Монголын жүдо бөхөд дэлхийд “данслагдсан” гурван Болдбаатар бий. Тэдний нэг “Жижиг” хэмээх МУГТ Ганбатын Болдбаатар “Челябинск-2014” жүдо бөхийн ДАШТ-ээс алтан медаль хүртэж, Ази тивийн аварга болсон билээ. Харин Азийн наадмын аварга, МУГД, МУГТ Халиуны Болдбаатар, ОУХМ Чимэд-Ёндонгийн Болбаатар нар нэг өдөр мэндэлсэн байдаг нь сонин тохиолдол. МУГТ, МУГД Халиуны Болдбаатар 1971 оны энэ өдөр мэндэлжээ. Жүдо бөхийн Үндэсний шигшээ багийн дасгалжуулагч ОУХМ Чимэд-Ёндонгийн Болбаатар багш 1983 оны мөн энэ өдөр мэндэлжээ.

     ОУХМ Чимэд-Ёндонгийн Болдбаатарыг “Дарханы Болдоо” гэж нэрлэх нь бий. Тэрбээр МУГТ Г.Болбаатар, МУГТ Д.Төмөрхүлэг, МУГТ Д.Амартүвшин нартай нэгэн цаг үед, нэг жинд өгөө, аваатай ижил тэнцүүхэн өрсөлдөж явсан.  ОУХМ Ч.Болдбаатар АНЭУ-ын “Abu Dhabi”-гийн “Гранд слам”-аас Монголын тамирчдаас анхны медалийг 2010 онд авч байлаа. Тэрбээр Хятадын Ян Лишуан, Бразилын Фелипе Китадай, Украины дэлхийн аварга Георгий Зантарая нарыг цэвэр ялаад Оросын олимпын аварга Арсен Галстянд ялагдан, хүрэл медаль хүртэж байсан юм. Ч.Болдбаатар “Чингис хаан” дэлхийн цомын хоёр удаагийн аварга билээ. Түүний эхнэр нь хүртэл жүдочин бүсгүй байгаа.

      Харин Монгол Улсын гавьяат тамирчин, Монгол Улсын гавьяат дасгалжуулагч Халиуны Болдбаатар 71 кг-ын жинд барилддаг байв. Тэрбээр Монгол Улсаа төлөөлж хоёр олимпод дараалан барилдаж, шагналт долдугаар байрт шалгарч байлаа. "Барселона-1992", "Атланта-1996" олимпод шагналт VII байрт шалгарсан юм. "Парис-1997" ДАШТ-ий хүрэл медалийн оосроос атгаад алдсан билээ.

     Халиуны Болдбаатар Тайланд Улсын нийслэл Бангкок хотод 1998 онд болсон Азийн наадмын аварга юм. Харин Хирошима 1994 Азийн наадмаас хүрэл медаль хүртэж байв. Осака 1991, Манила 1997, Воньжоу 1999 Азийн аварга шалгаруулах тэмцээнээс мөнгө, Шинэ Дели 1995, Улаанбаатар 2001 Азийн аваргаас хүрэл медаль хүртэж байсан шилдэг жүдочин билээ.

    Тэрбээр Монгол Улсын олимпын анхны аваргыг төрүүлэн гаргасан юм. Харин Халиуны Болдбаатар багшийн эхнэр МУГТ Ц.Мөнхзаяа Лондон 2012 олимпын тавдугаар байр, ДАШТ-ий хүрэл, Азийн аварга шалгаруулах тэмцээний алтан медальтай, Азийн аварга тамирчин билээ.