Монголын сагсан бөмбөгийн холбооны Үндэсний дээд лигийн 2025-2026 оны улирлын тоглолтууд явагдаж байгаа билээ. Үндэсний дээд лигийн “М Winx” багийн тоглогч Эрдэнэбаярын Энэрмаатай ярилцлаа. Тэрбээр 2019 онд “FIBA 3х3”-ын “U18” ангиллын өсвөр үеийн ДАШТ-д холын зайн шидэлтээр хамгийн өндөр оноо авч, олны танил болсон тоглогч юм. Харин одоо Э.Энэрмаа Үндэсний дээд лигийг уран чадварлаг тоглолтоороо чимэж явна.

-Миний дүү өөрийгөө манай уншигчдад танилцуулахгүй юу?

      -Сайн байна уу. Намайг Эрдэнэбаярын Энэрмаа гэдэг.  

 –2019 онд “FIBA 3х3”-ын “U18” ангиллын ДАШТ-ий эхний өдөр холын зайн шидэлтээр хамгийн өндөр оноо авч байсныг тань санаж байна. Хоёр тоглолтод 16 оноог авснаар Хятадын Xianglin Wu-тай хамтдаа онооны лидерээр нэрлэгдэж байсан. Тэр үеийн Э.Энэрмаагаас, өнөөдрийн  Э.Энэрмаагийн тоглолтын ур чадвар хэр өөрчлөгдсөн бэ?

      -ДАШТ-д 18 настай балчир охин оролцсон, одоо тэр үеэс тэс өөр болсон. 2019 онд анх удаа олон улсын тэмцээнд тэр тусмаа ДАШТ-д орж байсан болохоор маш их сандралдтай туршлага муутай, ур чадвар бага байсан. Харин одоо бол маш их зүйлийг сурч, ах, эгч, багш нараасаа өдөр болгон үлгэр дуурайлал авч өөрийгөө хөгжүүлж байгаа.

 -Одоо  лигийн ямар багт, ямар байрлал дээр тоглож байгаа вэ?

      -Үндэсний дээд лигийн “M Winx багийн хамгаалагчийн байрлал дээр тоглодог.

–Спортын ямар зэрэг цолтой болсон бэ?

      -Надад сагсан бөмбөгийн спортын ямар нэгэн цол, зэрэг нэг ч байхгүй.

-Аль аймаг, хотод төрж, өссөн хүүхэд вэ?

     -Дархан-Уул аймгийн Дархан хотод төрж, өссөн.

-Бага нас нь хаана өнгөрсөн бэ?

     -Бага насаа ихэвчлэн Дарханд эмээтэйгээ өнгөрүүлсэн.

-Айлын хэд дэх хүүхэд вэ?

     -Айлын дунд дахь хүүхэд, (хоёр ихэр).  

 -Багад хэр хөдөлгөөнтэй охин байсан бэ?

      -Багадаа их л даруухан охин байсан даа. Нэлээн дуугүй талдаа, бүрэг, ичимхий хүүхэд байлаа.

-Хэдэн настай, хэддүгээр ангид байх үеэсээ сагс бөмбөг тоглож эхэлсэн бэ?

      -Ерөнхий боловсролын дунд сургуулийн есдүгээр ангиасаа сагсан бөмбөгийн секцэнд дээрээ хамрагдаж тоглож эхэлсэн.

-Яагаад бусад спортоос илүүтэйгээр сагсан бөмбөгийн спортыг сонирхон хичээллэх болсон бэ?

      -Ах, эгч нарыхаа тоглолтыг их үздэг байлаа. Тэгээд л сагсан бөмбөгийн спортод дуртай болоод сонирхож хичээллэж эхэлсэн юм.

-Сагсан бөмбөгийн спортын чухам юу нь чамд илүүтэйгээр таалагдсан бэ?

      -Багаар ажиллах чадвар нь илүүтэй таалагдсан. Яагаад гэвэл сагсан бөмбөгийн спортод нэг хүн бүхнийг дангаараа хийх боломжгүй, багийн тоглолт уначихдаг юм. Харин багийн гишүүд хамтарч нэгдэж, бие, биенээ ойлголцох нь чухал байдаг. Тоглогч бүр хоорондоо уяалдаатай, өөрт оногдсон үүрэг, хариуцлагыг ухамсарлан  тоглох нь гайхалтай санагддаг.

-Сагсан бөмбөгийн анхны багш нь хэн бэ?

       -Миний сагсан бөмбөгийн анхны багш маань Дархан-Уул аймгийн БСТГ-ын сагсан бөмбөгийн багш, Монгол Улсын гавьяат дасгалжуулагч Д. Гүржав байгаа.

-Одоо сагсан бөмбөгийн спортоор хэд дэх жилдээ хичээллэж байна вэ?

      -Сагсан бөмбөгийн спортоор ес дэх жилдээ хичээллэж байна.

-Сагсан бөмбөгийн спортоор хичээллэж байхад тань шантарч, мохох үе гарч байсан уу?

     -Анх хичээллэж эхэлж байхад, мэдэхгүй, чадахгүй олон зүйлтэй тулгарч шантарч, мохох үе маш их гардаг байсан. Гэвч өөрийн дуртай, сонирхолтой спорт болохоор орхиж чадахгүй, харин улам бүр шамдан, хичээллэх болсон.

-Сагсан бөмбөгийн спортоор хичээллэсэн үеэс хойших томоохон амжилтууддаа сонирхуулахгүй юу?

     -Анхны том тэмцээний амжилт гэвэл оюутны лигийн аварга болж байлаа. Мөн Монголын бүх ард түмний спартакиадаас алт, мөнгө, дээд лигийн аварга шалгаруулах тэмцээнээс хүрэл медаль хүртсэн байгаа.

-Сэтгэлд тань хоногшин үлдсэн хамгийн өрсөлдөөнтэй дурсамж үлдээсэн тоглолтыг хэзээ хийж байв?

      -Сэтгэлд хоногшин үлдсэн өрсөлдөөнтэй тэмцээн гэвэл оюутны лигийн аваргын тоглолт байна. Оюутны лигийн аваргын төлөөх тоглолтод “Этүгэн” их сургуультай таарсан юм. Тэр тоглолт маш өрсөлдөөнтэй болсон. Хамгийн их дурсамж үлдээсэн тоглолт болсон.

-Монголын сагсан бөмбөгийн хөгжил Ази болон дэлхийн хэмжээнд хүрчихлээ. Харин МУГД С.Тулгаас хойш манай эрэгтэй багийн тоглолт жаахан уначихсан мэт санагддаг уу?

     -Ер нь бол тийм шүү. Гэхдээ унасан ч босох чадвартай мундаг тамирчдаар бүрдсэн баг гэж боддог. Эрэгтэй шигшээ баг удахгүй сэргээд гоё тоглолт, сайхан амжилтуудыг гаргах байх.

-Манай 3х3-ын эмэгтэй баг дэлхийн аваргаас мөнгөн медаль хүртсэн. Энэ нь манай эмэгтэй тоглогчдод урам зориг, итгэлийг хэр төрүүлсэн бол?

      -Дэлхийн аваргаас мөнгөн медаль хүртсэн эмэгтэй баг маань сагсан бөмбөг сонирхогчдод маш гоё мэдрэмж төрүүлсэн. Монголын эмэгтэй шигшээ багийн тоглолтын мөч бүр гайхалтай сайхан байсан. Сонирхогч хүн бүр урам зориг, итгэлтэй болсон байх.

-Чөлөөт цагаараа юу хийх дуртай вэ?

      -Чөлөөт цагаараа аль болох аль болох өөрийгөө амрааж, сэргэлт авахыг боддог. Тайван ая, тухтай орчинд, сэтгэл түвшин амрах дуртай.

-Лигийн тэмцээнээс гадна, олон улс, тив, дэлхийн ямар тэмцээнүүд оролцох төлөвлөгөөтэй байгаа вэ?

     -Ойрын хугацаанд тийм бодол байхгүй л байна. Лигийн аварга шалгаруулах тэмцээнд гол анхаарлаа хандуулж байгаа.