“Москва-1980” олимпын наадмын мөнгөн медальт, Монгол Улсын гавьяат тамирчин, Жамцыг Даваажав агсны нэрэмжит сонгомол болон чөлөөт бөхийн УАШТ өнөөдөр дөрөв дэх өдрөө үргэлжилнэ. УАШТ-ий эхний өдөр сонгомол барилдааны аваргууд тодорсон. Харин  чөлөөт бөхийн  насанд хүрэгчдийн 2026 оны УАШТ өчигдөр хоёр дахь өдрөө үргэлжилсэн. Өчигдөр эрэгтэйчүүдийн 70, 74, 79, 86 кг, эмэгтэйчүүдийн 50, 55, 57, 68 кг-ын жингийн аваргууд тодорсон. Нэгдүгээр сарын 11-ний ням гарагт  УАШТ-ий сүүлийн өдрийн барилдаанууд явагдаж өндөрлөнө.  Өнөөдөр  эрэгтэйчүүдийн 92, 97, 125 кг, эмэгтэйчүүдийн 59, 65, 72 кг-ын жингийн барилдаанууд явагдана.

Т.ТУЛГА ГАВЬЯАТ ТАВ ДАХЬ ТҮРҮҮГЭЭ АВЛАА

    Чөлөөт бөхийн насанд хүрэгчдийн 2026 оны УАШТ-ий эрэгтэйчүүдийн 70 кг-ын жинд "Хүч" спорт хорооны бөх, ДАШТ-ий мөнгө, хүрэл медальт, Азийн наадмын аварга, МУГТ Т.Тулга бүх өрсөлдөгчөө цэвэр ялж, түүртэлгүй түрүүллээ. Тэрбээр Монгол Улсын аваргад тав дахь удаагаа түрүүлэв. Мөнгөн медалийг "Байдрагийн хүчтэн" дэвжээний тамирчин П.Мөнх-Эрдэнэ хүртлээ. Өнгөрсөн 2025 оны УАШТ-ий үзүүр бөх Б.Өсөхбаяр болон мөн УАШТ-ий мөнгөн медальтай С.Билгүүн нар хүрэл медаль хүртэв.

Эрэгтэйчүүдийн 70 кг-ын дүн:

1. Т.Тулга (Хүч)

2. П.Мөнх-Эрдэнэ (Байдрагийн хүчтэн)

3. Б.Өсөхбаяр (Аварга)

3. С.Билгүүн (Хилчин)

50 КГ-Д Б.МӨНХНАР ХОЁР ДАХЬ ЖИЛЭЭ ДАРААЛАН ТҮРҮҮЛЭВ

    Азийн аваргын хүрэл медальт Б.Мөнхнар, өсвөр үе болон залуучууд, “U23” ангиллын ДАШТ-ий хүрэл медальт М.Мөнхгэрэл нар УАШТ-ий 50 кг-ын жинд гурав дахь жилээ дараалан түрүү булаалдсан. ОУХМ Б.Мөнхнар сүүлийн хоёр жил дараалан, М.Мөнхгэрэлийг яллаа. Энэ жингийн хүрэл медалийг Баянгол дүүргийн "Аваргууд" академийн тамирчин О.Гансувд, "Байдрагийн хүчтэн" дэвжээний бөх М.Пүрэвтунгалаг нар гардсан юм.

Эмэгтэйчүүдийн 50 кг-ын дүн:

1. Б.Мөнхнар (Алдар)

2. М.Мөнхгэрэл (Оргил клуб, Приус центр)

3. О.Гансувд (Баянгол дүүрэг “Аваргууд” академи)

3. М.Пүрэвтунгалаг (Байдрагийн хүчтэн)

О.АРИУНЗАЯА ЭМЭГТЭЙЧҮҮДИЙН  55 КГ-ЫН АВАРГААР ТОДОРЛОО

    УАШТ-ий эмэгтэйчүүдийн 55 кг-ын жингийн аваргаар “Аварга” сургуулийн тамирчин О.Ариунзаяа тодорлоо. Тэрбээр насанд хүрэгчдийн УАШТ-д дөрөв дэхээ зодоглож анхны түрүүгээ хүртэв. Тус жингийн мөнгөн медалийг "Хантайшир" дэвжээний бөх Т.Баяржаргал хүртсэн бол хүрэл медалийг “Хангай хайрхан уул” дэвжээний бөх Б.Чимгээ, Баянгол дүүрэг “Аваргууд академи”-ийн бөх Ц.Одончимэг нар гардан авлаа.

Эмэгтэйчүүдийн 55 кг-ын дүн:

1. О.Ариунзаяа (Аварга)

2. Т.Баяржаргал (Хантайшир)

3. Б.Чимгээ (Хангай хайрхан уул)

3. Ц.Одончимэг (Баянгол дүүрэг “Аваргууд” академи)

Б.ХУЛАНГИЙН ГУРАВ ДАХЬ ТҮРҮҮ

    Чөлөөт бөхийн насанд хүрэгчдийн 2026 оны УАШТ-ий эмэгтэйчүүдийн 57 кг-ын жинд ДАШТ болон Ази тивийн аваргын мөнгөн медальт, ОУХМ Батхуягийн Хулан бүх өрсөлдөгчөө цэвэр яллаа. Энэ нь түүний Улсын аваргаас авч буй гурав дахь түрүү юм.  Харин 19 настай Ү.Мөнхчимэгийн тухайд, насанд хүрэгчдийн УАШТ-д анх удаа финалдаж, мөнгөн медальтан боллоо. Энэ жингийн хүрэл медалийг "Тэх Мөнх" клубийн бөх М.Рэнцэнханд, Баянгол дүүрэг "Аваргууд" академийн тамирчин Б.Үүрийнцолмон нар хүртсэн.

Эмэгтэйчүүдийн 57 кг-ын дүн:

1. Б.Хулан (Аврагч)

2. Ү.Мөнхчимэг (Төв Арж)

3. М.Рэнцэнханд (Тэх Мөнх)

3. Б.Үүрийнцолмон (Баянгол дүүрэг "Аваргууд" академи)

Э.ДЭЛГЭРМАА УЛСЫН ТАВАН УДААГИЙН АВАРГА БОЛЛОО

    2026 оны насанд хүрэгчдийн УАШТ-ий эмэгтэйчүүдийн 68 кг-ын жинд “Хүч” спорт хорооны бөх, ДАШТ-ий мөнгө, Азийн наадмын хүрэл медальт, ОУХМ Э.Дэлгэрмаа тав дахь удаагаа түрүүлж, аваргаа дархлав. Мөнгөн медалийг “Алдар” спорт хорооны бөх, ДАШТ-ий хүрэл, Ази тивийн аваргын хошой мөнгөн медальт, улсын хошой аварга, ОУХМ Т.Энхжин гардаж, хүрэл медалийг “Дархан Хасу FOHOW” клубийн тамирчин, “U23” ангиллын Азийн аваргын хүрэл, улсын хошой мөнгөн медальт Б.Ганцэцэг хүртлээ.

Эмэгтэйчүүдийн 68 кг-ын дүн:

1. Э.Дэлгэрмаа (Хүч)

2. Т.Энхжин (Алдар)

3. Б.Ганцэцэг (Дархан Хасу FOHOW)

З.СУМЪЯАБАЗАР УЛСЫН АВАРГЫН ГУРАВ ДАХЬ ТҮРҮҮГЭЭ ХҮРТЛЭЭ

    “Хилчин” спорт хорооны бөх, Азийн аваргын хүрэл медальт, ОУХМ З.Сумъяабазар чөлөөт бөхийн насанд хүрэгчдийн УАШТ-ий 74 кг-ын жинд түрүүлж, УАШТ-ий  гурав дахь алтан медалиа авлаа. Энэ жинд “Дархан Хасу FOHOW” клубийн бөх, залуучуудын улсын гурван удаагийн аварга Э.Төгсжаргал дахин үзүүрлэв. Харин “Тэх мөнх” клубийн тамирчин М.Толуй, “Хилчин” спорт хорооны бөх Ш.Дэлэг нар дахин хүрэл медалийн эзэд боллоо.

Эрэгтэйчүүдийн 74 кг-ын дүн:

1. З.Сумъяабазар (Хилчин)

2. Э.Төгсжаргал (Дархан Хасу FOHOW)

3. М.Толуй (Тэх мөнх)

3. Ш.Дэлэг (Хилчин)

О.СҮЛДХҮҮ УЛСЫН АВАРГЫН ТАВ ДАХЬ ТҮРҮҮГЭЭ АВЛАА

    Чөлөөт бөхийн насанд хүрэгчдийн УАШТ-ий 79 кг-ын жинд Ази тивийн аваргын хошой хүрэл медальт, армийн дэлхийн аварга, ОУХМ О.Сүлдхүү улсын аваргад тав дахиа түрүүлэв. Тэрбээр 74 кг-ын жинд хоёр жил дараалан түрүүлж байсан билээ. Улсын аваргын алт, мөнгөн медальтан Б.Батбаяр өнөө жил 79 кг руу өгсөж барилдаад ахин финалдсан. Тэрбээр ийнхүү УАШТ-ий алт, хошой мөнгөн медальтан боллоо. Хүрэл медалийг "Сүлд" спорт хорооны тамирчин Б.Ган-Эрдэнэ, "Хантайшир" дэвжээний бөх А.Сайнбилэг нар гардав.

Эрэгтэйчүүдийн 79 кг-ын дүн:

1. О.Сүлдхүү (Алдар)

2. Б.Батбаяр (Сүлд)

3. Б.Ган-Эрдэнэ (Сүлд)

3. А.Сайнбилэг (Хантайшир)

Б.БЯМБАДОРЖ УАШТ-ИЙ ГУРАВ ДАХЬ АЛТАН МЕДАЛИА ЗҮҮЛЭЭ

    Эрэгтэйчүүдийн 86 кг-ын жинд “Сүлд” спорт хорооны бөх, 23 хүртэлх насны ДАШТ-ий хүрэл медальт, ОУХМ Б.Бямбадорж болон “Алдар” спорт хорооны тамирчин, Азийн тивийн аваргын хүрэл медальт, Н.Батбилгүүн нар финалдсан юм. Улмаар тус жинд ОУХМ Б.Бямбадорж түрүүлж, улсын аваргын гурав дахь алтан медалийг энгэртээ зүүлээ.

Харин ОУХМ Н.Батбилгүүний хувьд, өнгөрсөн 2025 онд аварга болж байсан билээ. Хүрэл медалийг “Байдрагийн хүчтэн” дэвжээний бөх ОУХМ Э.Бямбадорж, “Алдар” спорт хорооны тамирчин П.Билгүүндалай нар авлаа. ОУХМ Э.Бямбадорж хоёр өдрийн өмнө болсон сонгомол бөхийн УАШТ-ээс хүрэл медаль авсан билээ. Монгол Улсын арслан Пүрэвдагвын хүү Билгүүндалай анх удаа насанд хүрэгчдийн УАШТ-д оролцсон юм.

Эрэгтэйчүүдийн 86 кг-ын дүн:

1. Б.Бямбадорж (Сүлд)

2. Н.Батбилгүүн (Алдар)

3. Э.Бямбадорж (Байдрагийн хүчтэн)

3. П.Билгүүндалай (Алдар).