Умард Европын Скандинавын хойгт орших Нордикийн нийслэл хэмээгддэг Шведийн Хаант Улсын Стокхолм хотноо Монгол түмний эртнээс өвлөж ирсэн соёлын хосгүй өв шагайн харваа, шагайн нумт харвааны уянгалаг эгшиг, эв нэгдлийн дуулал хоёр өдрийн турш цуурайтсан байна.

    Монгол Улсаас Шведийн Хаант Улсад суугаа ЭСЯ-ны нэрэмжит Монгол Үндэсний Шагайн харваан болон нумт харвааны “Шилжин явах цом”-ын аварга шалгаруулах тэмцээн Стокгольм хотноо амжилттай явагдаж шилдэгүүдээ шалгаруулжээ.

  Тэмцээнд шагайн харваан төрлөөр Европын 10 улсын 12 багийн 100 гаруй харваач, нумт харваан төрөлд гурван улсын долоон багийн 50 гаруй харваач онч мэргэнээ сорин өрсөлдсөн байна.

   Шагайн харваан багийн төрөлд тэргүүн байр, цомын эзнээр Монгол Улсын “Үлэмж дархан мэргэн” Ю. Мөнхтөр ахлагчтай Франц Улсын “Чандмань” бол баг шалгарчээ. Дэд байрт аймгийн “Гарамгай мэргэн” Д.Отгонбаатар ахлагчтай Швед улсын “Мэргэчүүд” баг, гуравдугаар байрт Монгол Улсын “Дархан мэргэн” Б. Баатарбат ахлагчтай Франц Улсын “Маршалын Мэргэчүүд” багууд тодорсон байна.

    Хувийн цуваа харваанд аймгийн гоц мэргэн Д. Чинзүрх , Франц Улсаас ирж түрүүлж Монгол Улсын “Мэргэн” Б.Батзориг /Швейцарь/ болон залуу харваач Б. Мөнхбат /Унгар/ нар удаалжээ. Шведийн Хаант Улс дахь Элчин Сайдын Яамны нэрэмжит цомын төлөөх тэмцээний шагайн нумт харвааны тэмцээнд 50 гаруй харваач оролцож тойргийн журмаар тоглож өндөрлөсөн байна.

   Алтан медаль, цомын эзнээр Бeльги Улсын Д. Мягмарсүрэн ахлагчтай "ОНЧ" баг шалгарчээ. Швед Улсын С.Энхмандал ахлагчтай "ХИЙМОРЬ" баг, Швед Улсын Д.Амаржаргал ахлагчтай "ДӨЛ" баг тус тус удаалсан байна. Цуваа харваанд тэргүүн байрыг Швед Улсын “ДӨЛ” багийн харваач Ц. Ариунжаргал эзэлж, дэд байрт Бeльги Улсын “ОЧИР” багийн харваач, Монгол Улсын “ХАРЬШГҮЙ МЭРГЭН” Ч. Мөнхбаатар, гуравдугаар байрт мөн Бeльги Улсын “ОНЧ” багийн харваач Б. Золзаяа нар шалгарч медалийн эзэд болжээ.