Холимог тулааны 2025 оны залуучууд, насанд хүрэгчдийн ДАШТ-ий шигшээ тоглолтууд үргэлжилж байна. Өчигдөр орой тэмцээний залуучуудын ангиллын дэлхийн аваргын төлөөх тулаанууд явагдсан. Эмэгтэйчүүдийн -65.8 кг-ын жинд өрсөлдсөн ОУХМ Байгалмаагийн Алтанчимэг Ангол Улсын тамирчин Надир Виеираг 2-р үед хөлийн гурвалжин боолтоор буулган авч дэлхийн залуучуудын аварга боллоо.

     Монгол Улсын холимог тулааны хоёр удаагийн аварга, 2024 оны залуучуудын ДАШТ-ий хүрэл медальт, Ази тивийн аваргын хүрэл медальт Б.Алтанчимэг ийнхүү холимог тулааны спортоор залуучуудын дэлхийн аварга болсон Монгол Улсын анхны тамирчин болж байна.

    Дэлхийн 80 гаруй орны 1000 гаруй шилдэг холимог тулаанчид өрсөлдөж байгаа “Тбилис-2025” ДАШТ  аравдугаар сарын 2-ны өдөр, өнөөдөр  насанд хүрэгчдийн финалууд явагдсанаар өндөрлөх болно. Тус тэмцээнд Монгол Улсаас нийт дөрвөн тамирчин, нэг дасгалжуулагчийн бүрэлдэхүүнтэй баг оролцсон юм.