Монгол Улсын Ерөнхий сайд Г.Занданшатар “Ган үйлдвэрлэлийн цогцолбор” байгуулах ажлыг эрчимжүүлж, цэгцлэх зорилгоор өчигдөр хоёрдугаар сарын 13-ны өдөр “Дарханы төмөрлөгийн үйлдвэр”-т ажиллалаа.

  "Дарханы төмөрлөгийн үйлдвэр” ХХК 12.6 сая тонн нөөцтэй Хуст уулын ордыг эдийн засгийн эргэлтэд оруулж, түүхий эдийн тогтвортой эх үүсвэрийг бүрдүүлэхээр төлөвлөж байна. Уг орд нь “Ган үйлдвэрлэлийн цогцолбор” төслийн түүхий эдийн хэрэгцээг хангах стратегийн ач холбогдолтой юм.

  Төслийн урьдчилсан ТЭЗҮ-ийг эцэслэн боловсруулж, хөрөнгө оруулагчдад мэдээлэл хүргүүлэх, нээлттэй сонгон шалгаруулах ажлыг эрчимжүүлэхийг холбогдох албаныханд даалгав. Мөн цогцолбор байгуулах газрыг яаралтай тусгай хэрэгцээнд авахыг Дархан-Уул аймгийн удирдлагуудад үүрэг болгов. Төслийн үр дүнд 1200 ажлын байр бий болох юм.

  Ерөнхий сайд Г.Занданшатар хайгуул, судалгааны ажлыг эрчимжүүлж, нөөц нэмэгдүүлэх, орон нутгийн удирдлагуудад гангийн цогцолбор байгуулах газрыг тусгай хэрэгцээнд авахыг үүрэг болголоо.

  “Дарханы төмөрлөгийн үйлдвэр” ХХК 2025 онд ган бүтээгдэхүүний үйлдвэрлэлийг 33.0 мянган тонн байхаар төлөвлөснөөс 33.6 мянган тонныг үйлдвэрлэж, 102 хувийн гүйцэтгэлтэй ажиллажээ. Уул уурхайн олборлолтын хэмжээ 2024 онтой харьцуулахад 1.3 сая тонноор өссөн байна.