Монгол Улсын гавьяат тамирчин,  Ж.Даваажав агсны нэрэмжит бөхийн чөлөөт барилдааны 2026 оны насанд хүрэгчдийн  УАШТ нэгдүгээр сарын 9-11-ний өдрүүдэд явагдаж өндөрлөсөн билээ. Насан үрэгчдийн УАШТ-ий эмэгтэйчүүдийн 50 кг-ын жинд хүрэл медаль хүртсэн,  “Алдар” спорт хороо, Баянгол дүүрэг, “Аваргууд” академийн 18 настай залуу тамирчин, Отгонбаатарын Гансувдтай ярилцлаа. Тэрбээр чөлөөт бөхийн өсвөр үеийн улсын аварга шалгаруулах “U15”, “U17”, “U20”-д амжилттай барилдаж алт, мөнгө, хүрэл медаль хүртэж байсан. Мөн өсвөрийн “U17” ангиллын Азийн аварга шалгаруулах тэмцээнд V байрт шалгарч байв.  Олон улсын хүүхдийн наадам, Монголын бүх ард түмний зуны спортын их наадам, насанд хүрэгчдийн УАШТ-ээс хүрэл медаль хүртэж байсан.

-Насанд хүрэгчдийн УАШТ-д анх удаа оролцоод хүрэл медаль хүртсэнд баяр хүргэе.

     -Сайн байна уу. Танд баярлалаа.

-УАШТ-д хэдэн тойрог барилдаан хийсэн бэ?

       -Чөлөөт бөхийн 2026 оны насанд хүрэгчдийн улсын аварга шалгаруулах тэмцээнд энэ жил анх удаа медаль хүртсэндээ баяртай байгаа. УАШТ-д гурван тойргийн барилдаан хийсэн.

-Хамгийн хүнд, ширүүн барилдааныг хэнтэй хийв?

     -“Хантайшир” дэвжээний тамирчин Б.Сувд-Эрдэнэ эгчтэй хийсэн медалийн төлөөх барилдаан хамгийн чанга нь байсан. УАШТ-ий медаль төлөөх барилдаан болохоор аргагүй байх. Ялагдсан нь медальгүй хоцрох, ялсан нь УАШТ-ээс медаль хүртэх хариуцлагатай барилдаан байлаа.

-Цаашид 50 кг-ын жинд тогтож барилдах боломж бий юу?

    -Тийм ээ, цаашид 50 кг-ын жиндээ тогтож барилдах бодолтой байгаа. Энэ жинд тив, дэлхий олимпын  медальтан болохын төлөө зүтгэнэ дээ.

-Миний дүү өөрийгөө манай уншигчдад танилцуулахгүй юу?

     -Намайг Отгонбаатарын Гансувд гэдэг. Батлан хамгаалах яам, зэвсэгт хүчний “Алдар” спорт хорооны тамирчин.

-Аль аймаг, хотод төрж, өссөн хүүхэд вэ?

      -Би Говь-Алтай аймгийн Цогт сумын Баян-Өндөр багийн Урд шанд гэдэг газар төрсөн. Намайг аав маань эх барьж авсан гэдэг. Их ховорхон дохиолдол шүү. Аав маань намайг хүний орчлонд ирэхэд минь эх барьж авсанд би их баярлаж, талархаж явдаг.

 -Бага нас нь хаана өнгөрөв?

      -Бага насаа аав, ээжтэйгээ хамт хөдөө өнгөрөөсөн.

-Айлын хэд дэх хүүхэд вэ?

     -Би айлын гурав дахь хүүхэд. Дээрээ хоёр ахтай. Доороо нэг охин дүүтэй.

 -Танай гэр бүлд, өөрөөс чинь өөр спортоор хичээллэдэг хүн бий юу?

       -Том ах маань ерөнхий боловсролын дунд сургуулийн сурагч байхдаа жүдо бөхөөр барилддаг байсан.

-Чөлөөт бөхөөр хичээллэхээс өмнө өөр спортын төрлөөр хичээллэж байсан уу?

     -Би том ахыгаа дагаад жүдо бөхийн секцэнд орж байсан. Жүдогоор нэг  сар бэлтгэл хийгээд больсон.

-Багадаа хэр хөдөлгөөнтэй охин байсан бэ?

     -Ер нь их хөдөлгөөнтэй, гүйж, дэгдэж явдаг, сахилгагүй  талдаа хүүхэд байсан гэж аав маань ярьдаг шүү.

 -Чөлөөт бөхийн спортоор хэд дэх жилдээ хичээллэж байгаа вэ?

     -Чөлөөт бөхийн спортыг сонгож хичээллээд дөрөв дэх жилдээ орж байгаа.

–Спортын ямар зэрэг цолтой вэ?

      -Би чөлөөт бөхөөр хичээллээд удаагүй байгаа залуу тамирчин болохоор одоогоор спортын цол, зэрэг аваагүй байгаа.

 -Чөлөөт бөхийн анхны багш нь хэн бэ?

       -Миний хамгийн анхны багш гэвэл “Аав шиг минь түгшигтэй” Алтанхуяг, ОУХМ Магвандорж гэдэг хоёр хүн бий.

–Одоо бэлтгэлээ “Аваргууд” академийн хэн багшийн удирдлага дор хийж байгаа вэ?

    -Би Батлан хамгаалах яамны зэвсэгт хүчний “Алдар” спорт хороон дээр МУГД Цэрэнбаатарын Хосбаяр, МУГТ Бадрахын Одончимэг, МУГТ Ганзоригийн Мандахнаран багш нарын удирдлага дор  бэлтгэл сургуулилалтаа хийдэг.  Сая насанд хүрэгчдийн УАШТ-д манай 50 кг-ын жинд “Алдар”-аас  олон эгч нар барилдахаар болсон. Тэгээд л намайг МУГТ Цэрэнбаатарын  Цогтбаяр багшийн “Аваргууд” академиас оруулсан юм.

-Яагаад бусад спортоос илүүтэйгээр бөхийн спортыг сонирхон хичээллэх болов?

    -Манай аавын талд нэлээн сайн бөхчүүд байсан гэж сонсож байсан. Харин аав маань намайг барилд гэж зөвлөж байгаагүй. Өөрийнхөө удам судрын бөхийн түүхийг сонсоод, тэр цагаас хойш барилдах сонирхолтой болсон.

 -Чөлөөт бөхөөр хичээллэж байхад тань шантарч, мохох үе гарч байсан уу?

     -Шантарч, мохох үетэй зөндөө тулгарч байсан. Тэр бүхнийг давж туулан гарч чадсандаа баяртай байдаг шүү.

-Сайн хийдэг гаршсан ямар дархан мэхтэй вэ?

     -Босоо барилдаанаас хөлд алдалж орох, давхар хамах мэхийг сайн хийж сурах гэж хичээж байгаа.

-Чөлөөт бөхийн спортоор хичээллэсэн үеэс хойших томоохон амжилтууддаа сонирхуулахгүй юу?

    -Өсвөр үеийн улсын аварга шалгаруулах “U15”, “U17”, “U20”-д амжилттай барилдаж алт, мөнгө, хүрэл медаль хүртэж байсан. Мөн өсвөрийн “U17” ангиллын Азийн аварга шалгаруулах тэмцээнд V байрт шалгарч байлаа.  Олон улсын хүүхдийн наадам, Монголын бүх ард түмний зуны спортын их наадам, насанд хүрэгчдийн УАШТ-ий хүрэл медаль хүртэж байсан.

-Сэтгэлд тань хоногшин үлдсэн хамгийн өрсөлдөөнтэй дурсамж үлдээсэн ямар барилдаан байдаг вэ?

    -Хамгийн анх чөлөөт бөхийн аймгийн аварга шалгаруулах тэмцээнээс медаль хүртсэн нь дурсамжтай санагддаг. Тэр тэмцээний анхны медаль  сэтгэл зүрхэнд ойрхон хоногшин үлдсэн байдаг.

-Амралт, чөлөөт цагаар юу хийх дуртай вэ?

     -Амралт, чөлөөт цагаараа ууланд алхах, ном унших дуртай. Мөн гэр бүлдээ цаг заваа түлхүү гаргахыг хичээдэг.

 -Цаашдын зорилго, хүсэл мөрөөдөл гэвэл?

      -Мэдээж тамирчин хүний туйлын зорилго олимп, тив, дэлхийн медаль байдаг. Тийм болохоор олимпын гурван жилийн циклд амжилттай барилдахыг хичээнэ.