Олон улсын олимпын хороо (ОУОХ)-ноос Сенегал Улсын нийслэл Дакар хотноо 2026 онд зохион байгуулагдах залуучуудын олимпын наадмын үеэр “Young Reporters” хөтөлбөр хэрэгжүүлэх болсон талаар мэдээллээ.

      ОУОХ-ны "Young Reporters" хөтөлбөр нь ирээдүйн спортын сэтгүүлчдийг бэлтгэх зорилготой бөгөөд анх 2010 онд Сингапурт болсон залуучуудын олимпын анхдугаар наадмаас эхэлсэн. Үүнээс хойш дэлхийн 68 улсаас 125 залуу сэтгүүлч тус хөтөлбөрт хамрагдаад байна.

      Залуучуудын олимпын наадмын үеэр ажиллах, олон улсын багтай хамтран мэдээ бэлтгэх, дадлагажих төдийгүй дэлхийн өнцөг булан бүрээс ирсэн спортын сэтгүүлзүй сонирхогч залуустай танилцах гайхалтай орон зайг нээж өгөх “Дакар 2026” энэ удаагийн хөтөлбөрт найман эмэгтэй, найман эрэгтэй нийт 16 залуу сэтгүүлчийг сонгон шалгаруулна.

     Монголын залуус ч энэхүү хөтөлбөрөөр дамжуулан дэлхийд дуу хоолойгоо хүргэж, ур чадвараа харуулахыг уриалж байна. Хөтөлбөрт тавигдах шаардлага:

• 21-25 настай байх (2001-2005 онд төрсөн)

• Англи хэлтэй байх.

• Сэтгүүл зүй, гэрэл зураг эсвэл холбоотой чиглэлээр суралцаж буй оюутан эсвэл залуу мэргэжилтэн байх

Бүртгэл 2025 оны 11-р сарын 30-ныг хүртэл нээлттэй.