Соёл, спорт, аялал жуулчлал, залуучуудын сайд Ч.Ундрам харьяа Засгийн газрын хэрэгжүүлэгч агентлаг Биеийн тамир, спортын улсын хороо болон харьяа Спортын анагаах ухаан, эрдэм шинжилгээний төв, нийслэл, дүүргийн биеийн тамир, спортын байгууллагуудын удирдлагуудтай уулзалт зохион байгуулж тулгамдсан асуудлыг шийдвэрлэхээр хамтран ажиллаж байна.

    Спортын асуудал эрхэлсэн сайдын тухайд Биеийн тамир, спортын улсын хороонд биечлэн очиж Спортын анагаах ухаан, эрдэм шинжилгээний төв, нийслэл, дүүргийн биеийн тамир, спортын төрийн байгууллагуудын удирдлагуудтай уулзаж ярилцав. Уулзалтын үеэр ССАЖЗЯ-ны биеийн тамир, спортын салбарт баримтлах стратеги, бодлогыг танилцуулж, Биеийн тамир, спортын улсын хорооны танилцуулгыг сонсож тулгамдаж буй асуудлуудыг тус бүрчлэн ярилцаж шийдвэрлэх талаар холбогдох албан тушаалтнуудад үүрэг, чиглэл өглөө.

    Монгол Улсын олимп, паралимпын наадамд бэлтгэж буй Үндэсний шигшээ багийн 300 орчим тамирчин өдөр тутмын бэлтгэл сургуулилтаа хангахын зэрэгцээ спортын анагаах ухааны эмчилгээ, үйлчилгээнд Спортын төв ордонд байрлан хамрагдаж буй. Тус ордон нь залуу жанжин Ж.Лхагвасүрэнгийн санаачилгаар БНХАУ-ын хөрөнгө оруулалтаар 1958 онд ашиглалтад оруулж 67 дахь жилдээ ашиглагдаж буй байгууламж юм.

    2028 онд АНУ-д зохион байгуулагдах “Лос-Анжелес-2028” зуны олимп, паралимпын наадамд өндөр түвшинд бэлтгэн оролцуулах, Үндэсний шигшээ багийн баг, тамирчдын бэлтгэлийн орчин нөхцөлийг сайжруулах талаар арга хэмжээ авч ажиллахыг Биеийн тамир, спортын улсын хорооны даргын үүргийг түр орлон гүйцэтгэгч Э.Билэгтэд даалгалаа.