Арабын Нэгдсэн Эмират Улсын Абу Даби хотод “IFMA” Олон улсын муайтай спортын холбооны дэлхийн аварга шалгаруулах тэмцээн есдүгээр сарын 10-20-ны өдрүүдэд болсон юм.  ДАШТ-ий 12-13 насны охидын 58 кг-ын жинд тулалдаж хүрэл медаль хүртсэн “Гаруда” академийн тамирчин Мэгддоржийн Буяндарьтай ярилцлаа.

-Муатай-гийн өсвөр үеийн дэлхийн аварга шалгаруулах тэмцээнээс хүрэл медаль хүртсэнд баяр хүргэе.

     -Баярлалаа.

-ДАШТ-д хэдэн тулаан хийв. Хамгийн хүчтэй өрсөлдөгч ямар улсын тамирчин байсан бэ?

      -Надтай тулалдсан хамгийн хүчтэй өрсөлдөгч Герман Улсын тамирчин байсан. Өөрөөс нь асуухад өмнөх жилүүдэд хоёр удаа дэлхийн аварга болж байсан гэсэн.

-Миний дүү өөрийгөө манай уншигчдад танилцуулахгүй юу?

       -Намайг Мэгддоржийн Буяндарь гэдэг. Муайтайгаас өөр сонирхдог спорт гэвэл сагсан бөмбөг тоглох дуртай. Мөн гэр бүлээ дагаад ууланд гарах, найзуудтайгаа дасгал хийж гүйх, усанд сэлэх дуртай.

-Аль аймаг, хотод төрсөн хүүхэд вэ?

       -Би АНУ-ын Чикаго хотод төрсөн. Харин одоо Улаанбаатар хотод амьдарч байгаа.

-Одоо хэдэн настай вэ?

     -Одоо би ирэх аравдугаар сарын 13-ны өдөр 14 нас хүрнэ.

–Аль сургуулийн хэддүгээр ангийн сурагч вэ?

      -Би “ESM” дунд сургуульд сурдаг. Тус сургуулийн 8-р ангийн сурагч. Миний дуртай хичээллүүд гэвэл нийгмийн ухаан болон англи хэл.

-Аав, ээж нь тулааны спортоор анх хичээллэх үед нь хориглож байв уу?

       -Манай гэр бүл намайг АНУ-д төрсний дараа Тайланд руу явсан. Тайланд Улсад амьдарч байх үедээ хоёр сарын хугацаанд муайтай-гаар

хичээллэж байсан учраас гэр бүл маань маш их дэмждэг.

-Танай гэр бүлд спортоор хичээллэдэг хүн бий юу?

       -Намайг муайтай-гаар хичээллэхээс өмнө бид гэр бүлээрээ, бөөнөөрөө жүдо бөхөөр хэдэн сар хичээллэсэн. Харин одоо манай ах, аав хоёр жүдо бөхөөр хичээллэсэн хэвээрээ байгаа. Бусад нь өөр спортын төрлийг сонгоод больсон.

–Муайтай-гийн тулаанаас өмнө өөр тулааны спортоор хичээллэж байсан уу?

        -Анх би багадаа газрын теннисийг сонирхоод хичээллэн үзэж байсан юм. Дараа нь сагсан бөмбөг тоглож, түүний дараа нь гэр бүлийхнийгээ дагаад жүдо бөхийн секцэнд явж байсан.

–Охин хүүхэд байж яагаад хамгийн хүнд, эрсдэл ихтэй өвдөг, тохойны цохилт хийдэг хатуу, чанга тулааны спортыг сонгож хичээллэх болов?

        -Миний хувьд спортоор хичээллэхэд хүйс хамаагүй гэсэн бодолтой явдаг. Эр хүн ч бай, эмэгтэй хүн ч бай хүссэн спортоо сонгож, хичээллэж, амжилт гаргаж чадна гэж боддог. Миний хувьд муайтай-гийн спортыг өөрийгөө өөрчлөн, хөгжүүлэх гэж сонгосон. Муайтай-гийн спорт тэсвэр хатуужил, сахилга бат, өөрийгөө хамгаалах чадварыг суулгадаг. Мөн сэтгэл зүйн хувьд ч хүчтэй болгодог.

-Холимог тулаан, кик бокс болон бусад тулааны спортын тэмцээнд ордог уу?

    -Бусад тулаан спортын тэмцээнд ордоггүй. Заримдаа “К-1” кикбоксын тэмцээнд ордог. Гэхдээ надад муайтай-гийн тэмцээнүүд хамгийн их таалагддаг.

-Тулааны үеэр бэртэл, гэмтэл авахаас айдаггүй юм уу?

      -Би насанд хүрээгүй учраас сонирхогчдын муайтай-гийн тэмцээнд ордог. Тэнд бүх төрлийн хамгаалалт зүүж байж рингэнд гардаг болохоор гайгүй байдаг.

-Тулааны үед хөл, гарын ямар цохилтуудыг гол төлөв хийдэг вэ?

       -Өрсөлдөгчөөсөө хамаардаг. Хэрэв өрсөлдөгч гарын цохилт сайтай байвал эхэндээ хөлөөрөө цохилт хийэ, илүү ажиллана. Харин түүний хөлийн цохилт нь илүү сайн бол ихэвчлэн гараар цохиж, боксоор тулалддаг.

–Тулааны үед хүнд цохилтоор өрсөлдөгчөө унагаж байсан уу?

      -Хүнд цохилтоор өрсөлдөгчөө унагаж байгаагүй. Гэхдээ өрсөлдөгчөө хүнд цохилтод оруулан тоолуулж дутуу гаргаж байсан тохиолдол бий.

-Дэлхийн аваргаас медаль хүртлээ. Одоо дараагийн оролцох ямар тэмцээнүүд хүлээж байгаа вэ?

      -Энэ есдүгээр сарын 27-ны хагас сайн өдөр муайтай-гийн улсын аварга шалгаруулах тэмцээн болно. УАШТ-д орж өрсөлдөнө.