Итали Улсын Жесоло хотод 2025 оны аравдугаар сарын 3-13-ны өдрүүдэд 23 дахь удаагийн таеквондо-гийн “ITF” холбооны дэлхийн аварга шалгаруулах тэмцээн болж өндөрлөсөн билээ. Тус ДАШТ-д дэлхийн 84 орны 1200 орчим тамирчин өрсөлдсөн юм. “Жесоло-2025” ДАШТ-д  амжилттай оролцож дэлхийн хошой аварга болсон Мөнхцогийн Мөнхжаргалтай ярилцлаа. Тэрбээр таеквондо-гийн спортын ОУХМ цолтой. “ITF” холбооны олон улсын хар бүс, нэгдүгээр дантай.  “Термалин Клин” ХХК-д нягтлан бодогч, Олон улсын таеквондо-гийн "Чоно" клубийн тамирчин. М. Мөнхжаргал 2011 онд ДАШТ-ээс мөнгөн медаль хүртэж байсан. 2012 онд Ази тивийн арга шалгаруулах тэмцээнээс алтан медаль хүртэж, Ази тивийн аварга болсон. 2013 онд ДАШТ-ээс алтан медаль хүртсэн. 2015 онд ДАШТ-ээс алт, мөнгөн медаль хүртсэн. 2025 оны ДАШТ-ээс алт, мөнгөн медаль хүртээд байгаа.

-Таеквондо-гийн 2025 оны ДАШТ-д амжилттай өрсөлдөж, дэлхийн аваргаас хоёр дахь алтан медаль хүртсэнд баяр хүргэе.

   -Баярлалаа.

-Хэд дэх дэлхийн аварга шалгаруулах тэмцээндээ оролцов. Нийт хэдэн медаль хүртээд байна вэ?

       -Миний хувьд энэ жил  дөрөв дэх удаагийнхаа ДАШТ-д амжилттай оролцоод байна аа.

–Миний дүү өөрийгөө манай уншигчдад танилцуулахгүй юу?

        -Намайг Мөнхцогийн Мөнхжаргал гэдэг. Нягтлан бодогч мэргэжилтэй.

-Аль аймаг, хотод төрж, өссөн хүүхэд вэ?

       -Улаанбаатар хотод төрж өссөн.

-Ерөнхий боловсролын хэддүгээр сургуулийн, хэдэн оны төгсөгч вэ?

        -Би нийслэлийн ерөнхий боловсролын арван жилийн 105 дугаар дунд сургуулийг төгссөн.

-Бага нас нь хаана өнгөрсөн бэ?

         -Миний хүүхэд нас Улаанбаатар хотод өнгөрсөн. Ер нь ихэвчлэн бага насаа таеквондо-гийн бэлтгэл сургуулилалт хийж өнгөрөөсөн.

-Багадаа хэр хөдөлгөөнтэй охин байсан бэ?

        -Одоо бодоод байхад их хөдөлгөөнтэй, сэргэлэн цовоо охин байжээ. Аливаа зүйлийг их хурдан сурдаг байсан санагддаг.

-Олон тулааны спорт дотроос яагаад онцолж “ITF”-ийн таеквондо-гийн спортыг сонгож хичээллэх болсон юм бэ?

        -Би олон улсын таеквондо-гийн спортоор 2002 онд анх хичээллэж эхэлсэн. Анх хамаатны маань хүүхэд энэ спортоор хичээллэх гээд, тэгээд надад хамт явах санал тавьснаар энэ спортод хөл тавьж байсан.

-Таэквондо-гийн анхны багш нь “Чоно” клубийн Мягмарсүрэн багш уу?

        -Би анх 2002 онд олон улсын таеквондо-гийн “Төмөр нударга” клубийн Батболд багшийн удирдлага дор хичээллэж байсан. Тэгээд хоёр жилийн дараа буюу 2004 онд “Чоно” клубт орж Мягмарсүрэн багшийн удирдлага доор тасралтгүй өнөөдрийг хүртэл бэлтгэл сургуулилалтаа хийж байгаа.

 -Хэдэн настай байх үедээ таеквондо-гоор хичээллэж эхэлсэн бэ?

        -Би 14-15 настай байх үеэс энэ спортод анх хөл тавьж орсон.

-Одоо хэд дэх жилдээ таеквондо-гоор хичээллэж байна вэ?

        -Анх 2002 онд таеквондод орсон  гэхээр энэ жил би 23 дахь жилдээ тасралтгүйгээр хичээллээд явж байна.

–Одоо таеквондо-гийн хар бүс хэддүгээр дантай мастер болсон бэ?

        -“ITF” холбооны олон улсын хар бүс, нэгдүгээр дантай.

–Ямар мэргэжилтэй вэ. Хаана ямар байгууллагад ажиллаж байна вэ?

         -Би нягтлан бодогч мэргэжилтэй. Тус мэргэжлээрээ тасралтгүй 15 жил нягтлан бодогчоор ажиллаж байгаа. Одоогоор “Термалин Клин” ХХК-д нягтлан бодогчоор ажиллаж байгаа.

-Одоо ямар клубт, байгууллагын тамирчин бэ?

       -Олон улсын таеквондо-гийн "Чоно" клубийн тамирчин.

-Багш, дасгалжуулагчаар ажиллаж байгаа юу?

       -Дасгалжуулагчаар ажилладаггүй. Одоогоор тамирчаар бэлтгэл сургуулилалтаа хийж байгаа.

–Таеквондо-гоор гаргасан томоохон амжилтуудаасаа сонирхуулахгүй юу?

       -Би анх 2011 онд ДАШТ-ээс хувийн хатуу биет хугалах төрөлд мөнгөн медаль хүртэж байсан. Үүний дараа 2012 онд Ази тивийн арга шалгаруулах тэмцээнээс хувийн хатуу бие хугалах төрөлд алтан медаль хүртэж, Ази тивийн аварга болж байсан. 2013 онд ДАШТ-ий хувийн хатуу биет хугалах төрөлд алтан медаль хүртсэн. Таеквондо-гийн насанд хүрэгчдийн дэлхий аварга хэмээх цолыг Монгол Улсынхаа тамирчдаас анх түрүүн хүртэж байлаа. Мөн 2015 онд ДАШТ-ээс хувийн хатуу биет хугалах төрөлд мөнгөн медаль, багаараа алтан медаль хүртэж байсан.

-Сэтгэлд тань хоногшин үлдсэн хамгийн сайхан дурсамжтай ямар тэмцээн байдаг вэ?

       -Ер нь бүх тэмцээнд хамгийн сайнаараа хичээж оролцож байсан болохоор бүгд л хамгийн сайхан дурсамжтай санагддаг.

-Итали Улсын “Жесоло-2025” ДАШТ-д хэдэн төрөл, ангилалд оролцож хэдэн медаль хүртэв ээ?

      -Энэ жилийн ДАШТ-д миний бие хувийн түлийн төрөлд мөнгөн медаль багийн хатуу биет хугалах төрөлд алтан медаль хүртсэн.

 -Багийн хатуу биет хугалах төрөлд Ц.Дэлгэрцэцэг, Б.Амаасүрэн, Н.Энхнаран нартай нэг баг болж алтан медаль хүртсэн гэсэн. Хөл, гарын ямар цохилтоор хэр зузаантай банзыг хугалсан бэ?

       -Миний хувьд багийн хатуу биет хугалах төрлийн багийн эрхийг хүртэх урьдчилсан төрөлд өрсөлдсөн. Хөлийн техникээр банз хугалах төрөлд багийн эрхийг авсан байгаа. Хөлийн цохилтоор хугалах хавтан нь ойролцоогоор 5-6 см-ийн зузаантай байдаг. Хатуу биет хугалах төрөлд зөв техник гүйцэтгэл, хурд, хүч, тэсрэлт, өөртөө итгэх итгэл, сэтгэл зүй их чухал байдаг юм.

-“Жесоло-2025” ДАШТ-д хатуу биетээс гадна түль болон тулааны төрөлд өрсөлдсөн үү?

       -Хувийн болон багийн түлийн төрөлд өрсөлдсөн. Бид багаараа мөнгөн медаль авсан. Харин миний хувьд хувийн түлийн төрөлд мөнгөн медаль хүртсэн.

–Хоёр жилийн дараа 2027 онд болох ДАШТ-д оролцох уу?

        -2027 оны ДАШТ Хятадын Бээжин хотод болно. Тус ДАШТ-д оролцохоор төлөвлөж байгаа.

–Одоо дараагийн оролцох ямар тэмцээнүүд байгаа вэ?

       2026 онд таеквондо-гийн Азийн аварга шалгаруулах тэмцээн Монгол Улсад болно. Тус тэмцээнд оролцохоор бэлтгэл сургуулилалтаа хийж байна.