Монголын хөл бөмбөгийн холбоо болон Өмнөд Солонгосын “Инчон Юнайтед” хөл бөмбөгийн клубтэй хамтран ажиллах санамж бичигийг өнөөдөр байгууллаа. МХБХ-тэй хамтран ажиллах санамж бичиг байгуулсан БНСУ-ын “Инчон Юнайтед” хөл бөмбөгийн клуб “IUFC” нь 2003 онд байгуулагдсан Өмнөд Солонгосын дээд лигт “K League-1” тоглодог. Солонгосчууд “IUFC” буюу “Инчон Юнайтед” хөл бөмбөгийн клубийг “ард түмний баг” гэж нэрлэдэг.

     Мөн “эв нэгдэл, сэтгэл зүтгэлээрээ алдартай баг” хэмээн үнэлддэг байна. Тус клубийн уриа нь “United We Stand”, “Нэгдсэнээр бид хүчтэй” гэсэн уриатай бөгөөд солонгосын залуус дэлхийн хэмжээний тоглогчдыг бэлтгэх, хөгжүүлэхэд анхаарч ажилладаг аж. Тус клубтэй хамтран ажиллах санамж бичиг байгуулснаар Монголын тамирчид БНСУ-д хамтарсан тоглолт хийх, БНСУ-д бэлтгэл хийх, хоёр орны туршлагаас суралцан солилцох үүд хаалга ийнхүү нээгдэж байна.

    Хамтын ажиллагааны зорилго нь хоёр улс хамтдаа хөл бөмбөгийн хөгжлийг дэмжих, МХБХ болон “IUFC” хооронд найрсаг хамтын ажиллагааг бататган бэхжүүлэх, өсвөрийн хөлбөмбөгчдийг дэмжих хөтөлбөр сургалт зохион байгуулах, залуучуудын сургалт, нөхөрсөг тоглолт болон бусад холбогдох үйл ажиллагааг хамтран зохион байгуулах гэжээ. Мөн талууд сургалтын бааз, бэлтгэлийн хөтөлбөр, спортын анагаах ухаан болон нөхөн сэргээх чиглэлээр хамтран ажиллаж, хоёр улсын хөл бөмбөгчдийн хөгжлийг дэмжинэ хэмээн санамж бичигт заажээ.