“Оюун санааны болон стратегийн түншлэл” Монгол, Энэтхэгийн дипломат харилцааны 70 жил сэдэвт эрдэм шинжилгээний хурал боллоо. Монгол Улсын Гадаад харилцааны яам, Шинжлэх ухааны академийн Олон улс судлалын хүрээлэн, БНЭУ-аас Монгол Улсад суугаа Элчин сайдын яам хамтран зохион байгуулсан тус арга хэмжээнд Монголын иогчдын холбооны удирдах зөвлөлийн гишүүд болон Монголын иогчдын холбооны хүндэт ерөнхийлөгч О.Гэрэлтуяа нар уригдан оролцлоо.

     Хурлын эмхтгэл номонд хүндэт ерөнхийлөгч О.Гэрэлтуяагийн " Монгол дахь иогийн үүсэл хөгжил, өнөөгийн байдал" сэдэвт нийтлэл орохоор боллоо. Монгол, Энэтхэгийн эрдэмтэн судлаачид болон төр, иргэний нийгмийн төлөөллүүд “Монгол, Энэтхэгийн харилцаа, хамтын ажиллагаа”, “Энэтхэг судлал” зэрэг өргөн хүрээний сэдвээр илтгэл тавьж, улс төр, эдийн засаг, түүх, соёл, боловсрол, шинжлэх ухааны салбарт хамтын ажиллагааг өрөгжүүлэн гүнзгийрүүлэх гарц, боломжуудыг хэлэлцэн тодорхойлов.

   Эрдэм шинжилгээний хурал нь Монгол, Энэтхэгийн стратегийн түншлэлийн харилцааг бататган бэхжүүлэх, хоёр улсын харилцааны үнэ цэнэ, хөгжлийн үе шат, цаашдын стратегийн чиг хандлага, хөгжлийн төлөвийг тодорхойлж, хамтын ажиллагааг илүү үр өгөөжтэй, өндөр түвшинд хөгжүүлэхэд чухал ач холбогдолтой болж өндөрлөлөө.