Монгол Улсын Засгийн газрын 2026 оны гуравдугаар сарын 11-ний өдрийн хурлаар манай улсад 2026 онд зохион байгуулах олон улс, тив, дэлхийн зэрэглэлийн тэмцээний асуудлыг хэлэлцэн найман спортын төрлөөр явуулахаар шийдвэр гаргалаа. Биеийн тамир спортын хуулийн есдүгээр зүйлийн 9.1.3 дахь заалтын дагуу тухайн жилд Монгол Улсад зохион байгуулах олон улс, тив дэлхийн аварга шалгаруулах тэмцээн, наадмын жагсаалтыг Засгийн газар баталдаг журамтай.

     Энэ 2026 онд Монгол Улсад зохион байгуулахаар 20 спортын холбооноос 29 тэмцээнийг санал болгосноос хоёр шатны сонгон шалгаруулалтын дараа олимпын эрхийн оноо олгох дөрөв, дэлхийн чансаа тогтоох нэг, дэлхийн цомын эрх олгох нэг, олон улс, тивийн зэрэглэлийн хоёр нийт найман тэмцээнийг улсын төсвийн хөрөнгөөр явуулахаар боллоо.

      Монгол улсад 2026 онд зохион байгуулагдах олон улс, тив, дэлхийн аварга шалгаруулах тэмцээнүүд:

1. Ази тивийн аварга шалгаруулах боксын насанд хүрэгчдийн тэмцээн нь Монгол Улсад анх 2007 онд эрэгтэй, 2012 онд эмэгтэй төрөлд зохион байгуулагдаж байсан бол энэ удаа Улаанбаатар хотноо эрэгтэй, эмэгтэй төрлөөр “Аса арена”-д 2026 оны гуравдугаар сарын 28-наас дөрөвдүгээр сарын 11-ний өдрүүдэд болно.

2. Ази тивийн аварга шалгаруулах таэквондо-гийн насанд хүрэгчдийн XXVII тэмцээн (пүмсэ болон пара спортын ангилалтай) Монгол Улсад анх удаа гурван төрлөөр нэгэн зэрэг 2026 оны тавдугаар сарын 19-25-ны өдрүүдэд “М банк арена”-д зохион байгуулагдана.

3. Ази тивийн аварга шалгаруулах шатрын насанд хүрэгчдийн тэмцээн Монгол Улсад анх удаагаа 2026 оны тавдугаар сарын 28-наас зургадугаар сарын 7-ны өдрүүдэд “Улаанбаатар” зочид буудлын цогцолборт явагдана.

4. Олон улсын чөлөөт бөхийн дэлхийн чансаа олгох “Улаанбаатар-Опен” тэмцээн нь 2025 онд Монгол Улсад анх удаа зохион байгуулагдаж байсан бол энэ жил хоёр дахь удаагаа дэлхийн бөхийн холбооны цуврал тэмцээний хэлбэрээр 2026 оны зургадугаар сарын 4-7-ны өдрүүдэд  “Буянт-Ухаа” спортын ордонд болно.

5. Дэлхийн гран при сагсан бөмбөгийн 3x3 эмэгтэйчүүдийн цуврал тэмцээн нь 2026 оны зургадугаар сарын 19-20-ны өдрүүдэд Сүхбаатарын талбайд болно. Олон улсын сагсан бөмбөгийн холбооны энэхүү цуврал тэмцээнээс шалгарсан багууд дэлхийн цомын аварга шалгаруулах тэмцээнд оролцох эрх авна.

6. Дэлхийн “Их дуулга” жүдо бөхийн “Улаанбаатар-2026” тэмцээн нь Монгол Улсад 2019 оноос эхлэн зохион байгуулагдаж ирсэн. Энэ удаа 2026 оны зургадугаар сарын 27-29-ний өдрүүдэд “Буянт-Ухаа” спортын ордонд болно. Энэхүү тэмцээн нь олимпын эрхийн оноо олгох Олон улсын жүдо бөхийн холбооны албан ёсны цуврал тэмцээн юм.

7. Азийн зүүн бүсийн эрэгтэйчүүдийн волейболын аварга шалгаруулах тэмцээн нь 2026 оны наймдугаар сарын 5-9-ний өдрүүдэд “Буянт-Ухаа” спортын ордонд зохиогдоно. Энэхүү тэмцээн нь 2015, 2017 онд Монгол Улсад зохион байгуулагдаж байсан.

8. “Counter strike 2” е-спортын шилдэг багуудын олон улсын тэмцээн нь Монгол Улсад анх удаа 2026 оны арванхоёрдугаар сард явагдахаар боллоо. Энэхүү цахим спортын шилдэг найман багийн тэмцээнийг дэлхийн хоёр тэрбум үзэгчид онлайнаар үзнэ.

     Дээрх тэмцээнүүд 2026 онд Улаанбаатар хотноо зохион байгуулагдсанаар улсын эдийн засагт зохих нөлөө үзүүлэх ба тээврийн салбарт дөрвөн тэрбум, зочид буудалд 1.6 тэрбум, худалдаа үйлчилгээнд 1.1 тэрбум төгрөгийн үр өгөөж өгөх эдийн засагчдын тооцоолол байна.

    Түүнчлэн олон улс, тив, дэлхийн аварга шалгаруулах тэмцээнийг Монгол Улсад зохион байгуулснаар манай улсын олон улсын нэр хүнд өсөж, гадаад харилцаа, хамтын ажиллагаа бэхжинэ. Олон тооны зочид төлөөлөгчид, баг тамирчдыг хүлээн авч аялал жуулчлал болон үйлчилгээний салбарын идэвхжилийг нэмэгдүүлж, эдийн засагт эерэг нөлөө үзүүлэх юм.

      Мөн манай тамирчид олон улсын түвшний өрсөлдөгч нартайгаа эх орныхоо дэвжээн дээр өрсөлдөх боломжтой болж, гадаадад явж зардал гаргахгүй болж, залуучууд, тамирчдын спортын идэвх, оролцоо нэмэгдэхийн зэрэгцээ дасгалжуулагч, шүүгч, зохион байгуулагч мэргэжилтнүүдийн мэдлэг, ур чадвар, менежментийн туршлага дээшилнэ.

      Өнгөрсөн 2025 онд Монгол Улсын Засгийн газрын 243 дугаар тогтоолоор олон улс, тив, дэлхийн чанартай найман тэмцээнийг эх орондоо зохион байгуулж, улсын төсвөөс 2.8 тэрбум төгрөгийн дэмжлэг үзүүлсэн бөгөөд дээрх тэмцээнүүдэд 117 орны 2,786 тамирчин, 121 дасгалжуулагч, 128 шүүгч, 167 албаны хүн, гадаадын 968 дэмжигч нар манай улсад зочлон ирж, галт тэрэг болон үндэсний авиа компанид дөрвөн тэрбум, зочид буудалд 1.2 тэрбум, худалдаа болон үйлчилгээний салбарт 582 сая төгрөг, нийтдээ 5.6 тэрбум төгрөгийн орлого оруулсан статистик тооцоо, судалгаа гарсан юм.