Монгол Улсын гар дээр суниалтын анхдугаар улсын аварга шалгаруулах тэмцээн 2025 оны аравдугаар сарын 25-26-ны өдрүүдэд болж өндөрлөв. Анхдугаар УАШТ-ий эмэгтэйчүүдийн ангилалд алтан медаль хүртсэн, хөнгөн атлетикийн спортын дэд мастер, адал явдалт спорт аяллын, спортын мастер  Төмөрбатын Уртнасантай ярилцлаа. Тэрбээр Орхон аймгийн Биеийн тамир спортын газрын боловсролын байгууллага, ахмад тамирчдын болон хөгжлийн бэрхшээлтэй иргэдийн спортыг хариуцсан мэргэжилтэн юм.

-Монгол Улсын гар дээр суниалтын анхдугаар улсын аварга шалгаруулах тэмцээнээс алтан медаль хүртсэнд баяр хүргэе.

      -Баярлалаа. Юуны өмнө танд болон танай “Эргэлт.мн” сайтын хамт олонд маш их баярлалаа.

-Гар дээр суниалтын анхдугаар УАШТ-д хэдэн байгууллага, клубийн хичнээн тамирчин, хэдэн төрөл, ангилалд өрсөлдсөн бэ?

    -Гар дээр суниалтын анхдугаар улсын аварга шалгаруулах тэмцээнд 21 аймаг, Улаанбаатар хотын есөн дүүргийн 386 тамирчин өрсөлдсөн.

-Монгол Улсад гар дээр суниалтын албан ёсны клубууд байдаг уу?

     -Тийм ээ,  21 аймаг, Улаанбаатар хотын есөн дүүрэгт Гар дээр суниалтын салбар холбоодууд байгаа.

-Ер нь бүх спортын төрлийн тамирчид бэлтгэл дээрээ гар дээр суниалтыг тогтмол шахуу хийдэг. Тийм болохоор гар дээр суниалтын спортыг сонирхогч олон биз?

      -Тийм шүү, гэхдээ гар дээр суниалтын спорт нэг онцлогтой. Төхөөрөмж дээр болон цэвэр тэсвэрийг харуулсан суниалтаараа  ялгагдана.

-УАШТ-ий ямар төрөл, ангилалд хэд суниаж улсын аварга болов оо?

        -Би гар дээр суниалтын анхдугаар УАШТ-ий 27-30 насны эмэгтэйчүүдийн ангилалд 20, 30, 40 суниаж шигшээ шатанд шалгарсан. Финалд 80 суниалт хийж алтан медаль хүртэж, улсын аварга болсон.

-Миний дүү манай уншигчдад өөрийгөө танилцуулахгүй юу?

     -Намайг Төмөрбатын Уртнасан гэдэг.  1997 онд Өмнөговь аймгийн Мандал овоо суманд төрсөн. Айлын том охин, доороо нэг дүүтэй. Миний бага нас Орхон аймгийн Эрдэнэт хотод өнгөрсөн. Арван жилийн дунд сургуулиа 2014 онд төгссөн.  “Эрдэм” ахлах сургуулийг төгсөж байлаа.

2014-2018 онд МУБИС-ийн Биеийн тамирын сургуулийг Биеийн тамирын багш мэргэжлээр төгссөн. 2021 онд магистрын зэрэг хамгаалсан. Одоо Орхон аймгийн Биеийн тамир, спортын газрын Боловсролын байгууллага, Ахмадын спорт, Хөгжлийн бэрхшээлтэй иргэдийн спортыг хариуцсан мэргэжилтэн.

-Багадаа ямар спортын төрлөөр хичээллэж байсан бэ?

      -Ерөнхий боловсролын дунд сургуулийн сурагч байх үедээ хөнгөн атлетикийн спортыг сонирхож хичээллэдэг байсан.

-Одоо гар дээр суниалтаас гадна өөр ямар спортын төрлөөр хичээллэдэг вэ?

       -Хийлдэг завины уралдаан рафтингийн спортоор хичээллэдэг. Одоо рафтингийн спортын дэлхийн аварга шалгаруулах тэмцээнд оролцох гэж байгаа. Рафтингийн уралдааны зам, уулын түргэн урсгалтай, харгиа, боргио, хүрхрээ бүхий голоор уралдааны даалгавар биелүүлдэг төрөл.

– Ямар спортын төрлийн ямар зэрэг, цолтой тамирчин бэ?

        -Хөнгөн атлетикийн спортын дэд мастер, Спорт адал явдалтын спортын мастер цолтой.

-Одоо ямар байгууллага, клуб дээр бэлтгэл, сургуулилалтаа хийдэг вэ?

        -Орхон аймгийн Гар дээр суниалтын холбоон дээрээ БТСГ-ын “А” зааланд бэлтгэл, сургуулилалтаа хийдэг.

-Яагаад гар дээр суниалтын спортыг сонгож хичээллэх болсон юм бэ?

        -Анх 2019 онд гадаадын тамирчдын бичлэгийг үзэж байгаад гар дээр суниалтын спортыг сонирхож эхэлсэн. Тэр үед  Монгол Улсад гар дээр суниалтын холбоо гэж байдаггүй байв. Энэ спортыг холбоог байгуулж, Монгол Улсдаа хөгжүүлэх юмсан гэж бодож явдаг байлаа.

 -Хэд дэх жилдээ гар дээр суниалтын спортоор хичээллэж байгаа вэ?

      -Гар дээр суниалтын спортыг анх 2019 онд сонирхож хичээллэсэн гэхээр өдгөө зургаа дахь жилдээ хичээллэж байгаа юм байна.

-Гар дээр суниалтын УАШТ-ээс өмнө энэ төрлийн ямар тэмцээнүүдэд өрсөлдөж байсан бэ?

       -Гар дээр суниалтын анхдугаар УАШТ-ээс өмнө Орхон аймгийн аварга шалгаруулах тэмцээнд оролцож, улсын аварга шалгаруулах тэмцээнд өрсөлдөх эрхийг хүртсэн.

-Сэтгэлд нь хоногшин үлдсэн хамгийн сайхан дурсамж үлдээсэн ямар тэмцээн байдаг вэ?

      -Анх 2023 онд Орхон аймагтаа гар дээр суниалтын спортыг үүсгэн байгуулан,  хөгжүүлж эхэлсэн. Тэр үеийн хичээл, зүтгэл сэтгэлд хамгийн ихээр хоногшсон дурсамж болон үлдсэн шүү.