Монголын байт харвааны холбооны ерөнхийлөгчийн нэрэмжит цомын тэмцээн есдүгээр сарын 6-7-ны өдрүүдэд 360 талбайд амжилттай зохион байгуулагдлаа. Уг тэмцээнд 16 клубийн 94 тамирчид “Рекурв”, “Компаунд” төрөлд цэц мэргээ сорив. Тэмцээнийг тус холбооны ерөнхийлөгч Х.Отгонтуяа ивээн тэтгэж зохион байгуулав.

      Тэмцээний нээлтийн ажиллагааны үеэр нэгдүгээр зэргийн болзол биелүүлсэн 4, Дэд мастер цолын болзол биелүүлсэн долоо, спортын мастерын болзол биелүүлсэн гурван тамирчинд үнэмлэх, тэмдгийг нь гардуулав. Монгол Улсад байт харвааны спортыг хөгжүүлэхэд үнэтэй хувь нэмэр оруулсан  “Хүндэт ерөнхийлөгч” Б.Ганзориг, ерөнхийлөгч Х.Отгонтуяа нар Монгол Улсад биеийн тамир, спорт үүсч хөгжсөний 100 жилийн ойн медалиар шагнагдав.

      Холбооны ерөнхийлөгчийн нэрэмжит цомын тэмцээн нь есдүгээр сарын 16-19-ний өдрүүдэд болох Монголын бүх ард түмний спортын XVI наадмын өмнө зохион байгуудагдсан, баг тамирчдын чансааг шалгасан “А” зэрэглэлийн томоохон сорилго тэмцээн боллоо.