мөнгөн медальт, Азийн аваргын мөнгөн медальт, ОУХМ Б.Хулан хүч сорив.

     Тэрбээр шигшээ барилдаанд Хятадын бөх, "Парис-2024" олимпын наадмын хүрэл, өнгөрсөн оны ДАШТ-ий хүрэл медальт, Азийн аваргын хүрэл медальт Хятадын Хун Кэшиньтэй барилдаад, оноогоор цэвэр ялагдлаа. Манай Б.Хулан 53 кг-аас жин өгсөн, 55 кг-ыг алгасан, Азийн аваргын 57 кг-ын жинд анх удаа барилдаж мөнгөн хүртэж байна.

     Б.Хулангийн босоо барилдаан үнэхээр сайн байсан хэдий ч, алтан медалийн төлөөх барилдаанд Хятадын бөх түүнтэй босоогоос барилдсангүй. Хөл авч, хэвтээ барилдаанаар илүүрхэн ялалт байгуулав. Б.Хулангийн хувьд ДАШТ, олимпын наадамд мөн л хөлдөө алдан, хэвтээ барилдаанаас олон оноо алдан ялагдаж байсан билээ. Хөлийн хамгаалалтаа сайжруулж чадаагүй байгаа нь түүний ялагдлын гол үндэс боллоо. Ингэснээр Б.Хулангийн хувьд, дөрвөн жилийн зайтай Ази тивийн аваргаас дахин мөнгөн медаль авч, Ази тивийн хошой мөнгөн медальтан болов.