МҮОХ-ны дэргэдэх Жендэрийн комисс нь олон улсын эмэгтэйчүүдийн эрхийг хамгаалах өдрийг тохиолдуулан “Олимпик хаус”-т хуралдаж, спортын салбар дахь эмэгтэйчүүдийн оролцоог нэмэгдүүлэх, олон улсын төсөл хөтөлбөр хэрэгжүүлэх боломж болон цаашдын үйл ажиллагааны талаар хэлэлцлээ.

    ОУОХ-ны гишүүн, МҮОХ-ны ерөнхийлөгч Б.Баттүшиг тэргүүтэй МҮОХ-ны удирдлагууд хүндэт зочноор оролцсон бөгөөд ерөнхийлөгч Б. Баттүшиг нээж үг хэлэхдээ олимпын хөдөлгөөнд жендэрийн тэгш байдлыг хангах чиглэлд хийгдэж буй бодит өөрчлөлтүүдийн талаар онцлон дурдав. Үүнд ОУОХ-ны жендэрийн тэгш байдлын бодлогын хүрээнд МҮОХ-ны дүрэмд нэмэлт, өөрчлөлт оруулж, удирдах түвшинд эмэгтэйчүүдийн оролцоог нэмэгдүүлснийг тэмдэглэсэн юм.

    МҮОХ-ны Гүйцэтгэх зөвлөлд хоёр эмэгтэй гишүүн ажиллаж байгаа бөгөөд ОУОХ болон АОЗ-ийн ивээл дор зохиогдож буй олимп, тивийн наадамд оролцох Монголын багийн ахлагчаар эмэгтэй төлөөлөгчид ажиллаж байна. Түүнчлэн Тамирчдын комиссын даргаар анх удаа эмэгтэй хүн сонгогдсон нь олимпын хөдөлгөөн дэх эмэгтэйчүүдийн манлайллыг нэмэгдүүлэх чухал алхам болсныг дурдлаа.

    Хурлын үеэр төсөл боловсруулалтын аргачлал болон спортын маркетингийн судалгааны чиглэлээр салбарын мэргэжилтнүүд мэдээлэл өгсөнөөс гадна спортын салбар дахь жендэрийн тэгш оролцооны өнөөгийн нөхцөл байдлын талаар танилцууллаа. Уулзалтад оролцсон гишүүд үйл ажиллагаанд идэвхтэй оролцохоо илэрхийлж, цаашид хэрэгжүүлэх үйл ажиллагааны үндсэн чиглэлүүдийг хэлэлцэв.

     МҮОХ-ны дэргэд үйл ажиллагааг дэмжих чиглэлээр 10 гаруй комисс ажилладаг бөгөөд комиссууд нь спортын холбоод, тамирчид, дасгалжуулагчид, шүүгчид зэрэг олимпын хөдөлгөөний оролцогч талуудын хоорондын уялдаа холбоог хангах, бодлого, үйл ажиллагааг дэмжих чиглэлээр ажилладаг юм.