Монголын волейболын холбооны Үндэсний дээд лигийн 2022-2023 оны  “MVP” буюу “Үнэ цэнтэй тоглогч”, “Шилдэг довтлогч”, “Хашхан Өвөрхангай” багийн өндрийн довтлогч, ОУХМ, Ган-Очирын Хонгорзултай ярилцлаа. Түүний хувьд 2019, 2021 оны Үндэсний дээд лигийн тоглолтод оролцож хос мөнгөн медаль хүртсэн туршлагатай тамирчин юм.   Тэрбээр Монголын волейболын холбооны Үндэсний дээд лигийн хоёр удаагийн аварга болж байсан. Мөн  дээд лигийн хоёр мөнгө, хүрэл медальтай.  Нэг удаа дээд лигийн “Үнэ цэнтэй тоглогч”-ийн “MVP” шагналыг хүртсэн. Нэг удаа “Шилдэг довтлогч” болж байсан билээ.  Г.Хонгорзул “Холбооны цом”-ын тэмцээнд түрүүлж, залуучуудын УАШТ-д гурван удаа түрүүлж байв. Ази тивийн аварга болон 2016 онд зохиогдсон Зүүн Азийн аварга шалгаруулах тэмцээнд Үндэсний шигшээ багийн бүрэлдэхүүнд багтан тоглож байлаа.

–Үндэсний дээд лигийн “Өвөрхангай Хашхан” багт тоглож байгаа уу?

       -“ Хашхан-Өвөрхангай” багт зөвхөн 2025-2026 оны энэ улиралд тоглохоор орсон. Лиг эхлэхээс арав хоногийн өмнө шийдээд “Хашхан” багтайгаа нэгдсэн.

 -“Хашхан” багт тоглохоос өмнө ямар багуудад тоглож байсан бэ?

       -“Хашхан” багаас өмнө 2010-2017 онуудад “Enacoree” багт, 2019-2021 онуудад “Hobby Ace” багт, 2022 оноос 2025 оны хоёрдугаар сар хүртэл “Хөвсгөл-Эрчим” багт тус тус тоглож байсан.

-Танай баг 2025-2026 оны дээд лигийн тэмцээнд одоогоор хэдэн тоглолт хийж, хэдэн хожилтой явж байгаа вэ?

     -“Хашхан-Өвөрхангай” баг маань 2025-2026 оны улиралд дээд лигт V байрт орсон үзүүлэлтэй лигийг өндөрлүүлсэн байгаа.

-Миний дүү өөрийгөө манай уншигчдад танилцуулахгүй юу?

    -Намайг Ган-Очирын Хонгорзул гэдэг. Волейболын спортын Олон улсын хэмжээний мастер цолтой. Айлын том охин. Доороо хоёр дүүтэй. Одоо нөхөр, охины хамт амьдардаг.

-Аль аймаг, хотод төрж, өссөн хүүхэд вэ?

      -Би Улаанбаатар хотод төрсөн. Сүхбаатар аймгийн Мөнххаан суманд өссөн. Харин 14 настайдаа Улаанбаатар хотод ирж, “Enacoree” клубт нэгдэж волейболын спортоор тууштай хичээллэж эхэлсэн.

-Бага нас нь Мөнххаан суманд өнгөрсөн юм уу?

     -Тийм ээ, бага, балчир насандаа Сүхбаатар аймгийн Мөнххаан суманд аав, ээжтэйгээ амьдарч байсан. Харин өсвөр үе 14 наснаасаа хойш Улаанбаатар хотын “Enacoree” багийн эгч нартайгаа цуг амьдарч өссөн.

-Яагаад бусад спортоос илүүтэйгээр волейболын спортыг сонирхон хичээллэх болов?

     -Би суманд өссөн хүүхэд. Сумын төвд спортын олон төрөл хичээллэдэггүй байсан. Манай суманд шинэ багш ирээд волейболын дугуйлан хичээллүүлж эхэлсэн юм. Аав маань намайг тавдугаар ангид байхад тэр багшийн секцэнд оруулж өгсөн. Өөр төрлийн сонголт гэхээр бөхийн спорт л байлаа. Эмэгтэй хүнд арай цэвэрхэн, “Дэмий гонзгой” болохгүй гээд л волейболын спортыг анх сонгож хичээллэж байсан даа.

 -Волейболын спортоор хэд дэх жилдээ хичээллэж байгаа вэ?

      -Би ерөнхий боловсролын дунд сургуулийн тавдугаар ангид байх үеэс хойш волейболоор хичээллэсэн гэхээр 20 жил болж байгаа юм байна. Гэхдээ дунд сургуулийн секц долоо хоногт 2-3 удаа л алдаг, оног ордог. Заал, танхим зарим үед олдохгүй байдаг байлаа. Харин 2010 оноос хойш яг тууштай өдөр бүр тасралтгүй хичээллэсэн.

-Багийнхаа довтлогч, холбогч, хамгаалалтын ямар байрлал дээр тоглодог вэ?

      -Би багийнхаа өндрийн довтолгооны байрлал дээр тоглодог. Гэхдээ өндрийн довтолгооны тоглогч гээд холбогч, хамгаалалтад оролцохгүй гэсэн үг биш. Бүх байрлал дээр шаардлагатай үед тоглоно.

-Волейболын спортын анхны багш нь хэн бэ?

      -Надад волейболын спортын суурийг тавьж өгсөн хүн бол Дорнод аймгийн уугуул, спортын мастер Цэдэн-Ишийн Наранхүү гэдэг багш байгаа. Багш маань одоо Сүхбаатар аймгийн ерөнхий боловсролын 4-р дунд сургуульд багшилж, “SB- Alpha” гэдэг волейболын сургалт хичээллүүлдэг.

 -Волейболын спортын чухам юу нь чамд илүүтэйгээр таалагдсан бэ?

     -Тоглолтын үед өөрийн талбай дээр нэг ч бөмбөг унагахгүй байхын төлөө багийн бүх гишүүд нэг зорилготойгоор нэгдэн, хичээж, эцсийн хүчээ шавхан тэмцэж байгаа нь таалагддаг. Би волейболын спортоос өөрөөсөө илүүтэйгээр бусдыг бодох хүмүүжлийг олж авсан. Бусдад туслах, бусдын төлөө тэмцэж л сурдаг даа.

-Волейболоор хичээллэж байхад тань шантарч, мохох үе гарч байсан уу?

      -Шантарч, мохох үе өсвөр насанд гэрээсээ хол, аав, ээжээсээ тусдаа амьдарч, хичээллэж байх үед л гардаг байсан. Жаахан хүүхэд болохоор гэрээ санах гэх мэтэд л шантарна. Харин бэлтгэл, сургуулилалтаас бол шантарч, мохож байгаагүй. Дуртай сонирхолтой зүйл маань волейбол болохоор тийм бодол төрдөггүй.

-Волейболын спортоор хичээллэсэн үеэс хойших томоохон амжилтууддаа сонирхуулахгүй юу?

    -Монголын волейболын холбооны Үндэсний дээд лигийн хоёр удаагийн аварга болж байсан. Мөн  дээд лигийн хоёр мөнгө, хүрэл медальтай.  Нэг удаа дээд лигийн “Үнэ цэнтэй тоглогч”-ийн “MVP” шагналыг хүртсэн. Нэг удаа “Шилдэг довтлогч” болж байсан.

-Сэтгэлд тань хоногшин үлдсэн хамгийн өрсөлдөөнтэй дурсамж үлдээсэн сайхан тоглолтыг хэзээ хийж байсан бэ?

      -Ер нь тоглолт бүр л өрсөлдөөнтэй байдаг л даа. Гэхдээ “Hobby Ace” багтайгаа хоёр удаа үндэсний дээд лигийн  мөнгөн медаль авч байсан. Дараа жил нь “Хөвсгөл-Эрчим” багтайгаа анх удаа Үндэсний дээд лигийн аваргын төлөө өрсөлдсөн. Тэр таван тоглолт маш ширүүн өрсөлдөөнтэй болсон. Манай баг 2:0-ийн харьцаагаар хожигдож яваад эргэн, ирэлт хийж дараалан гурав хожил авч, 3:2-оор ялалт байгуулсан. Тэр тоглолт хэзээ ч мартагдашгүй тоглолт, адал явдалтай жаргалтай дурсамжтай санагддаг.

-Амралт, чөлөөт цагаар юу хийх дуртай вэ?

      -Амралт, чөлөөт цаг гарвал аль болохоор гэр бүлээрээ аялах, амрах дуртай.

-2026 онд оролцох ямар томоохон тэмцээнүүд хүлээж байгаа вэ?

     -2026 онд оролцох тэмцээнүүдийн тов одоогоор баттай гараагүй байна. Миний хувьд аль нэг багт тогтвор суурьшилтайгаар хараахан харьяалагдаагүй байгаа. Боломжийн гоё санал ирвэл тоглоно.